வெறும் 70 ரூபாய் செலவில் 200 கிமீ தூரம் பயணிக்கும் வாயுவில் இயங்கும் டாடா கார்!

மாற்று எரிபொருள் கார் என்றாலே பேட்டரியில் இயங்கும் மின்சார கார்கள்தான் சிறப்பான சாய்ஸாக இருக்கிறது. ஆனால், அதையும் தாண்டி வாயுவில் இயங்கும் கார் மாடலை உருவாக்கும் முயற்சியில் டாடா மோட்டார்ஸ் பல ஆண்டுகளாக ஈடுபட்டுள்ளது.

பிரான்ஸ் நாட்டை சேர்ந்த மோட்டார் டெவலப்மென்ட் இன்டர்நேஷனல் என்ற நிறுவனத்தின் கூட்டணியில் இந்த காரை உருவாக்கி வருகிறது டாடா மோட்டார்ஸ். ஏர்பாட் என்று குறிப்பிடப்படும் இந்த காரை வர்த்தக ரீதியில் விற்பனைக்கு கொண்டு வருவதற்கான முயற்சிகளில் டாடா மோட்டார்ஸ் தீவிரம் காட்டி வருகிறது.

சில ஆண்டுகளுக்கு முன் இந்த காரின் முதல்கட்ட சோதனைகள் வெற்றிகரமாக முடிந்துவிட்டதாக தகவல் வெளியிடப்பட்டதுடன், இந்த காரை மேம்படுத்தும் இரண்டாவது கட்ட பணிகளும் துவங்கிவிட்டதாக தெரிவிக்கப்பட்டது.

இந்த நிலையில், டாடா ஏர்பாட் கார் குறித்த புதிய தகவல்கள் இப்போது வெளியாகி உள்ளன. அழுத்தப்பட்ட வாயுவை எரிபொருளாக கொண்டு இயங்கும் இந்த கார் இன்னும் மூன்று ஆண்டுகளில் சந்தைக்கு கொண்டு வரப்பட உள்ளது என்பதே புதிய தகவல்.

அடுத்த சில ஆண்டுகளில் பெட்ரோல், டீசல் கார்களுக்கு மாற்று தேடும்போது இந்த கார் மிகச் சரியான தேர்வாக அமையும் வாய்ப்பு இருக்கிறது. ஏனெனில், இந்த கார் வெறும 70 ரூபாய் எரிபொருள் செலவில் 200 கிமீ தூரம் வரை செல்லும். அதுவும் சுற்றுச்சூழலுக்கு தீங்கு இழைக்காமல் செல்லும்.

இந்த கார் இலகு எடையும், அதிக உறுதித்தன்மையும் வாய்ந்த அலுமினிய பாகங்களை கொண்ட கட்டமைப்பில் உருவாக்கப்படுகிறது. 907 கிலோ மட்டுமே எடை கொண்டதாக இருக்கும். எனவே, அதிக எரிபொருள் சிக்கனத்தை தரும்.

இந்த காரில் 4 பேர் செல்வதற்கான இருக்கை வசதி இருக்கும். அதிகபட்சமாக மணிக்கு 65 கிமீ வேகத்தில் செல்லும். எனவே, முழுக்க முழுக்க இது நகர்ப்புற பயன்பாட்டுக்கான மாடலாக இருக்கும்.