டாடா உருவாக்கிய புதிய காரை ஓட்டி பார்த்தும் எந்த குறையும் சொல்ல முடியல! டர்போ என்ஜின் தான் இதில் சிறப்பே...!!

டாடா சஃபாரி (Tata Safari), டாடா மோட்டார்ஸ் நிறுவனம் விற்பனை செய்வதிலேயே விலையுயர்ந்த கார் இதுவாகும். விலை அதிகமாக இருப்பினும், இந்தியாவின் எஸ்யூவி கார்கள் சந்தையில் நீண்ட காலமாக சஃபாரி முக்கிய இடத்தைப் பிடித்து வருகிறது. இந்த நிலையில், மிக சமீபத்தில் ​​புதிய டர்போ பெட்ரோல் (Turbo Petrol) என்ஜினுடன் கூடிய குறிப்பிடத்தக்க புதுப்பிப்பை இந்த கார் பெற்றுள்ளது.

அத்துடன், முழுவதும் கருப்பு நிறத்தில் புதிய டார்க் எடிஷனையும் பெற்றுள்ளது. இந்த சிறப்பு பதிப்பானது சிறந்த செயல்திறன் மற்றும் தனித்துவமான தோற்றத்தை உறுதியளிக்கிறது. புதிய பெட்ரோல் என்ஜின் உடன் டாடா சஃபாரி டார்க் எடிஷன் சாலையில் எப்படி செயல்படுகிறது என்பதை காரை ஓட்டி பார்த்து ஆராய்ந்தோம். அப்போது எங்களுக்கு கிடைக்க பெற்ற அனுபவங்களை விரிவான ரிவியூவாக இந்த தொகுப்பில் பார்க்கலாம்.

டாடா சஃபாரி பெட்ரோல் டார்க் எடிஷன் விமர்சனம் - வெளிப்புற சிறப்பம்சங்கள்

டாடா சஃபாரி டார்க் எடிஷன் ஒரு அற்புதமான கருப்பு நிற அழகைக் கொண்டுள்ளது. சஃபாரி பேட்ஜிங் உட்பட காரின் வெளிப்புறத்தில் சிவப்பு நிற ஹைலைட்கள் உள்ளன. இதற்கேற்ப, பெரிய 19-இன்ச் அலாய் சக்கரங்கள் பொருத்தப்பட்டுள்ளதன. மேலும் ஸ்போர்ட்டியான தோற்றத்திற்காக சிவப்பு நிற பிரேக் காலிப்பர்களைக் கொண்டுள்ளது.

பகல் நேரத்திலும் இயங்கும் எல்இடி விளக்குகள், பிரதான ஹெட்லைட்கள் மற்றும் ஃபாக் விளக்குகளுடன், முன்பகுதி சஃபாரியின் வழக்கமான வடிவமைப்பில் இருந்தாலும், நுட்பமான 'சஃபாரி' (SAFARI) எழுத்துகள், இந்த சிறப்பு பதிப்பு காரின் கவர்ச்சியை அதிகரிக்கின்றன. காரின் பின்புறத்தில் உள்ள எல்இடி டெயில்லைட்கள் அதன் நவீன தோற்றத்தை நிறைவு செய்கின்றன. இது சாலையில் ஒரு தனித்துவமான தோற்றத்தை அளிக்கிறது.

டாடா சஃபாரி பெட்ரோல் டார்க் எடிஷன் விமர்சனம் - உட்புற சிறப்பம்சங்கள்

உட்புறத்தில், சஃபாரி டார்க் எடிஷன் அதன் வெளிப்புறத்தை போலவே சிவப்பு மற்றும் கருப்பு நிற கேபினைக் கொண்டுள்ளது. இருக்கைகள் வசதியானவை ஆகவும், வெண்டிலேட்டட் வசதி உடன் உள்ள முன் இருக்கைகள் எலெக்ட்ரிக் மூலம் சரிசெய்யும் வசதியையும் கொண்டுள்ளன. ஓட்டுநர் இருக்கையில் மெமரி செயல்பாடும் உள்ளது. இரண்டாவது வரிசையில் நீண்ட பயணங்களுக்கு "விங்லெட்" சப்போர்ட் உடன் சரிசெய்யக்கூடிய தலையணைகள் உள்ளன.

சூரிய ஒளியை தடுத்து நிழலை தரும் சன்ஷேட்கள் பின் இருக்கை பயணிகளுக்கு பயனுள்ளதாக இருக்கும். 'பாஸ் மோட்' (Pass Mode) செயல்பாடு பின் இருக்கைகளில் உள்ளவர்கள் முன் இருக்கையை சரிசெய்ய அனுமதிக்கிறது. இதன் மூலம் இது பயணிகள் கால் வைக்க கூடுதல் இடத்தை உருவாக்குகிறது. பின்புற இருக்கைகளை சவுகரியமாக சாய்க்க முடிகிறது.

