ஹூண்டாய் பிஎஸ்-6 கார்கள் அறிமுகம் எப்போது? - முக்கியத் தகவல் வெளியீடு!

அடுத்த ஆண்டு ஏப்ரல் 1 முதல் வர இருக்கும் புதிய பிஎஸ்-6 மாசு உமிழ்வு விதிகளுக்கு தக்கவாறு எஞ்சின்களை மேம்படுத்துவதிலும், புதிய எஞ்சின்களை தயாரிப்பதிலும் வாகன நிறுவனங்கள் தீவிரமாக களமிறங்கி உள்ளன. கார், பைக் நிறுவனங்கள் பிஎஸ்-6 மாசு உமிழ்வு விதிகளுக்கு நிகரான எஞ்சின்களுடன் புதிய மாடல்களை அறிமுகம் செய்யும் பணிகளிலும் தீவிரம் காட்டி வருகின்றன.

மாருதி உள்ளிட்ட முன்னணி கார் நிறுவனங்கள் பிஎஸ்-6 மாசு உமிழ்வு விதிகளுக்கு நிகரான பெட்ரோல் கார் மாடல்களை தொடர்ந்து களமிறக்கி வருகின்றன. நாட்டின் இரண்டாவது பெரிய கார் நிறுவனமாக விளங்கும் ஹூண்டாய் மோட்டார்ஸ் பிஎஸ்-6 மாசு உமிழ்வு விதிகளுக்கு நிகரான முதல் மாடலாக புதிய க்ராண்ட் ஐ10 நியோஸ் பெட்ரோல் மாடலை அண்மையில் அறிமுகம் செய்தது.

ஆனால், அந்த காரில் இருக்கும் டீசல் எஞ்சின் பிஎஸ்-4 மாசு உமிழ்வு தரத்திற்கு இணையானதாகவே இருக்கிறது. இந்த நிலையில், அடுத்த ஆண்டு துவக்கத்தில் இருந்து பிஎஸ்-6 மாசு உமிழ்வு விதிகளுக்கு நிகரான புதிய கார் மாடல்களை அறிமுகம் செய்ய இருப்பதாக ஹூண்டாய் மோட்டார்ஸ் தெரிவித்துள்ளது.

அதுமட்டுமில்லாமல், பிஎஸ்-6 மாசு உமிழ்வு தரத்திற்கு இணையான டீசல் மாடல்களையும் அறிமுகம் செய்ய இருப்பதாகவும் தெரிவித்துள்ளது. மாருதி நிறுவனம் சிறிய ரக டீசல் கார் உற்பத்தியை நிறுத்தப்போவதாக அறிவித்துள்ள நிலையில், ஹூண்டாய் நிறுவனம் சிறிய ரக கார்களிலும் டீசல் மாடலை அறிமுகம் செய்ய இருக்கிறது.

மேலும், ஹூண்டாய் எலைட் ஐ20, வெனியூ, வெர்னா, க்ரெட்டா உள்ளிட்ட கார்களில் புதிய பெட்ரோல், டீசல் எஞ்சின் தேர்வுகளை ஹூண்டாய் மோட்டார்ஸ் பயன்படுத்தும் என எதிர்பார்க்கப்படுகிறது. அண்மையில் அறிமுகம் செய்யப்பட்ட கியா செல்டோஸ் காரில் இருக்கும் பெட்ரோல், டீசல் எஞ்சின் தேர்வுகள் மேற்கண்ட கார்களிலும் பயன்படுத்தப்படும் வாய்ப்புள்ளது.

அதாவது, கியா செல்டோஸ் காரில் இருக்கும் பெட்ரோல், டீசல் எஞ்சின்கள் பிஎஸ்-6 மாசு உமிழ்வு தரத்திற்கு இணையானதாகவே அறிமுகம் செய்யப்பட்டுவிட்டன. மேலும், கியா செல்டோஸ் காரின் இந்த எஞ்சின்கள் பிஎஸ்-4 தரத்திற்கு இணையான பெட்ரோல், டீசல் எரிபொருளில் வைத்து ஒரு லட்சம் கிமீ தூரம் வரை சோதனைகள் செய்யப்பட்டுள்ளன. இது வெற்றிகரமாக அமைந்தன.

இதையடுத்து, கியா செல்டோஸ் 1.5 லிட்டர் பெட்ரோல் எஞ்சின், 1.5 லிட்டர் டீசல் எஞ்சின் மற்றும் 1.4 லிட்டர் டர்போ பெட்ரோல் எஞ்சின் தேர்வுகள் ஹூண்டாய் கார்களிலும் பயன்படுத்தும் வாய்ப்புகள் உள்ளன. இந்த எஞ்சின்கள் கியா செல்டோஸ் காரில் பெரும் வரவேற்பை பெற்றிருக்கும் நிலையில், ஹூண்டாய் கார் வாங்க இருப்போரின் ஆவலையும் தூண்டுவதாக அமைந்துள்ளது. அடுத்த ஆண்டு துவக்கத்தில் இந்த புதிய எஞ்சின் ஆப்ஷன்களுடன் ஹூண்டாய் கார்களை எதிர்பார்க்கலாம்.