ஹூண்டாய் டூஸான் பிஎஸ்-6 மாடல் இந்திய அறிமுக விபரம்!

மிட்சைஸ் எஸ்யூவி மார்க்கெட்டில் பிரிமீயம் மாடலாக ஹூண்டாய் டூஸான் எஸ்யூவி நிலைநிறுத்தப்பட்டு இருக்கிறது. இந்த நிலையில், வாடிக்கையாளர்களின் எதிர்பார்ப்புகளை பூர்த்தி செய்யும் விதமாக, பல்வேறு மாற்றங்களுடன் புதுப்பொலிவு கொடுக்கப்பட்டு இருக்கிறது.

இந்த புதிய டூஸான் எஸ்யூவி விரைவில் இந்தியாவிலும் அறிமுகம் செய்யப்பட இருக்கிறது. அதாவது, அடுத்த மாதம் நடக்க இருக்கும் ஆட்டோ எக்ஸ்போவில் இந்த புதிய மாடலை அறிமுகப்படுத்த ஹூண்டாய் திட்டமிட்டுள்ளது.

ஹூண்டாய் டூஸான் ஃபேஸ்லிஃப்ட் மாடலில் புதிய டிசைன் தாத்பரியங்கள் கையாளப்பட்டு புதுப்பொலிவு கொடுக்கப்பட்டு இருக்கிறது. க்ரில் அமைப்பு, அலாய் வீல்கள் உள்ளிட்டவை மாற்றங்களுடன் வர இருக்கிறது.

இந்த காரில் 2.0 லிட்டர் பெட்ரோல், டீசல் எஞ்சின் தேர்வுகள் பயன்படுத்தப்படும். 6 ஸ்பீடு மேனுவல் மற்றும் ஆட்டோமேட்டிக் கியர்பாக்ஸ் தேர்வுகளில் இந்த கார் வர இருக்கிறது. இந்த காரில் முக்கிய அம்சமே, பிஎஸ்-6 எஞ்சின் தேர்வுகளில் வர இருக்கிறது.

ஹூண்டாய் டூஸான் எஸ்யூவியின் டாப் வேரியண்ட்டாக வர இருக்கும் டீசல் ஆட்டோமேட்டிக் மாடலானது ஆல் வீல் டிரைவ் சிஸ்டம் கொண்ட தேர்விலும் கிடைக்கும்.

இந்த காரில் ஹைப்ரிட் எஞ்சின் தேர்வும் வழங்கப்பட இருப்பதாக ஒரு தகவல் உலா வருகிறது. ஆனால், அது எந்த அளவுக்கு உண்மையாக இருக்கும் என்பது ஆட்டோ எக்ஸ்போவில்தான் தெரிய வரும்.

வெளிப்புறத்தில் குறிப்பிடத்தக்க மாற்றங்களை பெற்றிப்பது போன்றே, உட்புறத்திலும் மாற்றங்களை எதிர்பார்க்கலாம். கூடுதல் வசதிகளும் சேர்க்கப்பட்டு வருகிறது.

இந்த காரில் 8.0 அங்குல தொடுதிரையுடன் கூடிய இன்ஃபோடெயின்மென்ட் சிஸ்டம் பயன்படுத்தப்பட்டு இருக்கும். ஹூண்டாய் புளூ லிங்க் கனெக்ட்டிவிட்டி தொழில்நுட்பமும் இடம்பெற்றிரு்ககும்.

இந்த காரில் 360 டிகிரி கேமரா மற்றும் அடாப்டிவ் க்ரூஸ் கன்ட்ரோல் சிஸ்டம் ஆகியவை மிக முக்கிய அம்சங்களாக இருக்கும்.

தற்போது ஹூண்டாய் டூஸான் எஸ்யூவியின் பெட்ரோல் மாடலானது ரூ.18.77 லட்சம் முதல் 23.74 லட்சம் வரையிலான விலையிலும், டீசல் மாடலானதுரூ.20.80 லட்சம் முதல் ரூ.26.97 லட்சம் வரையிலான விலையில் கிடைக்கிறது. பிஎஸ்-6 எஞ்சினுடன் ஃபேஸ்லிஃப்ட் மாடல் வர இருப்பதால் விலை கணிசமாக அதிகரிக்கும் என்று எதிர்பார்க்கப்படுகிறது.

Via - NDTV Auto