ரூ.2.48 கோடியில் இந்தியாவில் விற்பனைக்கு வந்த புதிய பென்ஸ் கார்!

இதுவரை விற்பனையில் இருந்த மெர்சிடிஸ் ஏஎம்ஜி ஜிடி ஆர் காரைவிட அதிக சிறப்பம்சங்கள் மற்றும் வடிவமைப்பு மாற்றங்களுடன் இந்த கார் ஃபேஸ்லிஃப்ட் மாடலாக வந்துள்ளது. பழைய மாடலுக்கும், புதிய ஃபேஸ்லிஃப்ட் மாடலுக்கும் பெரிய அளவிலான வித்தியாசங்கள் இல்லை. ஆனால், புதிய பம்பர் அமைப்பு, க்ரில் அமைப்பு ஆகியவற்றில் சிறிய மாற்றங்களுடன் புதுப்பொலிவு கொடுக்கப்பட்டு இருக்கிறது.

புதிய ஏஎம்ஜி ஜிடிஆர் காரில் எல்இடி ஹெட்லைட்டுகள், கார்பன் ஃபைபர் விங் அமைப்பு, புதிய புகைப்போக்கி அமைப்பு ஆகியவையும் குறிப்பிடத்தக்க விஷயங்களாக இருக்கின்றன.

MOST READ : பருவமழை காலம் வருதுங்க... உங்க வண்டி பத்திரம்!

இந்த காரில் பை-டர்போ 4.0 லிட்டர் வி8 பெட்ரோல் எஞ்சின் பயன்படுத்தப்பட்டு இருக்கிறது. இந்த எஞ்சின் அதிகபட்சமாக 577 பிஎச்பி பவரையும், 700 என்எம் டார்க் திறனையும் வெளிப்படுத்தும் திறன் வாய்ந்ததாக தெரிவிக்கப்பட்டு இருக்கிறது. இந்த காரில் 7 ஸ்பீடு ஆட்டோமேட்டிக் கியர்பாக்ஸ் இணைக்கப்பட்டுள்ளது.

புதிய மெர்சிடிஸ் பென்ஸ் ஏஎம்ஜி ஜிடிஆர் கார் பழைய மாடலைவிட 13.9 கிலோ எடை குறைந்துள்ளது. இதனால், முந்தைய மாடலைவிட செயல்திறனில் மேம்பட்டு இருக்கிறது. இந்த கார் 0 - 100 கிமீ வேகத்தை 3.6 வினாடிகளில் எட்டிவிடும். மணிக்கு 318 கிமீ வேகம் வரை தொடும் வல்லமை கொண்டது.

இந்த காரில் ரியர் வீல் ஸ்டீயரிங் சிஸ்டத்துடன் வந்துள்ளது. அதாவது, கார் 100 கிமீ வேகத்தை தாண்டும்போது, அதிக நிலைத்தன்மையை வழங்கும் விதத்தில் இந்த காரின் பின்சக்கரங்களும் திரும்பும் தொழில்நுட்பத்தை பெற்றிருக்கிறது. வேகத்தை பொறுத்து முன்சக்கரங்களுக்கு இணையான திசையில் அல்லது எதிர் திசையில் பின்சக்கரங்கள் திரும்பும் தொழில்நுட்பத்தை பெற்றிருக்கிறது.

புதிய மெர்சிடிஸ் ஏஎம்ஜி ஜிடி ஆர் காரில் எல்இடி ஹெட்லைட்டுகள், எல்இடி டெயில் லைட்டுகள் இடம்பெற்றிருப்பதுடன், 12.3 அங்குல திரையுடன் டிஜிட்டல் இன்ஸ்ட்ரூமென்ட் க்ளஸ்ட்டர், 10.25 அங்குல இன்ஃபோடெயின்மென்ட் சிஸ்டம் ஆகியவை இடம்பெற்றுள்ளன.

புதிய மெர்சிடிஸ் பென்ஸ் ஜிடிஆர் கார் முழுவதுமாக கட்டமைக்கப்பட்ட நிலையில் இந்தியாவில் இறக்குமதி செய்து விற்பனை செய்யப்பட உள்ளது. இந்த காருக்கு ரூ.2.48 கோடி எக்ஸ்ஷோரூம் விலை நிர்ணயிக்கப்பட்டுள்ளது.