அடுத்து இந்தியாவின் அதிக மைலேஜ் தரும் கார் டைட்டில் செலிரியோ டீசலுக்குத்தான்!

தயாரிப்பு நிலை மாடல்

சோதனையின்போது கேமராக் கண்களில் சிக்கிய செலிரியோ டீசல் காரின் முன்புற ஃபென்டரில் DDiS பேட்ஜ் இருந்தது. மேலும், இருக்கைகள் பிளாஸ்டிக் கவர்கள் போடப்பட்டிருந்ததால், இது தயாரிப்பு நிலை மாடலாகவே கருதப்படுகிறது. எனவே, அடுத்த சில மாதங்களுக்குள் விற்பனைக்கு கொண்டு வரப்படும் என்று ஊர்ஜிதமாகியுள்ளது.

டீசல் எஞ்சின்

இந்த காரில் மாருதி நிறுவனம் உருவாக்கியிருக்கும் 2 சிலிண்டர் கொண்ட புதிய 792சிசி டர்போ டீசல் எஞ்சின் பொருத்தப்பட்டிருக்கும். இந்த எஞ்சின் 45- 50 பிஎச்பி பவரையும், 120- 130என்எம் டார்க்கையும் அளிக்கும் என்று தெரிகிறது. இதே எஞ்சின் மாருதியின் முதல் மினி டிரக்கிலும் பொருத்தப்பட உள்ளது.

ஏஎம்டி கியர்பாக்ஸ்

புதிய செலிரியோ டீசல் மாடலில் ஏஎம்டி எனப்படும் தானியங்கி கியர்பாக்ஸ் கொண்ட மாடலிலும் அறிமுகம் செய்யப்பட உள்ளதாக தெரிவிக்கப்படுகிறது. இது உறுதியானால், மாருதியின் முதல் டீசல் ஆட்டோமேட்டிக் கார் என்ற பெருமையும் கிடைக்கும்.

மைலேஜ்

இந்த புதிய செலிரியோ டீசல் கார் லிட்டருக்கு 30 கிமீ வரை மைலேஜ் தரும் என்று ஆட்டோமொபைல் வட்டாரத் தகவல்கள் தெரிவிக்கின்றன. எனவே, அடுத்ததாக இந்தியாவின் அதிக மைலேஜ் தரும் கார் என்ற பெருமை செலிரியோவுக்கு கிடைக்கும் என்று கருதப்படுகிறது.

எதிர்பார்க்கும் விலை

ரூ.4.60 லட்சம் விலையில் மாருதி செலிரியோ டீசல் அறிமுகம் செய்யப்படும் என்று தெரிகிறது. செவர்லே பீட் டீசல் மற்றும் ஃபோர்டு ஃபிகோ டீசல் கார்களுக்கு இது போட்டியாக இருக்கும்.