காத்திருந்தது போதும், ஷோரூம்களை வந்தடைந்தது புதிய நிஸான் மேக்னைட் எஸ்யூவி கார்!!

நிஸான் இந்தியா நிறுவனம் முற்றிலும் புதிய மேக்னைட் சப்-காம்பெக்ட் எஸ்யூவி காரை வருகிற நவம்பர் 26ஆம் தேதி சந்தையில் அறிமுகப்படுத்தவுள்ளது. இருப்பினும் இந்த எஸ்யூவி காருக்கான முன்பதிவுகள் அதிகாரப்பூர்வமாக இன்னும் துவங்கப்படவில்லை.

குறிப்பிட்ட சில டீலர்ஷிப் மையங்களில் மட்டும் முன்பதிவுகள் அதிகாரப்பூர்வமற்ற முறையில் ரூ.25,000 என்ற முன் தொகையுடன் நடைபெற்று வருவதாக தகவல்கள் கிடைத்துள்ளன. இந்த நிலையில் தற்போது இந்த புதிய நிஸான் கார் சில டீலர்ஷிப் மையங்களை வந்தடைந்துள்ளதை உறுதிப்படுத்தும் விதமாக சில படங்கள் ஃபேஸ்புக்கில் பதிவிடப்பட்டுள்ளன.

சமீபத்தில் இணையத்தில் வெளியான தகவல்களின்படி பார்க்கும்போது மேக்னைட்டின் ஆரம்ப எக்ஸ்ஷோரூம் விலை ரூ.5.5 லட்சத்தில் நிர்ணயிக்கப்பட வாய்ப்புள்ளது. அதேபோல் எக்ஸ்இ, எக்ஸ்எல், எக்ஸ்வி அப்பர் மற்றும் எக்ஸ்வி ப்ரீமியம் என்ற நான்கு விதமான ட்ரிம்களில் இந்த கார் சந்தைப்படுத்தப்படவுள்ளதாகவும் அந்த தகவல்களில் குறிப்பிடப்பட்டுள்ளது.

வெளிப்புறத்தில் நேர்த்தியான ஹெட்லேம்ப்கள், பகல்நேரத்திலும் ஒளிரக்கூடிய எல்இடி ப்ரோஜெக்டர் விளக்குகள் உடன் க்ரோம் பார்டரை கொண்ட பெரிய க்ரில் அமைப்பை மேக்னைட் பெற்றுள்ளது. 16 இன்ச்சில் அலாய் சக்கரங்கள், சில்வர் நிறத்தில் மேற்கூரை தண்டவாளங்கள், இரட்டை-நிறத்தில் மேற்கூரை தேர்வு உள்ளிட்டவை இந்த காரில் வழங்கப்படவுள்ள மற்ற வெளிப்பக்க சிறப்பம்சங்களாகும்.

ரெனால்ட்-நிஸான் கூட்டணியின் சிஎம்எஃப்-ஏ+ ப்ளாட்ஃபாரத்தில் அடிப்படையில் வெளிவரும் மேக்னைட்டின் உட்புறம் 7 இன்ச்சில் முழு டிஜிட்டல் இன்ஸ்ட்ரூமெண்ட் க்ளஸ்ட்டர், 8-இன்ச் இன்ஃபோடெயின்மெண்ட் சிஸ்டம், பல செயல்பாடுகளை கொண்ட ஸ்டேரிங் சக்கரம், ஆட்டோமேட்டிக் ஏசி மற்றும் 360-கோண கேமிரா உள்ளிட்டவற்றுடன் முழுக்க முழுக்க கருப்பு நிறத்தில் வடிவமைக்கப்பட்டு வழங்கப்படவுள்ளது.

மிக பெரிய எதிர்பார்ப்புக்கு மத்தியில் விற்பனைக்கு வரவுள்ள நிஸான் மேக்னைட்டில் இரு பெட்ரோல் என்ஜின்கள் தேர்வுகளாக கொடுக்கப்படவுள்ளன. இதில் ஒன்றான 1.0 லிட்டர் பெட்ரோல் என்ஜின் அதிகப்பட்சமாக 71 பிஎச்பி மற்றும் 96 என்எம் டார்க் திறனையும், 1.0 லிட்டர் டர்போசார்ஜ்டு பெட்ரோல் என்ஜின் 99 பிஎச்பி மற்றும் 160 என்எம் டார்க் திறனையும் வெளிப்படுத்தும் வகையில் வழங்கப்படவுள்ளன.

இவற்றுடன் வழங்கப்படும் 5-ஸ்பீடு மேனுவல் கியர்பாக்ஸ் உடன் பெட்ரோல் என்ஜின் 18.75 kmpl மைலேஜ்ஜையும், டர்போ பெட்ரோல் என்ஜின் 20 kmpl மைலேஜ்ஜையும் வழங்கும் என கூறப்படுகிறது. அதுவே கூடுதல் தேர்வாக வழங்கப்படும் சிவிடி ஆட்டோமேட்டிக் ட்ரான்ஸ்மிஷன் மற்றும் டர்போ பெட்ரோல் என்ஜின் மூலமாக 17.7 kmpl மைலேஜ்ஜை பெறலாம்.