உருமறைக்கப்பட்டு சென்னையில் உலா வந்த மஹிந்திரா டியூவி 500 கார்

டியூவி 500 மாடலின் பேனட் வடிவமைப்பு கிட்டத்தட்ட எக்ஸ்யூவி 500 எஸ்யூவி காரைப் போலவே உள்ளது. வளைவுகள், பக்கவாட்டு டிசைன்கள் ஆகியவை அந்த இரு மாடல்களிலும் ஒத்துப் போகின்றன.

முகப்புக் கண்ணாடியை (விண்ட் ஷீல்டு) எடுத்துக் கொண்டால், மஹிந்திரா ஸைலோ மாடலின் பிரதிபலிப்பாக இருக்கிறது. எக்ஸ்யூவி 500 மாடலைப் போலவே மூன்று வரிசை இருக்கைகள் இந்த மாடலிலும் இடம்பெற்றிருப்பது பார்த்தவுடன் கண்ணுக்குப் புலப்படுகிறது.

டியூவி 500 மாடல் காரில் 2.2 லிட்டர் டீசல் எஞ்சின் பொருத்த வாய்ப்புள்ளது. அந்த வகை எஞ்சின்கள் 140 பிஎச்பி மற்றும் 330 என்எம் டார்க் வெளியேற்றும் திறன் கொண்டவை. 6 கியர்களும். ஆட்டோமேடிக் கியர் ஆப்ஷனும் இந்த மாடலில் கொடுக்கப்படலாம்.

இல்லையெனில், மேலும், டெல்லியில் விதிக்கப்பட்ட தடையின் காரணமாக, மஹிந்திரா அறிமுகம் செய்த புதிய 1.99 லிட்டர் டீசல் எஞ்சின் கொண்ட மாடலிலும் வரும் வாய்ப்புள்ளது. இந்த எஞ்சின் 140 பிஎச்பி பவரையும் மற்றும் 320 என்எம் டார்க்கையும் வெளிப்படுத்தும் திறன் கொண்டது.

அடுத்த ஆண்டு இந்த புதிய எம்பிவி கார் மார்க்கெட்டில் விற்பனைக்கு அறிமுகம் செய்யப்பட இருப்பதாக மஹிந்திரா வட்டாரத் தகவல்கள் தெரிவிக்கின்றன.

எதிர்பார்க்கும் விலை

பெரும் வரவேற்பை பெற்றிருக்கும் புதிய டொயோட்டா இன்னோவா க்ரிஸ்ட்டா காரைவிட சற்று குறைவான விலையில் நிலைநிறுத்தப்படும். இருப்பினும், இன்னோவா மோகத்தை இந்த கார் குறைக்குமா என்பதை பொறுத்திருந்து பார்க்கலாம்.