வருகிறது செக்ஸியான மாருதி செலிரியோ எக்ஸ்: விபரம்!

கடந்த ஆண்டு நொய்டாவில் நடந்த சர்வதேச ஆட்டோமொபைல் கண்காட்சியில் செலிரியோ எக்ஸ் மாடல் காட்சிக்கு வைக்கப்பட்டு இருந்தது. இந்த நிலையில், டாடா டியாகோ காரால் ஏற்பட்டிருக்கும் நெருக்கடியை போக்கும் விதமாக, இந்த புதிய மாடலை மாருதி களமிறக்க உள்ளது.

மாருதி செலிரியோ எக்ஸ் என்ற பெயரில் இந்த புதிய மாடல் விற்பனைக்கு வர இருக்கிறது. அண்மையில் விளம்பர படப்பிடிப்பின்போது இந்த கார் பத்திரிக்கையாளர்களின் கண்களில் சிக்கியது. கூடுதல் ஆக்சஸெரீகளுடன் இந்த கார் இளைய சமுதாய வாடிக்கையாளர்களை கவரும் வகையில் மாற்றங்கள் செய்யப்பட்டுள்ளன.

எஸ்யூவி கார்களை போன்ற தோற்றத்திற்கு உருமாற்றும் வகையில் பல கூடுதல் ஆக்சஸெரீகள் பயன்படுத்தப்பட்டுள்ளன. புதிய கருப்பு அலாய் வீல்கள், கருப்பு பாடி கிளாடிங் சட்டங்கள், ரூஃப் ரெயில்கள், ஸ்கிட் பிளேட்டுகள் பொருத்தப்பட்டு இருக்கின்றன.

உட்புறத்திலும் கவர்ச்சிகரமான இன்டீரியர் வேலைப்பாடுகளுடன் வரும் என்று தகவல்கள் தெரிவிக்கின்றன. இந்த காரில் ஸ்மார்ட்ப்ளே இன்ஃபோடெயின்மென்ட் சிஸ்டம் கொடுக்கப்பட்டு இருக்கும்.

புதிய செலிரியோ எக்ஸ் மாடலானது விஎக்ஸ்ஐ, விஎக்ஸ்ஐ ஆப்ஷனல் பேக், இசட்எக்ஸ்ஐ மற்றும் இசட்எக்ஸ்ஐ ஆப்ஷனல் பேக் ஆகிய வேரியண்ட்டுகளில் கிடைக்கும். மேனுவல் மற்றும் ஏஎம்டி கியர்பாக்ஸ் மாடல்களிலும் இந்த செலிரியோ எக்ஸ் விற்பனைக்கு வரும் என்று தெரிகிறது.

மாருதி செலிரியோ எக்ஸ் காரின் தரை இடைவெளி அளவு அதிகரிக்கப்பட்டிருக்கிறதா? சஸ்பென்ஷனில் மாற்றம் செய்யப்பட்டிருக்கிறதா என்பது குறித்த தகவல் இதுவரை இல்லை.

எஞ்சினிலும் மாற்றம் இருக்காது என்றே கருதப்படுகிறு. தற்போது பயன்படுத்தப்படும் 1.0 லிட்டர் கே10பி பெட்ரோல் எஞ்சினுடன் புதிய செலிரியோ எக்ஸ் மாடல் விற்பனைக்கு வரும். அதிகபட்சமாக இந்த எஞ்சின் 67 பிஎச்பி பவரையும், 90 என்எம் டார்க் திறனையும் வழங்கும்.

சாதாரண செலிரியோ கார் வேரியண்ட்டுகளைவிட ரூ.20,000 வரை கூடுதல் விலையில் விற்பனைக்கு அறிமுகம் செய்யப்படும் என்பது கணிப்பு. அடுத்த சில நாட்களில் இந்த கார் குறித்து மேலும் பல புதிய தகவல்கள் வெளியாகும் என்று தெரிகிறது.