மஹிந்திரா எக்ஸ்யூவி500 எஸ்யூவியின் பெட்ரோல் மாடல் வெளியீடு: விபரம்

தனது ஐக்கிய அமீரக இணையதளத்தில், புதிய மஹிந்திரா எக்ஸ்யூவி500 காரின் பெட்ரோல் மாடலை விற்பனை பட்டியலில் இணைத்துள்ளது மஹிந்திரா நிறுவனம். அங்கு விற்பனைக்கு செல்ல இருக்கும் இந்த புதிய மாடல் விரைவில் இந்தியாவிலும் விற்பனைக்கு அறிமுகம் செய்யப்பட இருக்கிறது.

இந்தியாவில் மஹிந்திரா எக்ஸ்யூவி500 எஸ்யூவி 2.2 லிட்டர் எம்-ஹாக் டீசல் எஞ்சினுடன் விற்பனை செய்யப்படுகிறது. அதிகபட்சமாக 140 பிஎச்பி பவரையும், 330 என்எம் டார்க் திறனையும் வழங்க வல்லது இந்த டீசல் எஞ்சின். 6 ஸ்பீடு மேனுவல் அல்லது 6 ஸ்பீடு ஆட்டோமேட்டிக் கியர்பாக்ஸ் ஆப்ஷனில் கிடைத்து வருகிறது.

இந்த நிலையில், ஐக்கிய அமீரகத்தில் விற்பனைக்கு வர இருக்கும், மஹிந்திரா எக்ஸ்யூவி500 எஸ்யூவியில் 2.2 லிட்டர் டர்போசார்ஜ்டு பெட்ரோல் எஞ்சின் பொருத்தப்பட்டு இருக்கும் என்பது தெரிய வந்துள்ளது. இந்த எஞ்சின் அதிகபட்சமாக 140 பிஎச்பி பவரையும், 330 என்எம் டார்க் திறனையும் வழங்கும் என்று எதிர்பார்க்கப்படுகிறது.

அங்கு வெளியிடப்பட்டு இருக்கும் விபரங்களின்படி, மஹிந்திரா எக்ஸ்யூவி500 எஸ்யூவியின் பெட்ரோல் மாடல் ஆட்டோமேட்டிக் கியர்பாக்ஸ் மற்றும் ஆல் வீல் டிரைவ் சிஸ்டம் கொண்டதாக இருக்கும். இதுதவிர, டிசைனில் மாற்றங்கள் எதுவும் இருக்காது.

Recommended Video

[Tamil] Jeep Compass Launched In India - DriveSpark

மஹிந்திரா எக்ஸ்யூவி500 எஸ்யூவியின் டீசல் வேரியண்ட்டுகள் W என்ற வரிசையில் விற்பனை செய்யப்படுகிறது. பெட்ரோல் வேரியண்ட்டுகள் G வரிசையில் விற்பனைக்கு வரும். மற்றபடி, இந்தியாவில் விற்பனைக்கு வர இருக்கும் பெட்ரோல் மாடலிலும் வித்தியாசங்கள் இருக்காது.

டெல்லி உள்பட வட மத்திய பகுதிகளில் உள்ள மாநிலங்களில் காற்று மாசு அதிகரித்து வருவதால், டீசல் கார்களுக்கு கடுமையான விதிகள் அமல் செய்யப்பட்டு வருகின்றன. எனவே, வர்த்தகத்தை காப்பாற்றுவதற்காக, மஹிந்திரா நிறுவனம் தனது அனைத்து மாடல்களிலுமே பெட்ரோல் எஞ்சின் ஆப்ஷன்களை வழங்க முடிவு செய்துள்ளது குறிப்பிடத்தக்கது.