இந்திய ஆட்டோமொபைல் துறை வரலாற்றில் புதிய சரித்திரத்தை நிகழ்த்தியது மாருதி சுஸுகி டிசையர்..

மூன்றாவது தலைமுறை மாருதி சுஸுகி டிசையர் கார் கடந்த 2017ம் ஆண்டு மே மாதம் விற்பனைக்கு அறிமுகம் செய்யப்பட்டது. லான்ச் ஆனது முதலே, மாருதி சுஸுகி டிசையர் கார் மிக அதிகளவில் விற்பனையாகி வருகிறது.

இதன்மூலம் அதிகம் விற்பனையாகும் கார்களின் பட்டியலில் மாருதி சுஸுகி டிசையர் வெகு விரைவிலேயே முதல் இடத்தை பிடித்தது. இந்தியாவில் அதிகம் விற்பனையாகும் கார்களின் பட்டியலில் முதல் முறையாக முதல் இடத்தை பிடித்த செடான் வகை கார் என்றால், அது மாருதி சுஸுகி டிசையர்தான்.

அத்துடன் முதல் இடத்தை நீண்ட காலம் தக்க வைத்து கொண்ட செடான் வகை கார் என்ற பெருமையும் மாருதி சுஸுகி டிசையருக்கு உள்ளது. இந்த சூழலில் மாருதி சுஸுகி டிசையர் கார் தற்போது புதிய சாதனை ஒன்றை படைத்துள்ளது.

3 லட்சம் டிசையர் கார்கள் விற்பனை என்பதுதான் அந்த புதிய சாதனை. வெறும் 17 மாதங்களில் 3 லட்சம் டிசையர் கார்களை மாருதி சுஸுகி நிறுவனம் விற்பனை செய்துள்ளது. இந்திய ஆட்டோமொபைல் துறை வரலாற்றிலேயே 3 லட்சம் என்ற மைல்கல்லை மிக வேகமாக எட்டிய கார் மாருதி சுஸுகி டிசையர்தான்.

லான்ச் ஆனது முதல் சராசரியாக ஒரு மாதத்திற்கு 17 ஆயிரத்துக்கும் மேற்பட்ட டிசையர் கார்களை மாருதி சுஸுகி நிறுவனம் விற்பனை செய்துள்ளது. இந்த சாதனையை படைக்க உதவிய வாடிக்கையாளர்களுக்கு மாருதி சுஸுகி நிறுவனம் நன்றி தெரிவித்து கொண்டுள்ளது.

டிசையர் காரின் டாப் வேரியண்டை 25 சதவீத வாடிக்கையாளர்கள் தேர்வு செய்வதாக மாருதி சுஸுகி நிறுவனம் தெரிவித்துள்ளது. அதே நேரத்தில் டிசையர் காரின் ஆட்டோமெட்டிக் வேரியண்ட்டை ஏறத்தாழ 20 சதவீத வாடிக்கையாளர்கள் தேர்வு செய்கின்றனர்.

மாருதி சுஸுகி டிசையர் காரில், 1.2 லிட்டர் 4 சிலிண்டர் பெட்ரோல் இன்ஜின் பொருத்தப்பட்டுள்ளது. இந்த இன்ஜின் அதிகபட்சமாக 82 பிஎச்பி பவர் மற்றும் 113 என்எம் டார்க் திறனை வெளிப்படுத்தக்கூடிய சக்தி வாய்ந்தது.

அதே நேரத்தில் டிசையர் காரின் டீசல் வேரியண்ட்களில், 1.3 லிட்டர் மல்டிஜெட் இன்ஜின் பொருத்தப்பட்டுள்ளது. இந்த இன்ஜின் அதிகபட்சமாக 74 பிஎச்பி பவர் மற்றும் 190 என்எம் டார்க் திறனை உருவாக்கும் வல்லமை வாய்ந்தது.

இதில், பெட்ரோல் இன்ஜின் அதிகபட்சமாக ஒரு லிட்டருக்கு 22 கிலோ மீட்டர் மைலேஜை வழங்கும். அதே நேரத்தில் மாருதி சுஸுகி டிசையர் காரின் டீசல் வெர்ஷன்கள் அதிகபட்சமாக ஒரு லிட்டருக்கு 28.4 கிலோ மீட்டர் மைலேஜை வழங்குகின்றன.

இந்திய மார்க்கெட்டில் ஃபோர்டு ஆஸ்பயர், ஹூண்டாய் எக்ஸ்சென்ட் மற்றும் ஃபோக்ஸ்வேகன் அமியோ உள்ளிட்ட கார்களுக்கு மாருதி சுஸுகி டிசையர் கடுமையான போட்டியை வழங்கி வருகிறது.