புதிய மஹிந்திரா தார் 700 ஸ்பெஷல் எடிசன் மாடல் விற்பனைக்கு அறிமுகம்!

ஆஃப்ரோடு சாகச பிரியர்களின் முதன்மையான தேர்வாக மஹிந்திரா தார் எஸ்யூவி உள்ளது. ஆஃப்ரோடு தகவமைப்புகளை பெற்ற விலை குறைவான மாடல் என்பதே இதனை முன்னிறுத்துவதற்கான காரணமாக உள்ளது. இந்த நிலையில், புதிய கிராஷ் டெஸ்ட் பாதுகாப்பு விதிகள் மற்றும் பிஎஸ்-6 மாசு உமிழ்வு விதிகளுக்கு ஏற்ப புதிய தலைமுறை மஹிந்திரா தார் எஸ்யூவி உருவாக்கப்பட்டு வருகிறது.

தற்போது புதிய தலைமுறை தார் எஸ்யூவி தீவிரமான சாலை சோதனை ஓட்டங்களில் வைக்கப்பட்டு இருக்கிறது. இந்த நிலையில், இதுவரையில் விற்பனையில் இருந்த மஹிந்திரா தார் எஸ்யூவிக்கு பிரியா விடை கொடுக்கும் விதமாக, லிமிடேட் எடிசன் மாடல் வெளியிடப்பட்டுள்ளது.

மஹிந்திரா தார் 700 என்ற பெயரில் இந்த லிமிடேட் எடிசன் மாடல் பல்வேறு கூடுதல் சிறப்புகளுடன் வந்துள்ளது. மொத்தமாக 700 யூனிட்டுகள் மட்டுமே விற்பனை செய்யப்படும் என்று மஹிந்திரா அறிவித்துள்ளது.

மஹிந்திரா தார் 700 லிமிடேட் எடிசன்் மாடலில் 2.5 லிட்டர் சிஆர்டிஇ டீசல் எஞ்சின் பொருத்தப்பட்டு இருக்கிறது. இந்த எஞ்சின் அதிகபட்சமாக 105 பிஎச்பி பவரையும், 247 என்எம் டார்க் திறனையும் வெளிப்படுத்தும் வல்லமை கொண்டது. 4 வீல் டிரைவ் சிஸ்டமும் உள்ளது.

இந்த லிமிடேட் எடிசன் மாடலில் புதிய அலாய் வீல்கள், சில்வர் ஃபினிஷிங் செய்யப்பட்ட முன்புற பம்பர், தார் லோகோவுடன் கூடிய உயர் ரக சீட் கவர்கள், ஏபிஎஸ் பிரேக்கிங் சிஸ்டம் ஆகியவை முக்கிய அம்சங்களாக இடம்பெற்றுள்ளன. மஹிந்திரா குழுமத் தலைவர் ஆனந்த் மஹிந்திராவின் கையெழுத்து பிரதியுடன் கூடிய பேட்ஜ் பொருத்தப்பட்டு இருப்பது இதன் மதிப்பை கூடுதலாக்கும் விஷயமாக இருக்கிறது.

மஹிந்திரா தார் 700 மாடலானது அக்வாமரைன் மற்றும் நெப்போலி பிளாக் ஆகிய இரண்டு வண்ணங்களில் கிடைக்கும். இந்த புதிய மஹிந்திரா தார் எஸ்யூவியின் புதிய வண்ணங்கள் மிகவும் தனித்துவமாக இருக்கிறது.

புதிய மஹிந்திரா தார் எஸ்யூவியின் லிமிடேட் எடிசன் மாடல் ரூ.9.99 லட்சம் எக்ஸ்ஷோரூம் விலையில் விற்பனைக்கு அறிமுகம் செய்யப்பட்டுள்ளது. மஹிந்திரா இணையதளம் மற்றும் டீலர்கள் வாயிலாக முன்பதிவு செய்து கொள்ள முடியும்.