இந்தியாவில் பிஎஸ் 6 எஞ்சின் விதிக்கு மாறும் புதிய மாருதி ஆல்டோ கார்: முழு தகவல்கள்..!!

பிஎஸ்4 கொள்கையில் இயங்கும் 800 சிசி மற்றும் 1000 சிசி எஞ்சின்களில் வெளிவரும் இந்த கார், இந்தியாவின் ஹேட்ச்பேக் கார் சந்தையில் முன்னணியில் உள்ளது.

வாகன எஞ்சின்கள் பிஎஸ் 6 விதியின் கீழ் இயங்கும் புதிய உத்தரவை மத்தியரசு பிறப்பித்துள்ளது. இதற்கு 2020ம் ஆண்டு வரை காலக்கெடு நிர்ணயிக்கப்பட்டுள்ளது.

தற்போது காலக்கெடு நெருங்கி வருவதால், மாருதி சுஸுகி ஆல்டோ காரில் பிஎஸ்6 விதியின் கீழ் இயங்கும் எஞ்சினை பொருத்துவதற்கான பணியை மேற்கொண்டு வருகிறது.

இதுப்பற்றி டைம்ஸ் ஆஃப் இந்தியா 2020 ஏப்ரல் முதல் பிஎஸ் 6 எஞ்சின் பெற்ற ஆல்டோ கார்கள் விற்பனைக்கு வரும் என மாருதி சுஸுகியின் மூத்த நிர்வாக அதிகாரி ஆர்.எஸ். கால்சி கூறியுள்ளதாக செய்தி வெளியிட்டுள்ளது.

ஆல்டோவின் 800சிசி மற்றும் 1000சிசி திறன் பெற்ற பெட்ரோல் எஞ்சின்கள் பிஎஸ் 6 விதியில் இயங்கும். இதன் காரணமாக கார்பன் நைட்ரஸ் ஆக்சைடு நச்சுவாயு வெளியேறும் அளவும் மேலும் குறையும்.

ஆல்டோ காரில் பிஎஸ் 6 எஞ்சின் பொருத்தப்பட்ட பிறகு, மாருதி சுஸுகி தனது அனைத்து மாடல் கார்களிலும் பிஎஸ் 6 எஞ்சின் விதியை அமல்படுத்தும் முயற்சியில் ஈடுபடும் என தெரிகிறது.

தவிர தற்போது விற்பனையாகும் விலையிலிருந்து பிஎஸ் 6 விதியின் கீழ் இயங்கும் புதிய ஆல்டோ கார்களின் விலை ரூ. 10, 000 முதல் ரூ. 20,000 வரை அதிகரிக்க வாய்ப்புள்ளது.

இந்தியாவில் விற்பனையாகும் மாருதி சுஸுகி ஆல்டோ கார்கள் ரூ. 2.51 லட்சம் ஆரம்ப விலையில் தொடங்கி ரூ. 4.19 லட்சம் வரை விற்பனையில் உள்ளது. இங்கு விலை அனைத்தும் டெல்லி எக்ஸ்-ஷோரூம் மதிப்பில் கொடுக்கப்பட்டுள்ளது.

தொடர்ந்து டைம்ஸ் ஆஃப் இந்தியாவிற்கு மாருதி சுஸுகி நிர்வாகி ஆர்.எஸ். கல்சி தெரிவித்துள்ள தகவலில் ஆல்டோ காரில் மின்சார திறன் பெற்ற மாடல் வெளிவராது என தெரிவித்துள்ளார்.

ஆல்டோ காரை மின்சார ஆற்றலில் தயாரிக்கும் போது, அதனுடைய மொத்த கட்டமைப்புமே புதுமையாக மாற்றவேண்டும். இதற்கென மாருதி சுஸுகி பெரிய தொகையை ஒதுக்க நேரிடும்.

மேலும், மாருதி சுஸுகி 2020ம் ஆண்டின் புதிய மின்சார கார் செக்மென்டை இந்தியாவில் வெளியிடுகிறது.

இவ்வேளையில் ஆல்டோ கார் மின்சார ஆற்றலில் வெளியிடுவதை பெரிய செலவீனமாக அந்நிறுவனம் கருதுகிறது.

2000ம் ஆண்டில் இந்தியாவில் முதன்முறையாக கால்பதித்த ஆல்டோ கார் தொடர்ந்து 14 ஆண்டுகளாக இந்தியாவின் என்ட்ரி-லெவல் ஹேட்ச்பேக் விற்பனையில் ஆதிக்கம் செலுத்தியது.

மாருதி சுஸுகி ஆல்டோ காரின் 800சிசி எஞ்சின் திறன் பெற்ற 47 பிஎச்பி பவர் மற்றும் 69 என்.எம் டார்க் திறனை வழங்கும். இதில் 5 ஸ்பீடு மேனுவல் கியர்பாக்ஸ் பொருத்தப்பட்டுள்ளது.

அதேபோல 1000சிசி பெட்ரோல் எஞ்சினை பெற்ற மாடல் 67 பிஎச்பி பவர் மற்றும் 90 என்.எம் டார்க் திறனை வழங்கும். இது 5 ஸ்பீடு மேனுவல் கியர்பாக்ஸ் கொண்டுள்ளது.

மாருதி சுஸுகி நிறுவனத்திற்கு உலகளவில் அதிகமான விற்பனை திறனை வழங்கும் மாடலாக இன்றும் இருப்பது ஆல்டோ ஹேட்ச்பேக் கார் தான்.

இதை தொடர்ந்து தக்கவைத்துக்கொள்ள, ஆல்டோ காருக்கு பிஎஸ் 6 விதியை பெற்ற எஞ்சினை பொருத்தும் மாருதி சுஸுகியின் முயற்சி வரவேற்பையே பெற்று தரும்.