20 வருடங்களுக்கு பின் லோகோவை மாற்றிய நிஸான்- இந்தியாவில் எந்த காரில் அறிமுகமாகவுள்ளது தெரியுமா?

சில மாதங்களுக்கு முன்பு ஜப்பானிய கார் தயாரிப்பு நிறுவனமான நிஸான் 20 வருடங்களுக்கு பிறகு அதன் புதிய லோகோவை புதிய எலக்ட்ரிக் அரியா எஸ்யூவி காரின் மூலமாக அறிமுகப்படுத்தி இருந்தது. இரு பரிமாண (2டி) தோற்றத்தில் வட்ட வடிவில் கொண்டுவரப்பட்ட இந்த புதிய லோகோவில் நிஸான் பெயர் வழக்கம்போல் மத்தியில் கொடுக்கப்பட்டுள்ளது.

"புதிய லோகோ புதிய தலைமுறை வாடிக்கையாளர்களுக்கு புதுமைகளைத் தக்கவைத்துக்கொள்வதற்கான நிறுவனத்தின் அர்ப்பணிப்பை குறிக்கிறது" என்று நிஸான் கூறுகிறது. இந்த புதிய முத்திரை நிஸானின் டிஜிட்டல் மற்றும் இயற்பியல் என்ற இரு ப்ளாட்ஃபாரங்களிலும் பயன்படுத்தப்படுகிறது.

நிஸான் நிறுவனம் அடுத்த 18 மாதங்களில் 12 புதிய மாடல்களை உலகளவில் அறிமுகப்படுத்த திட்டமிட்டுள்ளது. இவற்றில் ஒன்றாக இந்திய சந்தையில் விரைவில் மேக்னைட் பி-பிரிவு காம்பெக்ட் எஸ்யூவி வருகிற டிசம்பர் 2ஆம் தேதி அறிமுகப்படுத்தப்படவுள்ளது.

மேலும் இந்திய சந்தையில் நிஸானின் புதிய லோகோ உடன் அறிமுகமாகவுள்ள முதல் மாடலாகவும் இது விளங்கவுள்ளது. விற்பனை போட்டி மிகுந்த பிரிவில் நிலைநிறுத்தப்படவுள்ளதால் மேக்னைட்டின் ஆரம்ப எக்ஸ்ஷோரூம் விலை மிகவும் குறைவாக ரூ.5.5 லட்சத்தில் நிர்ணயிக்கப்பட வாய்ப்புள்ளதாக தகவல்கள் வெளியாகியுள்ளன.

இதனால் ஹேட்ச்பேக் கார் பிரியர்களும் நிஸான் மேக்னைட்டின் பக்கம் சாய்வார்கள் என்று கணிக்கப்பட்டுள்ளது. மேக்னைட்டில் 1.0 லிட்டர் மற்றும் 1.0 லிட்டர் டர்போ எச்ஆர்ஏ0 என்ற இரு பெட்ரோல் என்ஜின்களை தேர்வுகளாக வழங்க தயாரிப்பு நிறுவனம் திட்டமிட்டுள்ளது.

இதில் நேச்சுரலி அஸ்பிரேட்டட் பெட்ரோல் என்ஜின் அதிகப்பட்சமாக 70 பிஎச்பி மற்றும் 96 என்எம் டார்க் திறனையும், டர்போ பெட்ரோல் என்ஜின் 97 பிஎச்பி மற்றும் 160 என்எம் டார்க் திறனையும் வெளிப்படுத்தும் ஆற்றல் கொண்டதாக இருக்கும். இந்த இரு என்ஜின்களுடனும் ட்ரான்ஸ்மிஷன் தேர்வுகளாக 5-ஸ்பீடு மேனுவல் மற்றும் சிவிடி கியர்பாக்ஸ் வழங்கப்படவுள்ளன.

மேக்னைட்டின் அறிமுகத்துடன் நிஸான் நிறுவனம் இந்தியாவில் அதன் விற்பனை மற்றும் சேவை நெட்வொர்க்கையும் பலப்படுத்தும் என எதிர்பார்க்கப்படுகிறது. நிஸான் மட்டுமின்றி எலக்ட்ரிக் கார்களுக்கான புதிய தொகுப்பிற்காக பிஎம்டபிள்யூ மற்றும் ஃபோக்ஸ்வேகன் பிராண்ட்களும் தங்களது லோகோக்களை மாற்றியமைத்துள்ளன என்பது குறிப்பிடத்தக்கது.