இந்தியாலிருந்து லத்தீன் அமெரிக்க நாடுகளுக்கு செவர்லே பீட் கார் ஏற்றுமதி!

இந்தியாவிலிருந்து லத்தீன் அமெரிக்க நாடுகளுக்கு செவர்லே பீட் கார் ஏற்றுமதியை ஜெனரல் மோட்டார்ஸ் துவங்க இருக்கிறது. நடப்பு ஆண்டின் பிற்பாதியிலிருந்து இந்த ஏற்றுமதி துவங்கப்பட உள்ளது.

இந்தியாவில் 18 ஆண்டுகளாக வர்த்தகத்தில் ஈடுபட்டு வரும் அமெரிக்காவை சேர்ந்த ஜெனரல் மோட்டார்ஸ் தற்போது புதிய ஏற்றுமதி கொள்கைகளை வகுத்துள்ளது. இதன்படி, இந்த ஆண்டின் பிற்பகுதியிலிருந்து லத்தீன் அமெரிக்க நாடுகளில் ஒன்றான சிலிக்கு பீட் காரை ஏற்றுமதி செய்ய திட்டமிட்டுள்ளது.

வரும் அக்டோபரில் 2,000 முதல் 2,500 செவர்லே பீட் கார்களை முதல் கட்டமாக ஏற்றுமதி செய்ய உள்ளது. இதைத்தொடர்ந்து, மெக்சிகோ, பெரு, மத்திய அமெரிக்க நாடுகள் மற்றும் கரிபீயன் நாடுகளுக்கு அடுத்த ஆண்டு முதல் பீட் காரை ஏற்றுமதி செய்ய திட்டமிட்டுள்ளது.

மஹாராஷ்டிர மாநிலம், தலேகானில் உள்ள ஆலையிலிருந்து உற்பத்தி செய்யப்படும் 18 முதல் 20 சதவீத கார்களை ஏற்றுமதி செய்ய அந்த நிறுவனம் உத்தேசித்துள்ளது. அடுத்த மூன்று ஆண்டுகளில் ஆண்டுக்கு 30,000 பீட் கார்களை லத்தீன் அமெரிக்க நாடுகளுக்கு ஏற்றுமதி செய்ய ஜெனரல் மோட்டார்ஸ் திட்டமிட்டுள்ளது.