புதிய தலைமுறை ஹூண்டாய் 2017 சொனாட்டா கார் அறிமுகம்

மிட் சைஸ் செடன் காரான சொனாடா, ஹுண்டாய் நிறுவனத்தின் வெற்றிகரமான மாடலாக நீண்ட காலமாக திகழ்ந்து வருகிறது. விற்பனையில் பெரிய அளவில் ஜொலிக்கவில்லை என்றாலும், தோற்றத்தில் இவை கவர்ந்து இழுப்பதால் இதற்கென ரசிகர் வட்டம் இந்தியாவில் உள்ளது.

ஹூண்டாய் நிறுவனத்தின் சமீபத்திய டிசைன் தொலில்நுட்பம் கொண்டு அடுத்த தலைமுறை சொனாட்டா கார் வடிவமைக்கப்பட்டுள்ளது. தற்போதைய சொனாடாவை விடவும் இது பார்வைக்கு கவர்ச்சிகரமாக உள்ளது. விற்பனையில் சிறந்து விளங்கும் வகையிலான மாற்றங்கள் கண்டுள்ளது புதிய சொனாட்டா கார்.

புதிய தலைமுறை சொனாடாவில் அறுகோண வடிவ கிரில், பகல் நேரத்தில் எரியும் வகையிலான முகப்பு விளக்குகள், மேம்படுத்தப்பட்ட புதிய முன்புற மற்றும் பின்புற பம்பர்கள், எல்ஈடி பின்புற விளக்குகள் ஆகியவை வெளிப்புற தோற்றத்தில் உள்ள புதிய மாற்றங்களாகும்.

இதன் உட்புறத்தில் புதிய ஏர்கண்டிஷன் சிஸ்டம், வெண்டிலேஷன் சிஸ்டம், ஆடியோ மற்றும் ஹீட்டிங் கண்ட்ரோல்கள், 7 இஞ்ச் டச் ஸ்கிரீன் சிஸ்டம் ஆகியவை உள்ளன. மேலும், 8 இஞ்ச் டிஸ்பிளே ஆஃப்ஷனலாகவும் கிடைக்கிறது.

பாதுகாப்பு அம்சங்கள் நிறைந்ததாக சொனாட்டா கார் உருவாக்கப்பட்டுள்ளது. இதில் லேன் மாறினால் எச்சரிக்கும் ‘லேன் கீப் அஸிஸ்ட்', ஓட்டுநருக்கு மிகவும் தேவையான ‘பிளைண்ட் ஸ்பாட் டிடக்‌ஷன்', ரியர் - கிராஸ் டிராஃபிக் அலர்ட், ஹை பீம் அசிஸ்ட், டைனமிக் பெண்டிங் லைட்ஸ் ஆகிய பாதுகாப்பு தொழில்நுட்பங்கள் இதில் உள்ளன.

இந்த புதிய சொனாடாவில் நான்கு வகையான இஞ்சின்கள் உள்ளன. அதிகபட்சமாக 139 பிஹச்பி ஆற்றலை வெளிப்படுத்தக்கூடிய 1.7 லிட்டர் விஜிடி இஞ்சின், அதிகபட்சமாக 177 பிஹச்பி ஆற்றலை வெளிப்படுத்தக்கூடிய 1.6 லிட்டர் டி-ஜிடிஐ இஞ்சின்.

மேலும், அதிகபட்சமாக 160 பிஹச்பி ஆற்றலை வெளிப்படுத்தக்கூடிய 2.0 லிட்டர் இஞ்சின் மற்றும் அதிகபட்சமாக 241 பிஹச்பி ஆற்றலை வெளிப்படுத்தக்கூடிய 2.0 லிட்டர் டர்போசார்ஜ்டு இஞ்சின் ஆகியவை உள்ளது.

இந்த 8வது தலைமுறை சொனாட்டா கார், இந்தியாவில் அடுத்த ஆண்டு அறிமுகப்படுத்தப்படும் என்று தெரியவருகிறது. ஆயினும், எந்த வகையிலான இஞ்சின் இதில் கொடுக்கப்படும் என்பதை பொருத்திருந்து தான் பார்க்க வேண்டும்.