இந்த 2020 டிசம்பரில் விற்பனைக்கு வர இருக்கும் கார்கள் இவைதான்!! உங்களது தேர்வு எது?

நிஸான் மேக்னைட்

தற்சமயம் இந்திய வாடிக்கையாளர்கள் பலரது எதிர்பார்ப்பில் இருக்கும் கார் நிஸான் மேக்னைட். நிஸானின் முற்றிலும் புதிய தயாரிப்பான இது இந்த டிசம்பர் 2ஆம் தேதியில் இருந்து விற்பனைக்கு வரவுள்ளது. இதனால் இந்த காம்பெக்ட் எஸ்யூவி ரக காருக்கான முன்பதிவுகள் ஏற்கனவே ஆரம்பிக்கப்பட்டுவிட்டன.

மாருதி சுஸுகி விட்டாரா பிரெஸ்ஸா, ஹூண்டாய் வென்யூ மற்றும் சமீபத்திய அறிமுகமான கியா சொனெட்டிற்கு போட்டியாக வரும் மேக்னைட்டை தான் இந்தியாவில் நிஸான் நிறுவனம் நம்பியுள்ளது. இதனால் இந்த காரில் ஏகப்பட்ட வசதிகள், ஆற்றல்மிக்க என்ஜின் தேர்வுகள் மற்றும் அட்டகாசமான தோற்றத்துடன் கொண்டுவரப்பட்டுள்ளன.

ஆடி எஸ்5 ஸ்போர்ட்பேக்

ஆடி நிறுவனம் இந்திய சந்தையில் கணிசமான விற்பனையை பெற வேண்டும் என்பதில் முனைப்புடன் உள்ளது. இதன் வெளிப்பாடாகவே விரைவில் ஆடி பிராண்டில் இருந்து எஸ்5 ஸ்போர்ட்பேக் கார் விற்பனைக்கு வரவுள்ளது. இதன் அறிமுக தேதி இதுவரை வெளியிடப்படவில்லை, நமக்கு தெரிந்தவரை இந்த ஆண்டு முடிவதற்கு உள்ளாக, இந்த டிசம்பர் மாதத்தின் மூன்றாம் வாரத்தில் இருக்கலாம்.

முழுவதும் தயாரிக்கப்பட்ட நிலையில் வெளிநாட்டு தொழிற்சாலையில் இருந்து இந்தியாவிற்கு கொண்டுவரப்படும் இந்த ஸ்போர்ட்பேக் காரில் அதிகப்பட்சமாக 349 பிஎச்பி மற்றும் 500 என்எம் டார்க் திறனை வெளிப்படுத்தக்கூடிய 3.0 லிட்டர் என்ஜின் வழங்கப்படவுள்ளது. ட்ரான்ஸ்மிஷனுக்கு 8-ஸ்பீடு ஆட்டோமேட்டிக் கியர்பாக்ஸ் இணைக்கப்படவுள்ளது.

மெர்சிடிஸ்-பென்ஸ் ஏ-கிளாஸ் லிமௌசைன்

2020 ஆட்டோ எக்ஸ்போ நிகழ்ச்சியில் காட்சிப்படுத்தப்பட்டு இருந்த இந்த பென்ஸ் கார் இந்த ஆண்டு துவக்கத்தில் விற்பனைக்கு வந்துவிடும் என முதலில் எதிர்பார்க்கப்பட்டது. ஆனால் கொரோனாவினால் இதன் அறிமுகம் இந்த டிசம்பர் வரையில் தாமதமாகியுள்ளது.

சி-கிளாஸ் மாடலுக்கு கீழே மெர்சிடிஸின் விலை குறைவான செடான் காராக வெளிவரும் ஏ-கிளாஸ்ஸின் ஆரம்ப விலை ரூ.35 லட்சத்தில் நிர்ணயிக்கப்பட வாய்ப்புள்ளது. மேலும் ஏஎம்ஜி வெர்சனிலும் வெளிவரும் இந்த செடான் காரில் வழங்கப்படவுள்ள என்ஜின் மற்றும் ட்ரான்ஸ்மிஷன் தேர்வுகள் குறித்த எந்த விபரத்தையும் தயாரிப்பு நிறுவனம் இதுவரை வெளியிடவில்லை.

ஃபோர்ஸ் குர்கா பிஎஸ்6

இந்தியா, மஹாராஷ்டிராவை சேர்ந்த ஃபோர்ஸ் மோட்டார்ஸ் நிறுவனம் புதிய (2020) குர்காவை இந்த ஆண்டு துவக்கத்தில் ஆட்டோ எக்ஸ்போவில் காட்சிப்படுத்தியது. இதன் அறிமுகமும் இந்த 2020 டிசம்பர் மாதத்தில் எதிர்பார்க்கப்படுகிறது.

இந்த வாகனத்தில் முக்கிய அம்சமாக அதன் 2.2 லிட்டர் டீசல் என்ஜின் பிஎஸ்6 தரத்தில் கொண்டுவரப்படுகிறது. அதேநேரம் 2020 மஹிந்திரா தாருக்கு போட்டியாக வரும் இந்த வாகனத்தின் தோற்றத்திலும், தொழிற்நுட்ப வசதிகளிலும் சிறிய மாற்றங்கள் கொண்டுவரப்படவுள்ளன.

இவைதான் இந்த 2020ஆம் ஆண்டு முடிவதற்கு உள்ளாக அறிமுகமாகும் என எதிர்பார்க்கப்படும் கார் மாடல்களாகும். இவை அனைத்தும் நிச்சயம் இந்த டிசம்பர் மாதத்தில் அறிமுகமாகும் என்றும் உறுதியாக கூற முடியாது. ஏனெனில் இவற்றில் சில மாடல்களின் அறிமுகம் அடுத்த மாதத்திற்கும் தள்ளிப்போகலாம்.