அசத்தும் அம்சங்களுடன் வரும் புதிய நிஸான் மேக்னைட் எஸ்யூவியின் அறிமுக தேதி வெளியீடு!

இந்தியாவின் சப்-காம்பேக்ட் எஸ்யூவி மார்க்கெட்டில் புதிய மாடல்கள் வரிசை கட்டி வருகின்றன. அனைத்து மாடல்களுக்கும் குறிப்பிடத்தக்க அளவு விற்பனை உள்ளது. இந்த நிலையில், இந்த மார்க்கெட்டில் நிஸான் நிறுவனமும் மேக்னைட் என்ற எஸ்யூவியுடன் களமிறங்க உள்ளது.

நிஸான் மேக்னைட் எஸ்யூவியின் டிசைன் மற்றும் வசதிகள் வாடிக்கையாளர்களின் கவனத்தை ஈர்த்துள்ளது. மேலும், சப்-காம்பேக்ட் எஸ்யூவி மார்க்கெட்டில் விலை குறைவான தேர்வாக இருக்கும் என்றும் தகவல்கள் வெளியானதால், தனி கவனத்தை பெற்றுள்ளது.

கடந்த மாதம் பொது பார்வைக்கு கொண்டு வரப்பட்ட இந்த புதிய எஸ்யூவி மாடல் வரும் டிசம்பர் 2ந் தேதி விற்பனைக்கு கொண்டு வரப்பட உள்ளதாக அதிகாரப்பூர்வமாக தெரிவிக்கப்பட்டுள்ளது.

புதிய நிஸான் மேக்னைட் எஸ்யூவியில் எஸ்யூவியில் எல்இடி ஹெட்லைட்டுகள், எல்இடி பகல்நேர விளக்குகள், டியூவல் டோன் அலாய் வீல்கள், ரூஃப் ரெயில்கள், ஸ்கிட் பிளேட்டுகள் பொருத்தப்பட்டுள்ளன. 8 அங்குல தொடுதிரையுடன் கூடிய இன்ஃபோடெயின்மென்ட் சிஸ்டம், டிஜிட்டல் இன்ஸ்ட்ரூமென்ட் க்ளஸ்ட்டர், ஆட்டோமேட்டிக் க்ளைமேட் கன்ட்ரோல் சிஸ்டம் ஆகியவையும் முக்கிய அம்சங்களாக இருக்கும்.

இந்த காரில் 360 டிகிரி கேமரா, பார்க்கிங் சென்சார்கள் ஆகியவையும் வழங்கப்படும். புதிய நிஸான் மேக்னைட் எஸ்யூவி 5 ஒற்றை வண்ணத் தேர்வுகளிலும், 3 டியூவல் டோன் தேர்வுகளிலும் விற்பனைக்கு கொண்டு வரப்பட உள்ளது.

புதிய நிஸான் மேக்னைட் எஸ்யூவியில் இரண்டுவிதமான பெட்ரோல் எஞ்சின் தேர்வுகள் வழங்கப்படும். முதல் தேர்வானது 1.0 லிட்டர் பெட்ரோல் எஞ்சின் அதிகபட்சமாக 71 பிஎச்பி பவரையும், 96 என்எம் டார்க் திறனையும் வழங்கும். இதனுடன் 5 ஸ்பீடு மேனுவல் கியர்பாக்ஸ் தேர்வு வழங்கப்படும்.

அடுத்து 1.0 லிட்டர் டர்போ பெட்ரோல் எஞ்சின் 99 பிஎச்பி பவரையும், 160 என்எம் டார்க் திறனையும் வெளிப்படுத்தும். இதனுடன் 5 ஸ்பீடு மேனுவல் கியர்பாக்ஸ் அல்லது சிவிடி கியர்பாக்ஸ் தேர்வுகள் வழங்கப்படும்.

புதிய நிஸான் மேக்னைட் எஸ்யூவி ரூ.5.50 லட்சம் எக்ஸ்ஷோரூம் ஆரம்ப விலையில் விற்பனைக்கு எதிர்பார்க்கப்படுகிறது. மஹிந்திரா எக்ஸ்யூவி300, ஹூண்டாய் வெனியூ, கியா சொனெட், மாருதி விட்டாரா பிரெஸ்ஸா, டாடா நெக்ஸான் ஆகியவற்றுடன் போட்டி போடும்.