ஆப்பை பிடுங்கிய நிசான்... ஏ ஸ்டார் உற்பத்தியை நிறுத்திய மாருதி!

ஏற்றுமதி மாடல்

நம் நாட்டில் ஏ ஸ்டார் விற்பனை எப்போதும் சிறப்பாக இருக்கவில்லை. ஆனால், இதுதான் மாருதியின் முக்கிய ஏற்றுமதி மாடல்களில் ஒன்றாக இருந்து வருகிறது. இந்தியாவிலிருந்து மாருதி ஏற்றுமதி செய்யும் ஏ ஸ்டார் கார் பல வெளிநாடுகளில் பிக்ஸோ என்ற பெயரிலும், ஐரோப்பிய மார்க்கெட்டுகளில் நிசான் நிறுவனம் பிக்ஸோ என்ற பெயரிலும் விற்பனை செய்து வருகிறது.

உற்பத்தி

உள்நாட்டு மார்க்கெட்டில் சராசரியாக மாதம் 500 ஏ -ஸ்டார் கார்களே விற்பனையாகி வந்தது. ஆனால், இந்த காரின் ஏற்றுமதி காரணமாகவே மாருதிக்கு பொருளாதார ரீதியில் பயன் கிடைத்து வந்தது. கடந்த மாதம் மொத்தம் 7,171 ஏ ஸ்டார் கார்கள் உற்பத்தி செய்யப்பட்டன. இதில், 6,500 கார்கள் ஏற்றுமதி செய்யப்பட்டன என்பது குறிப்பிடத்தக்கது.

நடந்தது என்ன?

ஐரோப்பிய மார்க்கெட்டுக்காக ஏ ஸ்டார் இறக்குமதியை நிசான் நிறுத்தியுள்ளதால், தற்போது அந்த காருக்கு முழுக்குப் போட வேண்டிய கட்டாயத்திற்கு மாருதி தள்ளப்பட்டுள்ளது.

மற்றொரு காரணம்

புதிய தலைமுறை ஏ ஸ்டார் காரை ஒய்எல் - 7 என்ற குறியீட்டு பெயரில் மாருதி வடிவமைத்து சோதனைகள் நடத்தி வருகிறது. இதற்காகவே, தற்போதைய ஏ ஸ்டார் உற்பத்தியை மாருதி நிறுத்துவதாகவும் கூறப்படுகிறது.

புதிய ஏ ஸ்டார்

வரும் பிப்ரவரியில் நடைபெற இருக்கும் டெல்லி ஆட்டோ எக்ஸ்போவில் புதிய தலைமுறை ஏ ஸ்டார் காரை மாருதி அறிமுகம் செய்யும் என எதிர்பார்க்கப்படுகிறது. ஏ ஸ்டார் ப்ளாப் மாடலானதற்கு அதன் டிசைனும் முக்கிய காரணம். இந்த டிசைனில் இருந்த குறைகளை களைந்து புதிய ஏ ஸ்டாரை மாருதி வடிவமைத்துள்ளதாக கூறப்படுகிறது. தவிரவும், டீசல் மாடலும் எதிர்பார்க்கப்படுகிறது.