ஜீப் காம்பஸ் ஃபேஸ்லிஃப்ட் மாடல் இந்திய வருகை விபரம்!

வடிவமைப்பில் சிறிய மாற்றங்களுடன் ஜீப் காம்பஸ் எஸ்யூவி புதுப்பொலிவு கொடுக்கப்பட இருக்கிறது. முகப்பு க்ரில் அமைப்பு, பம்பர் மற்றும் புதிய அலாய் வீல்களுடன் ஜீப் காம்பஸ் வர இருப்பதாக தெரிகிறது. அதேபோன்று, உட்புறத்தில் புதிய அப்ஹோல்ஸ்ட்ரி கொடுக்கப்படுகிறது.

வென்டிலேட்டட் இருக்கைகள், சிம் கார்டுடன் நேரடி இணைய வசதி கொண்ட இன்ஃபோடெயின்மென்ட் சிஸ்டம், பிரிமீயம் ஆடியோ சிஸ்டம் ஆகியவற்றுடன் மேம்படுத்தப்பட இருக்கிறது.

முக்கிய மாற்றமாக புதிய ஜீப் காம்பஸ் எஸ்யூவியில் பிஎஸ்-6 மாசு உமிழ்வு விதிகளுக்கு ஒப்பான எஞ்சின் ஆப்ஷன்கள் கொடுக்கப்பட இருக்கின்றன. புதிய ஜீப் காம்பஸ் எஸ்யூவியில் தற்போதைய 1.4 லிட்டர் டர்போ பெட்ரோல் எஞ்சினுக்கு பதிலாக 1.3 லிட்டர் ஃபயர்ஃப்ளை பெட்ரோல் எஞ்சின் பயன்படுத்தப்பட இருக்கிறது.

கடந்த ஆண்டு ஜீப் ரெனிகேட் எஸ்யூவியில் இந்த புதிய 1.3 லிட்டர் ஃபயர்ஃப்ளை பெட்ரோல் எஞ்சின் அறிமுகமானது. இந்த எஞ்சின், 150 பிஎஸ் பவர் மற்றும் 180 பிஎஸ் பவரை வெளிப்படுத்தும் இரண்டுவிதமான ட்யூனிங்கில் கிடைக்கிறது.

டீசல் மாடலில் இருக்கும் 2.0 லிட்டர் டீசல் எஞ்சின் பிஎஸ்-6 மாசு உமிழ்வு தரத்திற்கு இணையாக மேம்படுத்தப்பட்டு தக்க வைக்கப்படும். அண்மையில் விற்பனைக்கு வந்த ஆஃப்ரோடு மாடலில் கொடுக்கப்படும் 9 ஸ்பீடு ஆட்டோமேட்டிக் கியர்பாக்ஸ் தேர்வு, டீசல் ஃபேஸ்லிஃப்ட் மாடலிலும் இடம்பெற இருக்கிறது.

மேலும், தற்போது 6 ஸ்பீடு மேனுவல் கியர்பாக்ஸ் தேர்வும், 2 வீல் டிரைவ் சிஸ்டம் தேர்விலும் புதிய ஜீப் காம்பஸ் வர இருப்பதாக தகவல்கள் கூறுகின்றன. இதனால், போட்டியாளர்களுக்கு கடும் சவால் தரும் மாடலாக மீண்டும் புத்துயிர் பெறும் என்று எதிர்பார்க்கப்படுகிறது.

இதனிடையே, ஜீப் காம்பஸ் அடிப்படையிலான புதிய 7 சீட்டர் மாடலும் அடுத்த ஆண்டு விற்பனைக்கு எதிர்பார்க்கப்படுகிறது. இந்த மாடலில் டீசல் எஞ்சின் ஆப்ஷன் வழங்கப்படும். டொயோட்டா ஃபார்ச்சூனர், ஃபோர்டு எண்டெவர், மஹிந்திரா அல்டுராஸ் ஜி4 மாடல்களுக்கு போட்டியாக இருக்கும்.

Source: ET Auto