மீண்டும் பாயும் மகிந்திரா-தார் எஸ்.யு.வி. அறிமுகம்

கமாண்டர் அறிமுகமாகி இப்போது பத்து வருடங்கள் ஓடி விட்டது. இதையடுத்து அடுத்து ஒரு அற்புதத்தை மகிந்திரா சாலைக்குக் கூட்டிக் கொண்டு வருகிறது. அதன் பெயர் தார். எஸ்.யு.வி. வாகனமான இது கமாண்டரின் மறு வடிவமாகும். கமாண்டரை மேலும் செதுக்கி தார் என்ற பெயரில் இறக்குகிறது மகிந்திரா.

ரூ. 7 லட்சம் என்ற விலையுடன் களமிறக்கப்படும் தார், முதலில் கேரளாவிலும், ராஜஸ்தானிலும் இந்த டிசம்பரில் அறிமுகப்படுத்தப்படுகிறது.

தற்போது தெந் ஆப்பிரிக்க சாலைகளில் தார், ரூ. 9.5 முதல் 10 லட்சம் விலையில் ஓடிக் கொண்டிருக்கிறது. தற்போது இந்தியத் தேவைகளுக்கேற்றார்பால இதை சரி செய்து அறிமுகப்படுத்துகிறது மகிந்திரா.

ஜீப் வெறியர்களுக்கேற்ற அட்டகாசமான வாகனமாக இது இருக்கும் என்று மும்பை டீலர் ஒருவர் நம்பிக்கை தெரிவிக்கிறார். மேலும், இளைஞர்களுக்கேற்ற வேகமான வண்டியாகவும் இது இருக்கும் என்கிறார் அவர்.

தார் குறித்த மேல் விவரங்கள் தெரியவில்லை. இருப்பினும் கமாண்டர் 5 ஜீப்பின் மேம்படுத்தப்பட்ட வடிவமே இது என்பது மட்டும் உறுதியாகத் தெரியவருகிறது.

2.5 லிட்டர் எரிபொருள் திறன், சிஆர்டிஐ டீசல் என்ஜின், லேட்டஸ்ட் சஸ்பென்ஷன் ஆகியவையும் இதில் இடம் பெறுகிறதாம்.

தனது கன்டிவ்லி பேக்டரியில் தார் ஜீப்பை தயாரிக்கவுள்ளது மகிந்திரா. வருடத்திற்கு இங்கு 5000 தார் வாகனங்கள் தயாரிக்கப்படும்.