எம்ஜி 360 எம்பிவி கார் ஆட்டோ எக்ஸ்போவில் அறிமுகம்... மாருதி எர்டிகா காருக்கு அடுத்த போட்டி!

இந்திய மார்க்கெட்டில் மிக வலுவான வர்த்தகத்தை பெறுவதற்காக பல புதிய கார் மாடல்களை ஆட்டோ எக்ஸ்போவில் வரிசை கட்டி நிற்க வைத்துள்ளது எம்ஜி மோட்டார் நிறுவனம். இதில், பெரும்பாலான இந்தியர்களின் கவனத்தை ஈர்த்துள்ள மாடல் எம்ஜி 360 எம்பிவி கார்.

மாருதி எர்டிகா மற்றும் மஹிந்திரா மராஸ்ஸோ கார்களுக்கு நேரடி போட்டியான ரகத்தில் வர இருப்பதால், இந்த மாடல் ஆவலை ஏற்படுத்தி உள்ளது. சீனாவில் விற்பனையாகும் பவ்ஜுன் 360 எம்பிவி கார்தான் இந்தியாவில் எம்ஜி பிராண்டில் 360எம் என்ற பெயரில் ரீபேட்ஜ் செய்யப்பட்டு அறிமுகமாக உள்ளது.

வடிவமைப்பில் பிற எம்ஜி தயாரிப்புகள் போலவே, குறை சொல்ல முடியாத வடிவமைப்பை பெற்றிருக்கிறது. எம்ஜி 360எம் கார் 4,615 மிமீ நீளமும், 1,735 மிமீ அகலமும், 1,660 மிமீ உயரமும் கொண்டதாக வடிவமைக்கப்பட்டு இருக்கிறது. இந்த கார் 2,750 மிமீ வீல் பேஸ் நீளத்தை பெற்றிருக்கிறது. இதனால், இந்த கார் 7 பேர் பயணிப்பதற்கான போதுமான இடவசதியை வழங்கும்.

இந்த காரில் 1.5 லிட்டர் பெட்ரோல் எஞ்சின் பயன்படுத்தப்பட்டு இருக்கிறது. இந்த எஞ்சின் 103 பிஎச்பி பவரையும், 135 என்எம் டார்க் திறனையும் வழங்கும். சிவிடி கியர்பாக்ஸ் இணைக்கப்பட்டுள்ளது.

இந்த காரில் 8.0 அங்குல ஃப்ளோட்டிங் தொடுதிரை அமைப்புடன் கூடிய இன்ஃபோடெயின்மென்ட் சிஸ்டம், டிஜிட்டல் இன்ஸ்ட்ரூமென்ட் க்ளஸ்ட்டர், ஆட்டோமேட்டிக் க்ளைமேட் கன்ட்ரோல், எலெக்ட்ரிக் சன்ரூஃப், இரண்டாவது வரிசையில் கேப்டன் இருக்கைகள், பார்க்கிங் கேமரா, இபிடியுடன் கூடிய ஏபிஎஸ் பிரேக்கிங் சிஸ்டம் ஆகியவை இடம்பெற்றுள்ளன

புதிய எம்ஜி 360எம் எம்பிவி கார் மாடலானது ரூ.10 லட்சத்திற்குள்ளான ஆரம்ப விலையில் விற்பனைக்கு எதிர்பார்க்கலாம். மாருதி எர்டிகா காருக்கு சிறந்த மாற்று தேர்வை எதிர்பார்ப்பவர்களை குறிவைத்து இந்த கார் நிலைநிறுத்தப்படும்.