இனி காருக்கு சாவி தேவையில்லை... ஆப்பிள் நிறுவனத்தின் புரட்சிகர நுட்பம்!

கார்களுக்கான தொழில்நுட்பத்தில் நித்தமும் ஒரு புதுமையான விஷயம் அறிமுகம் செய்யப்பட்டு வருகின்றன. தற்போது கனெக்டெட் கார் எனப்படும் ஸ்மார்ட்ஃபோனையும், காரில் இருக்கும் இன்ஃபோடெயின்மென்ட் சாதனத்தையும் இணைய வசதி மூலமாக நேரடியாக இணைக்கும் வசதி புதிய கார்களில் அறிமுகம் செய்யப்பட்டு வருகிறது.

இந்த தொழில்நுட்பத்தை அடுத்தக் கட்டத்திற்கு எடுத்துச் செல்லும் முயற்சிகளில் கார் நிறுவனங்களுக்கு இடையே போட்டா போட்டி நிலவுகிறது. இந்த நிலையில், மொபைல்போன் தயாரிப்பில் உலக புகழ்பெற்ற ஆப்பிள் நிறுவனம் கார்களுக்கான டிஜிட்டல் சாவி தொழில்நுட்பத்தை அறிமுகப்படுத்தி உள்ளது.

ஆப்பிள் நிறுவனத்தின் ஐபோனில் அதிக பாதுகாப்பு அம்சங்கள் கொண்ட டிஜிட்டல் சாவி செயலி வழங்கப்பட உள்ளது. காரின் டேஷ்போர்டு அருகே உள்ள டிரேயில் ஐபோனை வைத்து புஷ் பட்டனை அழுத்தினால் கார் எஞ்சினை ஸ்டார்ட் செய்வதற்கும், அதேபோன்று அணைப்பதற்கும் இயலும். காரை பூட்டித் திறப்பதற்கும் இனி சாவியை தேவையில்லை.

முதல்கட்டமாக பிஎம்டபிள்யூ சொகுசு கார்களில் இந்த தொழில்நுட்பம் அறிமுகம் செய்யப்பட உள்ளது. பிஎம்டபிள்யூ கார்களின் இன்ஃபோடெயின்மென்ட் சிஸ்டத்துடன் ஆப்பிள் நிறுவனத்தின் டிஜிட்டல் சாவி செயலியை குறிப்பிட்ட வழிகாட்டு முறைகளுடன் இணைத்துக் கொண்டால் போதுமானது. இனி கார் எஞ்சினை ஸ்டார்ட் செய்வதற்கு தனி சாவி தேவைப்படாது.

ஆப்பிள் வாலட் மூலமாக இந்த அதிக பாதுகாப்பு அம்சங்கள் கொண்ட டிஜிட்டல் சாவி செயலியை பிஎம்டபிள்யூ கார் உரிமையாளர்கள் பெறும் வசதி அளிக்கப்பட உள்ளது. இந்த டிஜிட்டல் செயலி மூலமாக எஞ்சினை ஸ்டார்ட் செய்வதற்கும், அணைப்பதற்கும் மட்டுமில்லாமல், காரின் வரம்பை நிர்ணயிப்பது, ரேடியோவில் ஒலி அளவை கட்டுப்படுத்துவது மற்றும் எஞ்சின் செயல்திறனை கட்டுப்படுத்துவதற்கும் பயன்படுத்த முடியும்.

இந்த டிஜிட்டல் சாவி மூலமாக காரின் வசதிகளை பெறுவதற்கு 5 மொபைல்போன்களை இணைத்துக் கொள்ளலாம். ஒருவேளை ஐபோனில் சார்ஜ் இல்லாமல் செயல் இழந்தால் கூட 5 மணிநேரம் வரை இதன் மூலமாக கிடைக்கும் வசதிகளை வாடிக்கையாளர்கள் பெற முடியும். மேலும், ஆப்பிள் வாட்ச்சிலும் இந்த டிஜிட்டல் சாவி செயலியை பயன்படுத்த இயலும் என்று ஆப்பிள் தெரிவித்துள்ளது.

வரும் ஜூலை 1ந் தேதி முதல் உலகின் 45 நாடுகளில் உற்பத்தி செய்யப்பட இருக்கும் பிஎம்டபிள்யூ கார் மாடல்களில் இந்த டிஜிட்டல் சாவி தொழில்நுட்பத்தை சப்போர்ட் செய்யும் இன்ஃபோடெயின்மென்ட் சிஸ்டம் வழங்கப்பட உள்ளது. பிஎம்டபிள்யூ நிறுவனத்தின் 1 சீரிஸ், 2 சீரிஸ், 3 சீரிஸ், 4 சீரிஸ், 5 சீரிஸ், 6 சீரிஸ், 8 சீரிஸ் வரிசை கார்களிலும், எக்ஸ்-5, எக்ஸ்-6, எக்ஸ்-7, எக்ஸ்5எம் மற்றும் இசட்4 ஆகிய கார்களிலும் இந்த வசதி வழங்கப்பட உள்ளது.

அதேபோன்று, பிஎம்டபிள்யூ டிஜிட்டல் சாவியை ஐபோன் எக்ஸ்ஆர், ஐபோன் எக்ஸ்எஸ், ஆப்பிள் 5 சீரிஸ் வாட்ச் மற்றும் புதிதாக அறிமுகமாகும் ஆப்பிள் சாதனங்கள் மூலமாக இணைத்துக் கொள்ளும் வசதி வழங்கப்படும். அதாவது, ஐஓஎஸ்-14 செயலியில் இயங்கும் ஆப்பிள் சாதனங்களில் இந்த வசதி கொடுக்கப்படுகிறது. இது நிச்சயம் கனெக்டெட் கார் தொழில்நுட்பத்தை அடுத்தக் கட்டத்திற்கு எடுத்துச் செல்லும் விஷயமாக பார்க்கப்படுகிறது.