மேலும் மூன்றாவது வரிசை பயணிகள் பயன்படுத்த தனி ஏர் கண்டிஷனிங் கட்டுப்பாடுகள் உள்ளன. காரின் பூட் பகுதியை எளிதாக அணுகுவதற்கு ஏற்ப எலெக்ட்ரிக் கண்ட்ரோல் வசதி உள்ளது. கேபினில் 10 ஸ்பீக்கர்கள் மற்றும் ஒரு சப்-வூஃபர் உடன் கூடிய பிரீமியம் JBL ஒலி அமைப்பு உள்ளது. காரின் கேபினுக்குள் ஆங்காங்கே உள்ள மென்மையான தொடு பொருட்கள் மற்றும் கேபின் விளக்குகள் ஒரு நேர்த்தியான சூழ்நிலையை உருவாக்குகின்றன.

டிஜிட்டல் இன்ஸ்ட்ரூமென்ட் கிளஸ்டர் தெளிவான தகவல்களை வழங்குகிறது. முக்கிய தொழில்நுட்ப அம்சங்களில் சாம்சங் மூலம் இயக்கப்படும் 14-இன்ச் இன்போடெயின்மென்ட் திரை மற்றும் முன் & பின்பக்க பார்க்கிங் கேமராக்களுடன் கூடிய டேஷ்கேம் (Dashcam) அமைப்பு ஆகியவை அடங்கும். காரின் பின்பக்கத்தை காட்டும் பக்கவாட்டு கண்ணாடிகள் மெமரி செயல்பாட்டைக் கொண்டுள்ளன. சிறந்த தெளிவுநிலைக்காக ரிவர்ஸில் செல்லும் போது இந்த மிரர்கள் முன்னோக்கி சாய்கின்றன.

டாடா சஃபாரி பெட்ரோல் டார்க் எடிஷன் விமர்சனம் - பாதுகாப்பு அம்சங்கள்

சஃபாரி டார்க் எடிஷன், லெவல்-2 அடாஸ் (ADAS) உள்ளிட்ட மேம்பட்ட பாதுகாப்பு அம்சங்களுடன் உருவாக்கப்பட்டுள்ளது. இந்த அமைப்புகள் ஓட்டுனரின் கவனத்தை கண்காணித்து எச்சரிப்பதுடன், விபத்துகளைத் தடுக்க உதவுகின்றன. லெவல்-2 அடாஸின் முக்கிய செயல்பாடுகளில் அடாப்டிவ் க்ரூஸ் கண்ட்ரோல் மற்றும் சாலையின் பாதையில் இருந்து விலகாமல் ஒரே நேர்கோட்டில் செல்வதற்கான உதவி ஆகியவை அடங்கும்.

காரின் கூடுதல் பாதுகாப்பு அம்சங்களில் ஆட்டோமேட்டிக் அவசர கால பிரேக்கிங், பிளைண்ட் ஸ்பாட் மானிடரிங் மற்றும் பயணத்தை துவங்குவதற்கு முன்பே பழுதுகள் குறித்த எச்சரிக்கை ஆகியவை அடங்கும். அதேபோல், ரிவர்ஸில் வரும்போது குறுக்கே ஏதேனும் வாகனங்கள் வந்தால் அதுகுறித்த கிராஸ்-டிராஃபிக் அலார்ட், சாலைகளில் உள்ள போக்குவரத்து எச்சரிக்கை குறியீட்டு பலகைகளை அடையாளம் காணும் வசதி மற்றும் ஹை-பீம் உதவி ஆகியவை புதிய சஃபாரி காரை ஓட்டும் நம்பிக்கையை வலுப்படுத்துகின்றன.

360-டிகிரி சரவுண்ட்-வியூ கேமரா எளிதாக காரை பார்க் செய்வதற்கு உதவுகிறது. இவற்றுடன், பயணிகளின் சவுகரியத்திற்கு முன்னுரிமை அளிக்கப்பட்டுள்ளது. இதற்காக, காரின் முன் வரிசை இருக்கைகள் வெண்டிலேட்டட் வசதியுடன் வழங்கப்படும் நிலையில், 6 இருக்கைகள் கொண்ட வேரியண்ட்களில் இரண்டாவது வரிசை இருக்கைகளும் இந்த வசதி உடன் கிடைக்கின்றன.

