மீண்டும் இந்தியா வரும் ஹோண்டா அக்கார்டு... எதிர்பார்ப்புகள் பூர்த்தியாகுமா?

நீளம் குறைவு

விற்பனை நிறுத்தப்பட்ட மாடலைவிட புதிய அக்கார்டு காரின் நீளம் குறைவாக இருக்கும். வீல் பேஸ் குறைவாக இருக்கும் என்பதால் ஓட்டுவதற்கு எளிதாக இருக்கும். அதேவேளை, கேபினுக்குள் முந்தைய மாடலின் அளவுக்கு பயணிகளுக்கான இடவசதி இருக்கும்.

புதிய சேஸீ

உறுதிமிக்க புதிய சேஸீயை புதிய அக்கார்டு காரில் பொருத்தப்பட்டிருக்கும். தவிர, புதிய எலக்ட்ரிக் பவர் ஸ்டீயரிங்கும் அக்கார்டு காருக்கு வலு சேர்க்கும்.

பெட்ரோல் எஞ்சின்

புதிய அக்கார்டு காரின் பெட்ரோல் மாடலில் முந்தைய மாடலில் இருந்த அதே 2.4 லிட்டர் பெட்ரோல் எஞ்சின் பொருத்தப்பட்டிருக்கும். இது 177 பிஎச்பி ஆற்றலை வெளிப்படுத்தும் திறன் கொண்டதாக இருக்கும்.

டீசல் மாடலிலும்...

புதிய ஹோண்டா சிஆர்வி எஸ்யூவியில் பொருத்தப்பட்டிருக்கும் 1.6 லிட்டர் டீசல் எஞ்சினை அக்கார்டு காரிலும் பொருத்தி அறிமுகம் செய்ய ஹோண்டா முடிவு செய்துள்ளது. ஆனால், முதலில் பெட்ரோல் மாடலையும், பின்னர் டீசல் மாடலையும் அறிமுகம் செய்ய ஹோண்டா திட்டமிட்டிருக்கிறது.

எப்போது வருகிறது?

அடுத்த ஆண்டு இறுதியில் புதிய ஹோண்டா அக்கார்டு கார் இந்தியாவில் விற்பனைக்கு வர இருப்பதாக செய்திகள் தெரிவிக்கின்றன. டொயோட்டா கேம்ரி, ஸ்கோடா சூப்பர்ப் கார்களுக்கு இது போட்டியாக இருக்கும்.

டீசல் நம்பிக்கை

அமேஸ், சிட்டி கார்களின் டீசல் மாடல்கள் பெரும் வெற்றியை ருசித்து வருகின்றன. இதைத்தொடர்ந்து, அக்கார்டு காரின் டீசல் மாடலையும் மிகுந்த நம்பிக்கையுடன் ஹோண்டா களமிறக்க உள்ளது. ஆனால், இந்த செக்மென்ட்டில் டீசல் மாடலுக்கு எந்தளவு வரவேற்பு இருக்கும் என்பதை பொறுத்திருந்துதான் பார்க்க வேண்டும்.

ஹைபிரிட் மாடல்

இதனிடையே, டெல்லி ஆட்டோ எக்ஸ்போவில் வைக்கப்பட்டிருந்த ஹோண்டா அக்கார்டு ஹைபிரிட் மாடல் இந்த ஆண்டு இறுதியில் வருவதாக ஒரு தகவல் இருந்து வருகிறது. ஆனால், இந்த தகவலை ஹோண்டா கார் நிறுவனம் இன்னும் ஊர்ஜிதம் செய்யவில்லை.