ஜிஎஸ்டிக்கு பிறகு மாருதியின் எந்தெந்த கார் மாடல் எவ்வளவு விலை குறையப்போகிறது?

ஆட்டோமொபைல் துறையில் இஞ்சின் அளவைப் பொருத்து விலை ஏற்றம் - இறக்கம் அமையப்போகிறது.

ஜிஎஸ்டியை பொருத்த வரையில் அனைத்து ரக பயணியர் வாகனங்களுக்கும் 28% என்ற நிலையான வரி விதிக்கப்பட உள்ளது.

இதில் 1,200சிசிக்கு குறைவாக இஞ்சின்கள் கொண்ட பெட்ரோல் கார்களுக்கு 1% வரி குறைக்கப்பட்டுள்ளது.

இதே போல 1,500சிசிக்கு குறைவான இஞ்சின் திறன் கொண்ட டீசல் கார்களின் மீதான வரி 3 % குறைக்கப்பட்டுள்ளது.

பெரிய எஸ்யூவிக்கள் மற்றும் சொகுசுக் கார்களின் மீதான வரி 15% குறைக்கப்பட்டுள்ளது.

இந்நிலையில், நாட்டின் முதன்மை கார் தயாரிப்பு நிறுவனமான மாருதி சுசுகியின் மாடல்களின் ஜிஎஸ்டிக்கு பிந்தைய விலைப்பட்டியலை வாடிக்கையாளர்கள் உற்று நோக்கியபடி உள்ளனர்.

ஜிஎஸ்டியின் மூலம் அதிகமான நடுத்தர மாடல் கார்களை கொண்டிருக்கும் மாருதி நிறுவனத்தின் பெரும்பான்மையான மாடல்கள் விலை குறைய உள்ளது.

மிட்-சைஸ் செடன், எஸ்யூவி மற்றும் கிராஸோவர் மாடல்கள் மீது குறைவான வரி விதிக்கப்படுவதால் இந்த ரக கார்கள் விலை அதிகமாக குறைய உள்ளது. இதன்படி ரூ.8.79 லட்சம் விலை கொண்ட மாருதி சுசுகியின் எஸ்-கிராஸ் மாடலின் விலையில் ரூ. 70,000 குறையப்போகிறது.

இதே போல மாருதியின் சிறந்த விற்பனையாகும் ஹேட்ச்பேக் மாடல்களான ஆல்டோ, வேகன்-ஆர், செலிரியோ மற்றும் ஸ்பிஃப்ட் கார்களின் விலையில் 25,000 முதல் 35,000 குறைய உள்ளது.

அதிகம் விற்பனையாகும் மாடல்களின் விலை மேலும் குறைய உள்ளதால், அது மாருதி நிறுவனத்திற்கு சாதகமாகவே அமையப்போகிறது. இது விற்பனையை மேலும் உயர்த்த உதவும்.

ஹைபிரிட் கார்களை பொருத்த வரையில் 12 சதவீதமாக இருக்கும் தற்போதைய வரி ஜிஎஸ்டியில் 43 சதவீதமாக உயர உள்ளது. இதன் காரணமாக ஜிஎஸ்டிக்கு பிறகு ஹைபிரிட் கார்களின் விலை பெருமளவில் உயர உள்ளது.

‘ஸ்மார்ட் ஹைபிரிட் வெஹிகிள் சிஸ்டம்' எனப்படும் முழுஅளவு இல்லாத ஹைபிரிட் கார் தொழில்நுட்பம் கொண்ட சியாஸ் மற்றும் எர்டிகா கார்களை மாருதி நிறுவனம் சந்தைப்படுத்தியுள்ளது.

எனவே ஜிஎஸ்டிக்கு பிறகு ஸ்மார்ட் ஹைபிரிட் சிஸ்டம் கொண்ட சியாஸ் மற்றும் எர்டிகா டீசல் கார்கள் விலை அதிகபட்சமாக ரூ.1.5 லட்சம் வரை விலை ஏறப்போகிறது.

எனினும் வருங்காலத்தில் சியாஸ் மற்றும் எர்டிகா கார்களில் உள்ள ஸ்மார்ட் ஹைபிரிட் தொழில்நுட்பத்திற்கு பதிலாக சாதாரண டீசல் கார்களாக மாருதி நிறுவனம் மாற்றக்கூடும் என எதிர்பார்க்கப்படுகிறது.

இதே போல மாருதி நிறுவனத்தின் மற்றொரு சிறந்த மாடலான பிரேஸ்ஸா கார்களின் விலையும் 3.5 சதவீதம் அதிகரிக்கப்பட உள்ளது.

ஜிஎஸ்டி நடைமுறைப்படுத்தப்படுவதால் மாருதி நிறுவனம் பெரிய அளவுக்கு பாதிப்பை சந்திக்கப் போவதில்லை. மாறாக இது அந்நிறுவனத்தின் விற்பனையை அதிகரிக்கச்செய்து, சாதக அம்சமாகவே அமையவே போகிறது என்பதே இத்துறை வல்லுநர்களின் கருத்தாக உள்ளது.