தீபாவளி ரிலீசாக வருகிறது மாருதி எஸ் பிரெஸ்ஸா குட்டி எஸ்யூவி கார்!

பட்ஜெட் கார் மார்க்கெட்டில் மாருதி சுஸுகி மிக வலுவான வர்த்தகத்தை பெற்றிருக்கிறது. சந்தைப் போட்டியை சமாளிக்கும் விதத்தில் தொடர்ந்து புதிய கார் மாடல்களை பட்ஜெட் விலையில் அறிமுகம் செய்து வருகிறது. அந்த வகையில், தற்போது ரெனோ க்விட் காருக்கு எதிராக புத்தம் புதிய க்ராஸ்ஓவர் ரக மாடலை களமிறக்க உள்ளது.

கடந்த 2018ம் ஆண்டு ஆட்டோ எக்ஸ்போவில் காட்சிக்கு வைக்கப்பட்டு இருந்த ஃப்யூச்சர் எஸ் கான்செப்ட் அடிப்படையில் இந்த புதிய மாடல் தயாரிப்பு நிலை மாடலாக மேம்படுத்தப்பட்டு இருக்கிறது. டிசைனில் சில மாறுதல்களுடன் இந்த கார் வர இருக்கிறது.

இந்த காருக்கு எஸ் பிரெஸ்ஸோ என்று மாருதி பெயரிட்டுள்ளதாக எக்கனாமிக் டைம்ஸ் தளம் செய்தி தெரிவிக்கிறது. வரும் தீபாவளி பண்டிகையின்போது இந்த கார் விற்பனைக்கு வர இருக்கிறது.

இந்த புதிய பட்ஜெட் கார் எஸ்யூவி போன்ற டிசைன் அம்சங்களுடன் வர இருப்பது கவனிக்கத்த விஷயமாக இருக்கிறது. அதாவது, ரெனோ க்விட் காருக்கு கிடைத்த வரவேற்பை அடுத்து இந்த புதிய டிசைன் கொள்கையில் புதிய பட்ஜெட் காரை மாருதி கொண்டு வருகிறது.

இந்த புதிய கார் முழுக்க முழுக்க இந்தியாவிலுள்ள மாருதி சுஸுகி நிறுவனத்தின் ஆராய்ச்சி மற்றும் மேம்பாட்டு மையத்தின் மூலமாக உருவாக்கப்பட்டு இருப்பதும் மற்றொரு சிறப்பு. ஹரியானா மாநிலம், ரோதக் பகுதியில் செயல்படும் மாருதி மையத்தில்தான் இந்த காரின் அனைத்து உருவாக்கப் பணிகளும் நடந்தன.

இதனால், சுஸுகி நிறுவனத்திற்கு கொடுக்க வேண்டிய ராயல்டி தொகை அளவு கணிசமாக குறையும் என்று மாருதி சுஸுகி வட்டாரங்கள் தெரிவிக்கின்றன. மாருதியின் அரேனா ஷோரூம்கள் வாயிலாக இந்த புதிய கார் விற்பனை செய்யப்பட இருக்கிறது.

இந்த புதிய காரில் மாருதி ஆல்ட்டோ கே10 காரில் பயன்படுத்தப்படும் 1.0 லிட்டர் பெட்ரோல் எஞ்சின் இடம்பெற இருக்கிறது. மேனுவல் மற்றும் ஏஎம்டி கியர்பாக்ஸ் தேர்வுகளில் விற்பனைக்கு வர இருக்கிறது. தொடுதிரையுடன் கூடிய இன்ஃபோடெயின்மென்ட் சிஸ்டம், டியூவல் டோன் இன்டீரியர் முக்கிய அம்சங்களாக இருக்கும்.

அதேபோன்று, பாதுகாப்பு அம்சங்களிலும் சிறப்பான கார் மாடலாக இருக்கும். வரும் தீபாவளிக்கு முன்னதாக இந்த புதிய காருக்கான அறிமுக விழா நடைபெறும் என்று எதிர்பார்க்கப்படுகிறது. பட்ஜெட் விலையில் சிறந்த அம்சங்களை கொண்ட கார் மாடலாக நிலைநிறுத்தப்பட இருக்கிறது.