விரைவில் வருகிறது மாருதி செலிரியோ டீசல்... லிட்டருக்கு 30 கிமீ மைலேஜ் தருமாம்!

சிறிய டீசல் எஞ்சின்

செலிரியோவில் புதிய 800சிசி டீசல் எஞ்சின் பொருத்தப்பட இருக்கிறது. இந்த எஞ்சினுடன் செலிரியோ அறிமுகம் செய்யப்பட்டால் இந்திய மார்க்கெட்டில் சிறிய டீசல் எஞ்சின் பொருத்தப்பட்ட கார் என்ற பெருமையை பெறும். தற்போது 1000சிசி டீசல் எஞ்சினுடன் விற்பனை செய்யப்படும் வரும் செவர்லே பீட்தான் சிறிய டீசல் எஞ்சின் காராக இருந்து வருகிறது.

டீசல் எஞ்சின்

மாருதி அறிமுகம் செய்ய இருக்கும் முதல் மினி டிரக் மற்றும் செலிரியோ காரில் இந்த புதிய 800சிசி டீசல் எஞ்சின் உயிர் கொடுக்கப் போகிறது.

மைலேஜ்

செலிரியோ காரின் டீசல் மாடல் லிட்டருக்கு 30 கிமீ மைலேஜ் தரும் வகையில் இருக்கும் என தகவல்கள் கூறுகின்றன. இதன்மூலம், இந்தியாவின் அதிக மைலேஜ் தரும் கார் என்ற பெருமையும் செலிரியோவுக்கு கிடைக்கும் என்று கூறப்படுகிறது.

எப்போது விற்பனை?

நடப்பு நிதி ஆண்டிற்குள் செலிரியோவின் டீசல் மாடல் விற்பனைக்கு கொண்டு வரப்பட உள்ளதாக தெரிவிக்கப்படுகிறது. ஏஎம்டி டிரான்ஸ்மிஷன் மாடல் மூலம் செலிரியோவின் காத்திருப்பு காலம் எகிறிக் கிடக்கும் நிலையில், லிட்டருக்கு 30 கிமீ மைலேஜ் என்ற தாரக மந்திரத்துடன் செலிரியோ வந்தால் விற்பனை எகிடுதகிடாக அதிகரிக்கும் வாய்ப்பு இருக்கிறது.

விலை

விலை நிர்ணயிப்பதில் மாருதி கைதேர்ந்த நிறுவனம். எனவே, மிகச்சவாலான விலையில் செலிரியோ டீசல் மாடலை விற்பனைக்கு கொண்டு வரப்படும் என ஆட்டோமொபைல் துறையினர் அடித்துக் கூறுகின்றனர்.

மாருதியின் அதிக மைலேஜ் கார்

தற்போது மாருதியின் அதிக மைலேஜ் தரும் கார் என்ற பெருமையை டிசையரின் டீசல் மாடல் பெற்றிருக்கிறது. இந்த கார் லிட்டருக்கு 23.4 கிமீ மைலேஜ் தருவதாக நிறுவனம் தரப்பில் தெரிவிக்கப்படுகிறது.