11 வேரியண்ட்டுகள், 7 வண்ணங்களில் வருகிறது புதிய மாருதி சியாஸ்!

வடிவமைப்பில் சிறிய மாறுதல்களுடன் கூடுதல் சிறப்பம்சங்கள் கொண்ட புதிய மாருதி சியாஸ் கார் வரும் 20ந் தேதி அறிமுகம் செய்யப்பட இருக்கிறது. இந்த புதிய மாடல் குறித்த ஸ்பை படங்களும், புதிய புதிய தகவல்களும் வெளி வந்த வண்ணம் உள்ளன.

தற்போது வெளிவந்துள்ள தகவல்களின்படி, புதிய மாருதி சியாஸ் கார் 11 வேரியண்ட்டுகளில், 7 புதிய வண்ணங்களில் வர இருக்கிறது. பெட்ரோல் எஞ்சின் மற்றும் மேனுவல் கியர்பாக்ஸ் மாடலானது சிக்மா, டெல்ட்டா, ஸீட்டா மற்றும் ஆல்ஃபா ஆகிய வேரியண்ட்டுகளில் கிடைக்கும். பெட்ரோல் ஆட்டோமேட்டிக் மாடல் டெல்ட்டா, ஸீட்டா மற்றும் ஆல்ஃபா மாடல்களில் கிடைக்கும்.

டீசல் எஞ்சின் மற்றும் மேனுவல் கியர்பாக்ஸ் மாடலானது சிக்மா, டெல்ட்டா, ஸீட்டா மற்றும் ஆல்ஃபா வேரியண்ட்டுகளில் கிடைக்கும். டீசல் மாடலில் ஆட்டோமேட்டிக் ஆப்ஷன் இல்லை.

எல்இடி ஹெட்லைட், எல்இடி பகல்நேர விளக்குகள், புதிய ரேடியேட்டர் க்ரில் அமைப்பு கொடுக்கப்பட்டுள்ளது. புதிய அலாய் வீல்கள் மற்றும் புதிய எல்இடி டெயில் லைட்டுகள் கொடுக்கப்பட்டு இருக்கின்றன. ஏராளமான க்ரோம் பாகங்கள் கொண்ட அலங்காரமும் செய்யப்பட்டுள்ளன.

புதிய மாருதி சியாஸ் கார் நெக்ஸா புளூ, மெட்டாலிக் பிரிமியம் சில்வர், பியர்ல் மிட்நைட் பிளாக், மெட்டாலிக் மேக்மா க்ரே, பியர்ல் மெட்டாலிக் டிக்னிட்டி பிரவுன், பியர்ல் சங்கிரியா ரெட் மற்றும் பியர்ல் ஸ்னோ ஒயிட் ஆகிய 7 வண்ணங்களில் கிடைக்கும்.

உட்புறத்தில் மர அலங்கார வேலைப்பாடுகள், புதிய இன்ஸ்ட்ரூமென்ட் க்ளஸ்ட்டர், வண்ண திரையுடன் கூடிய மல்டி ஃபங்ஷன் திரை, அட்ஜெஸ்ட்டபிள் ஹெட்ரெஸ்ட், க்ரூஸ் கன்ட்ரோல், சுஸுகி கனெக்ட் மொபைல் அப்ளிகேஷன் உள்ளிட்ட வசதிகள் இடம்பெறுகிறது.

புதிய மாருதி சியாஸ் காரில் கொடுக்கப்பட இருக்கும் 1.5 லிட்டர் பெட்ரோல் எஞ்சின் அதிகபட்சமாக 104.7 பிஎச்பி பவரையும், 138 என்எம் டார்க் திறனையும் வழங்கும். இந்த மாடல் மேனுவல் மற்றும் ஆட்டோமேட்டிக் மாடலில் கிடைக்கும். பெட்ரோல் மாடல் லிட்டருக்கு 21.56 கிமீ மைலேஜையும், ஆட்டோமேட்டிக் மாடல் லிட்டருக்கு 20.38 கிமீ மைலேஜையும் தரும் என்று தகவல்கள் தெரிவிக்கின்றன.

டீசல் மாடலில் இருக்கும் 1.3 லிட்டர் எஞ்சின் அதிகபட்சமாக 89 பிஎச்பி பவரையும், 200 என்எம் டார்க் திறனையும் வழங்கும். மேனுவல் கியர்பாக்ஸ் மாடலில் மட்டுமே கிடைக்கும். பெட்ரோல் மற்றும் டீசல் மாடல்கள் ஹைப்ரிட் தொழில்நுட்பத்துடன் வர இருப்பதும் குறிப்பிடத்தக்க விஷயமாக கூறலாம்.

புதிய மாருதி சியாஸ் காரின் விலை, தொழில்நுட்ப விபரங்கள் வரும் 20ந் தேதி வெளியிடப்படும் என்று எதிர்பார்க்கப்படுகிறது. புதிய மாருதி சியாஸ் கார் குறித்த அப்டேட்டுகளை தெரிந்து கொள்வதற்கு தொடர்ந்து டிரைவ்ஸ்பார்க் தமிழ் தளத்துடன் தொடர்பில் இருங்கள்.