மஹிந்திரா எக்ஸ்யூவி300 எஸ்யூவியில் டிரிஃப்ட் அடித்த கவரவ் கில்!

மஹிந்திரா நிறுவனத்தின் புதிய எக்ஸ்யூவி300 எஸ்யூவி மாடல் அடுத்த மாதம் 15ந் தேதி விற்பனைக்கு அறிமுகம் செய்யப்பட இருக்கிறது. மினி எக்ஸ்யூவி500 எஸ்யூவி போன்ற டிசைன் தாத்பரியங்களுடன் அசத்தலாக இருக்கும் இந்த புதிய எஸ்யூவியை விளம்பரப்படுத்தும் முயற்சிகளில் மஹிந்திரா ஈடுபட்டுள்ளது. இதற்காக வெளியிடப்பட்டு இருக்கும் வீடியோ ஒன்று வைரலாகி இருக்கிறது.

ஆம். அமெரிக்காவை சேர்ந்த சாகச கார் பந்தய வீரர் கென் பிளாக்கின் ஜிம்கானா வரிசை வீடியோக்கள் உலக அளவில் கார் பிரியர்களின் கவனம் ஈர்த்தவை. இதே பாணியில் புதிய மஹிந்திரா எக்ஸ்யூவி300 எஸ்யூவிக்கு வீடியோ ஒன்று உருவாக்கப்பட்டு இருக்கிறது.

இந்தியாவின் பிரபல ராலி ரேஸ் கார் பந்தய வீரரான கவுரவ் கில், புதிய மஹிந்திரா எக்ஸ்யூவி300 எஸ்யூவியின் பராமக்கிரமங்களை சோதிக்கும் விதத்தில் இந்த வீடியோ எடுக்கப்பட்டு இருக்கிறது.

கென் பிளாக்கின் ஜிம்கானா வீடியோக்களை போலவே, தடைகளுடன் கூடிய களத்தில் மஹிந்திரா எக்ஸ்யூவி300 எஸ்யூவியை டிரிஃப்ட அடித்து அசத்துகிறார் கவுரவ் கில். பெண் ஒருவர் வீடியோ எடுக்க முற்படுவது போலவும், அவரிடமிருந்து தப்பும் வகையில் அதிவேகத்தில் எக்ஸ்யூவி300 எஸ்யூவியை விரட்டி சென்று கரடுமுரடான சாலைகளில் செலுத்துகிறார்.

அதாவது, சாலை மற்றும் கரடுமுரடான சாலைகளிலும் மஹிந்திரா எக்ஸ்யூவி300 எஸ்யூவி சிறப்பாக எதிர்கொள்ளும் என்பதை நிரூபிக்கும் விதத்தில் இந்த வீடியோ எடுக்கப்பட்்டு இருக்கிறது. ராலி ரேஸ் ஓட்டும் கவுவர் கில்லின் கைகளின் அசைவுகளுக்கு ஏற்ப துல்லியமாக மஹிந்திரா எக்ஸ்யூவி300 எஸ்யூவி செயல்படுவது போலவும் எடுக்கப்பட்டு இருக்கிறது.

இறுதியில் டயரில் தீப்பிழப்புடன் எக்ஸ்யூவி300 எஸ்யூவி சீறி பாய்ந்து செல்வது போல இந்த வீடியோ எடுக்கப்பட்டு இருக்கிறது. அதாவது, "சாலைகளில் தீயை மூட்டுவோம்" என்ற தாரக மந்திரத்தை உணர்த்துவதுபோல முடிவு சொல்லப்பட்டு இருக்கிறது. இந்த வீடியோ கார் பிரியர்கள் மத்தியில் வைரலாகி இருக்கிறது.

மேலும், புதிய மஹிந்திரா எக்ஸ்யூவி300 எஸ்யூவியின் 1.5 லிட்டர் டீசல் எஞ்சினின் திறனை பரைசாற்றுவது போலவும் வீடியோவில் கருத்து சொல்லப்படுகிறது. ஏனெனில், இந்த எஞ்சின் 120 ரபிஎச்பி பவரை வெளிப்படுத்தும் என்பதால், இதன் ரகத்தில் சக்திவாய்ந்த டீசல் எஞ்சின் ஆப்ஷனாக இருக்கும்.