சென்னையில் மெர்சிடிஸ் பென்ஸ் ஏஎம்ஜி பிராண்டுக்கான பிரத்யேக விற்பனை நிலையம்!

மெர்சிடிஸ் பென்ஸ் நிறுவனம் தனது பெர்ஃபார்மென்ஸ் கார்களை ஏஎம்ஜி என்ற பிரத்யேக பிராண்டில் விற்பனை செய்வது அறிந்ததே. இந்த பிராண்டில் விற்பனை செய்யப்படும் கார்களுக்காக விசேஷ விற்பனையகங்களை மெர்சிடிஸ் பென்ஸ் நடத்தி வருகிறது.

உலக அளவில் இதுபோன்று 400 ஏஎம்ஜி பிராண்டு கார்களுக்கான பிரத்யேக விற்பனையகங்கள் உள்ளன. இந்த நிலையில், தற்போது சென்னை மற்றும் கொச்சி நகரங்களிலும் ஏஎம்ஜி பெர்ஃபார்மென்ஸ் சென்டர்கள் திறக்கப்பட்டு இருக்கின்றன.

சென்னையில் டிரான்ஸ்கார் இந்தியா என்ற பெயரிலும், கொச்சியில் ராஜஸ்ரீ மோட்டார்ஸ் என்ற பெயரிலும் இந்த புதிய விற்பனையகங்கள் திறக்கப்பட்டு இருக்கின்றன.

இந்த விற்பனையகங்களில் ஏஎம்ஜி பிராண்டில் இந்தியாவில் விற்பனை செய்யப்படும் அனைத்து கார்களும் பார்வைக்கு வைக்கப்பட்டுள்ளன. கார்களுக்கான ஆக்சஸெரீஸ்களும் இங்கே கஸ்டமைஸ் செய்து வாங்க முடியும். அதேபோன்று, கார்களை டெஸ்ட் டிரைவ் செய்து பார்ப்பதற்கான வசதியும் இங்கு உண்டு.

இந்த பிரத்யேக விற்பனையகங்கள் மெர்சிடிஸ் பென்ஸ் ஏஎம்ஜி பிராண்டுக்கான கொள்கையின் அடிப்படையில் வடிவமைப்பு மற்றும் கட்டமைப்பு வசதிகளை பெற்றிருக்கும்.

எனவே, இந்த புதிய விற்பனையகங்கள் சென்னை மற்றும் கொச்சி நகரத்தில் ஏஎம்ஜி கார்களை வாங்க விரும்புவோருக்கு திருப்தியான அனுபவத்தை வழங்கும் என்று மெர்சிடிஸ் பென்ஸ் தெரிவித்துள்ளது.

மேலும், ஏஎம்ஜி பிராண்டு கார்களின் விற்பனை குறிப்பிடத்தக்க வளர்ச்சியை பெறுவதற்கும் இந்த விற்பனையகங்கள் நிச்சயம் பெரிய அளவில் உறுதுணையாக இருக்கும் என்றும் மெர்சிடிஸ் பென்ஸ் தெரிவித்துள்ளது.