இருக்குற கஷ்டத்துல இது வேறயா... மத்தளத்திற்கு இரண்டு பக்கமும் அடி நிலையில் வாகன ஓட்டிகள்!

தேசிய ஊரடங்கு அமல்படுத்தப்பட்டதும் பல இடங்களில் விலைவாசியும் உயர்ந்தது. இதனால் பன்முனை பொருளாதார தாக்குதல்களில் சிக்கி பலர் தவித்து வருகின்றனர். இந்த சூழலில், பெட்ரோல், டீசல் விலையை எண்ணெய் நிறுவனங்கள் தொடர்ந்து உயர்த்தி வருவது வாகன ஓட்டிகள் மற்றும் மக்களிடையே புதிய நெருக்கடியை ஏற்படுத்தி உள்ளது.

தேசிய ஊரடங்கு காரணமாக நுகர்வு அடியோடு முடங்கிய நிலையில், தற்போது ஊரடங்கு தளர்வு காரணமாக வாகன போக்குவரத்து மெல்ல அதிகரித்து வருகிறது. இதனால், நுகர்வு வெகுவாக அதிகரித்து வருகிறது. கிட்டத்தட்ட இரண்டரை மாதங்களுக்கு மேல் பெட்ரோல், டீசல் விலையில் பெரிய மாற்றம் இல்லாமல் இருந்து வந்தது. தினசரி விலை உயர்வு திட்டமும் நிறுத்தப்பட்டு இருந்தது.

தேசிய ஊரடங்கு அமலில் இருந்தாலும் பல இடங்களில் தளர்வுகள் அறிவிக்கப்பட்டுள்ளதால், மக்கள் இயல்பு நிலைக்கு திரும்புவதற்கு முயற்சித்து வருகின்றனர். அலுவலகம் செல்வோர், வியாபாரிகள், வர்த்தகர்கள் மற்றும் போக்குவரத்து சேவை வழங்கும் நிறுவனங்கள் மீண்டும் தங்களது வர்த்தக செயல்பாடுகளை படிப்படியாக அதிகரித்து வருகின்றன.

கடந்த இரண்டு மாதங்களாக வருவாய் இல்லாமல் இருந்த நிலையில், அவர்கள் மீண்டும் பணிக்கு திரும்பும் இந்த சூழலில், பெட்ரோல், டீசல் விலையை தினசரி உயர்த்தப்பட்டு அதிர்ச்சியை ஏற்படுத்தி உள்ளது. இன்று 6வது நாளாக பெட்ரோல், டீசல் விலை உயர்த்தப்பட்டுள்ளது.

இன்று டெல்லியில் பெட்ரோல் விலை 57 காசுகளும், டீசல் விலை 59 காசுகளும் உயர்த்தப்பட்டன. இன்றைய நிலவரப்படி, தலைநகர் டெல்லியில் பெட்ரோல் விலை லிட்டருக்கு ரூ.74.57 என்றும், டீசல் விலை லிட்டருக்கு ரூ.72.22 என்றும் நிர்ணயிக்கப்பட்டது.

கடந்த ஆறு நாட்களாக பெட்ரோல், டீசல் விலை சிறிது சிறிதாக உயர்த்தப்பட்டு வருகிறது. இதனால், கடந்த ஆறு நாட்களில் பெட்ரோல் விலை ரூ.3.31 வரையிலும், டீசல் விலை ரூ.3.42 வரையிலும் உயர்த்தப்பட்டு இருக்கிறது. அதாவது, சிறிது சிறிதாக உயர்த்தப்பட்டு தற்போது கடந்த வாரத்தை ஒப்பிடுகையில், தொகை குறிப்பிடத்தக்க அளவு உயர்த்தப்பட்டுவிட்டது.

ஏற்கனவே விலை வாசி உயரும் அபாயம் இருக்கும் நிலையில், டீசல் விலை உயர்வு காரணமாக லாரி வாடகை அதிகரிக்கப்படும் என்பதால், அது நிச்சயம் அத்தியாவசிய பொருட்களின் விலை உயர்வுக்கு வழி வகுக்கும் நிலை ஏற்பட்டுள்ளது.

மறுபுறத்தில் இரண்டரை மாதங்களாக வருவாய் இல்லாமல் அல்லது சம்பள குறைப்பு உள்ளிட்ட பிரச்னைகளால் நிதி நெருக்கடியில் இருக்கும் மக்களுக்கு இது அதிர்ச்சியை கொடுத்துள்ளது. இதனால் மத்தளத்திற்கு இரண்டு பக்கமும் அடி என்ற நிலையில் சாமான்ய மக்கள் அல்லல் படும் நிலை ஏற்பட்டுள்ளது.