புதிய 4-ஸ்போக் ஸ்டீயரிங் சக்கரத்தில் டாடா நிறுவனத்தின் லோகோவை ஒளிர வைக்க விளக்கு பொருத்தப்பட்டுள்ளது. எலெக்ட்ரிக் பவர் மூலம் இயக்கப்படும் டெயில்கேட் மற்றும் தொடுதல் அடிப்படையில் இயங்கும் HVAC கண்ட்ரோல்கள் காருக்கு நவீன உணர்வை சேர்க்கின்றன; மேலும் பாதுகாப்பான மற்றும் இனிமையான டிரைவிங் அனுபவத்தை வழங்குகின்றன.

டாடா சஃபாரி பெட்ரோல் டார்க் எடிஷன் விமர்சனம் - என்ஜின், பரிமாண அளவுகள் & டிரைவிங் அனுபவம்

புதிய 1.5 லிட்டர் TGDi டர்போ பெட்ரோல் என்ஜின் சஃபாரிக்கான ஒரு முக்கிய மேம்படுத்தலாகும். இது 170 பிஎஸ் பவரையும், 280 என்.எம் டார்க் திறனையும் வழங்குகிறது. 6-ஸ்பீடு மேனுவல் அல்லது ஆட்டோமேட்டிக் கியர்பாக்ஸ் உடன் கிடைக்கும் இந்த என்ஜின், சுத்திகரிக்கப்பட்டு ஆற்றல் மிக்கதாக விளங்குகிறது. டீசல் பதிப்பை விட மென்மையான டிரைவிங் அனுபவத்தை இது வழங்குகிறது. அதே நேரத்தில் விரைவாக பிக்-அப்பை வழங்குகிறது.

குறிப்பாக, என்ஜின் சிஸ்டத்தில் உள்ள டர்போசார்ஜர் இயக்கப்பட்டதும், காரின் வேகம் வலுவுடன் முடுக்கிவிடப்படுகிறது. இது குறிப்பாக திறந்த வெளி நெடுஞ்சாலைகளில் பயணங்களை சுவாரஸ்யமாக்குகிறது. காரின் திடமான சேசிஸ் ஓட்டுபவருக்கும், பயணிகளுக்கும் நிலைத்தன்மையையும் நம்பிக்கையையும் உறுதி செய்கிறது. புதிய சஃபாரி பெட்ரோல் காரில் நார்மல், ஈரம் மற்றும் ஆஃப்-ரோடு என வெவ்வேறு சூழ்நிலைகளுக்கு ஏற்ப அளவுருக்களை கொண்ட பல டிரைவ் மோட்கள் வழங்கப்பட்டுள்ளன.

டாடா சஃபாரி பெட்ரோல் டார்க் எடிஷன் விமர்சனம் - டிரைவ்ஸ்பார்க் கருத்து

டாடா சஃபாரி டார்க் எடிஷன், அதன் புதிய டர்போ பெட்ரோல் என்ஜின் உடன், அதிக ஆற்றல் மற்றும் ஸ்டைலின் சிறந்த கலவையை வழங்குகிறது. பல்வேறு சாலை நிலைகளில் சிறப்பாக செயல்படும் இந்த காரின் உறுதியான கட்டமைப்பிற்கு டாடாவிற்கு தான் நன்றி சொல்ல வேண்டும். நவீன அம்சங்கள் மற்றும் மேம்பட்ட பாதுகாப்பு அமைப்புகள் காரின் கவர்ச்சியை அதிகரிக்கின்றன.

அம்சங்கள் நிறைந்த, விசாலமான மற்றும் ஸ்டைலான எஸ்யூவியை விரும்புவோருக்கு, டாடா சஃபாரி டார்க் எடிஷன் ஒரு சிறந்த தேர்வாகும். அதன் வடிவமைப்பு, ஆற்றல் மற்றும் பாதுகாப்பின் சமநிலை அதை கவர்ச்சிகரமான தேர்வாக விளங்க வைக்கின்றன. வழக்கமான டீசல் கார்களில் இருந்து வெளியேற விரும்பும் வாடிக்கையாளர்கள் மற்றும் டீசல் கட்டுப்பாடுகள் உள்ள பகுதிகளில் வசிப்பவர்கள் புதிய டாடா சஃபாரி பெட்ரோல் காரை தாராளமாக பரிசீலிக்கலாம்.

பெட்ரோல் என்ஜின் உடனான இந்த காரின் அதிகாரப்பூர்வ மைலேஜ் (Mileage) புள்ளிவிவரங்கள் இன்னும் வெளியிடப்படவில்லை என்றாலும், ஆட்டோமேட்டிக் கியர்பாக்ஸ் உடன் கார் லிட்டருக்கு 14.8 முதல் 16.3கிமீ வரை மைலேஜை வழங்கும் என எதிர்பார்க்கிறோம். இருப்பினும், நிஜ உலகில் மைலேஜ் ஆனது ஓட்டுநர் டிரைவிங் ஸ்டைல் உள்பட பல்வேறு காரணிகளை பொறுத்து மாறுபடலாம்.