எம்ஜி ஹெக்டருடன் மல்லுக்கட்ட தயாராகும் 2021 டாடா ஹெரியர்!! புதிய பெட்ரோல் என்ஜின் விரைவில் அறிமுகம்

இந்திய சந்தையில் உள்ள நடுத்தர எஸ்யூவி கார்களான ஜீப் காம்பஸ் மற்றும் எம்ஜி ஹெக்டர் உள்ளிட்டவை ஏற்கனவே பெட்ரோல் என்ஜின் தேர்வை கொண்டுள்ளன. மஹிந்திரா எக்ஸ்யூவி500 அடுத்த வருடத்தில் பெட்ரோல் என்ஜின் தேர்வை பெறவுள்ளது.

இவற்றை தொடர்ந்து டாடா மோட்டார்ஸும் தனது எஸ்யூவி மாடலான ஹெரியரில் பெட்ரோல் என்ஜினை வழங்கவுள்ளது. இதனை வெளிப்படுத்தும் வகையில்தான் தற்போது இந்த டாடா கார் சோதனை ஓட்டத்தில் உட்படுத்தப்பட்டுள்ளது.

ரஷ்லேன் செய்திதளம் மூலமாக கிடைத்துள்ள இதுகுறித்த ஸ்பை படங்களில் 2021 ஹெரியர் பெட்ரோல் புனேக்கு அருகே முழு மறைப்புடன் சோதனை ஓட்டத்தில் ஈடுப்படுத்தப்பட்டுள்ளது. இருப்பினும் காரின் பின்பக்கத்தில் சோதனை கருவிகளை தெளிவாக பார்க்க முடிகிறது.

இந்தியாவில் பெட்ரோல் வாடிக்கையாளர்களின் எண்ணிக்கை தொடர்ந்து அதிகரித்து வருகிறது. இந்த பலனை டாடா மோட்டார்ஸும் நெக்ஸான் காம்பெக்ட் எஸ்யூவி மூலமாக அடைந்துள்ளது.

எம்ஜி ஹெக்டர் 2020 நவம்பரில் 3,500 யூனிட்கள் விற்பனை செய்யப்பட்டுள்ளன. இதில் சுமார் 50 சதவீதத்தை அதன் பெட்ரோல் வேரியண்ட்களின் மூலம் எம்ஜி மோட்டார் பெற்றுள்ளது. இதிலிருந்து ஹெரியரின் விற்பனையில் டாடா எத்தகைய இழப்பை சந்திந்துள்ளது என்பதை அறியலாம்.

ஹெரியர் பெட்ரோல் மாடலை கொண்டுவருவதற்கு இதுமட்டும் காரணம் இல்லை. ஏனெனில் புதிய பெட்ரோல் வேரியண்ட்களின் வருகையினால் ஹெரியரின் ஆரம்ப விலையும் கணிசமாக குறைக்கப்படுவதற்கு வாய்ப்புள்ளது.

ஹெரியரில் அடுத்த ஆண்டு 1.5 லிட்டர், நேரடி-இன்ஜெக்‌ஷன் டர்போ பெட்ரோல் என்ஜினை டாடா மோட்டார்ஸ் வழங்கவுள்ளது. நெக்ஸானின் 1.2 லிட்டர் ரெவோட்ரான் டர்போ பெட்ரோல் என்ஜினின் 4-சிலிண்டர் வெர்சனான இது 150 பிஎச்பி-க்கும் அதிகமான ஆற்றலை வெளிப்படுத்தும் வகையில் வழங்கப்படவுள்ளது.

டாடா ஹெரியர் பெட்ரோல் மாடலில் மேனுவல் மற்றும் ஆட்டோமேட்டிக் என இரு விதமான ட்ரான்ஸ்மிஷன் தேர்வுகள் வழங்கப்படலாம் என எதிர்பார்க்கப்படுகிறது. இதே 1.5 லிட்டர் பெட்ரோல் என்ஜின்தான் டாடாவின் புதிய அறிமுகமான கிராவிட்டாஸ் எஸ்யூவியிலும் வழங்கப்படவுள்ளது.

புதிய என்ஜின் தேர்வை தவிர்த்து தோற்றத்தில் 2021 ஹெரியர் பெட்ரோல் மாடல் பெரும்பான்மையாக தற்போதைய டீசலை மாடலை தான் ஒத்து காணப்படும். இருப்பினும் சில நேர்த்தியான முத்திரைகளுடன் புதிய நிறத்தேர்வுகளை எதிர்பார்க்கலாம்.