ரூ.5.5 கோடிக்கு ஏலம் போன ஸ்பெஷல் ஃபெராரி கார்!

அமெரிக்க மண்ணில் கால் பதித்து 60 ஆண்டுகள் நிறைவு பெறுவதை கொண்டாடும் விதத்தில், ஃபெராரி கார் நிறுவனம் இரண்டு புதிய ஸ்பெஷல் எடிசன் மாடல்களை அறிமுகம் செய்துள்ளது.

ஃபெராரி எஃப்60 என்ற மாடல் லிமிடேட் எடிசனாக அறிமுகம் செய்யப்பட்டது. மொத்தம் 10 கார்கள் மட்டுமே விற்பனை செய்யப்படும் என்று அறிவிக்கப்பட்ட நிலையில், அந்த 10 கார்களுக்கும் ஒரு சில நாட்களில் முன்பதிவு முடிந்துவிட்டதாக அறிவிக்கப்பட்டது.

மற்றொன்று ஃபெராரி 458 ஸ்பெஷல் ஏ என்ற மாடல். இந்த மாடலில் 499 கார்கள் விற்பனை செய்யப்படும் என்று அறிவிக்கப்பட்டது. இந்த கார் கன்வெர்ட்டிபிள் மாடலாக வடிவமைக்கப்பட்டுள்ளது.

இந்த நிலையில், சமீபத்தில் கலிஃபோர்னியாவில் நடந்த ஃபெராரியின் 60ம் ஆண்டு கொண்டாட்ட நிகழ்ச்சியின்போது ஃபெராரி 458 ஸ்பெஷல் ஏ மாடலில் வெளியிடப்பட்ட முதல் கார் ஏலத்தில் விடப்பட்டது.

அந்த கார் ரூ.5.5 கோடிக்கு ஏலம் போனது. இந்த ஏலத் தொகை அமெரிக்காவில் செயல்பட்டு வரும் இத்தாலியை சேர்ந்த ஓர் அறக்கட்டளையின் கிளைக்கு வழங்கப்பட உள்ளது. இந்த தொகை மரபு வழியில் வரும் அரிய நோய்களுக்கான ஆராய்ச்சிக்காக செலவிடப்படும் என்று தெரிவிக்கப்பட்டுள்ளது.