ஓட்டுநரில்லாமல் தானாக இயங்கும் காரை அறிமுகம் செய்த அமேசானின் ஜூக்ஸ்... அமேசானிடம் இப்படி ஒரு நிறுவனம் இருக்கா?

ஆன்லைன் வர்த்தக நிறுவனமான அமேசானுக்கு சொந்தமான ஜூக்ஸ் (Zoox) அதன் ஓட்டுநர் இல்லா ரோபோ-டாக்சியை வெளியீடு செய்துள்ளது. தன்னாட்சி தொழில்நுட்ப வசதிக் கொண்ட இக்கார் எந்த திசையில் வேண்டுமானால் செல்லும் திறனைக் கொண்டிருக்கின்றது.

நான்கு பேர் அமர்ந்து செல்கின்ற வகையில் பெஞ்ச் ரக இருக்கைகள் இக்காரில் வழங்கப்பட்டிருக்கின்றன. இதில், ஓட்டுனருக்கென தனி இருக்கை மற்றும் ஸ்டியரிங் வீல் கொடுக்கப்படவில்லை என்பது குறிப்பிடத்தகுந்தது. இது முழுக்க முழுக்க தன்னாட்சி தொழில்நுட்பத்தின் மூலமாக மட்டுமே இயங்கக் கூடிய வாகனம் ஆகும்.

அடர்த்தியான மக்கள் தொகையைக் கொண்ட நகர்புற பயன்பாட்டிற்கு ஏற்ப இந்த ரோபோ டாக்சி உருவாக்கப்பட்டிருக்கின்றது. இது 12 அடி நீளம் கொண்ட வாகனம் ஆகும். மினி கூப்பர் காரைக் காட்டிலும் சில அடிகள் மட்டுமே நீளம் குறைந்த காராக இது இருக்கின்றது.

ஜூக்ஸ் இந்த ரோபோ டாக்சி, ரிமோட் கார்களைப் போன்று இரு திசையிலும் நகரும் தன்மையைக் கொண்டிருக்கின்றது. இத்துடன், நான்கு வீல்களுக்கும் திரும்பும் திறன் கொடுக்கப்பட்டுள்ளது. எனவே இதனை பக்கவாட்டு பகுதியிலும் இயக்க முடியும். இதன் அதிகபட்ச வேகம் மணிக்கு 75 மைல்கள் ஆகும்.

அப்படி என்றால் மணிக்கு 120 கிமீ வேகத்தில் இது இயங்கும். தற்போது இந்த ரோபோ டாக்சியை பல பரீட்சையில் ஈடுபடுத்தும் பணியில் ஜூக்ஸ் ஈடுபட்டு வருகின்றது. கலிஃபோர்னியாவின் பாஸ்டர் சிட்டியிலேயே இந்த பணிகள் நடைபெற்று வருகின்றன.

இதேபோன்று, லாஸ் வேகாஸ் மற்றும் சேன் பிரான்சிஸ்கோ உள்ளிட்ட இடங்களிலும் ரோபோ டாக்சி சோதனைச் செய்யப்பட்டு வருகின்றது. விரைவில் இந்த நகரங்களிலேயே இந்த ஆளில்லா வாகனம் வாடகை வாகன சேவையில் ஈடுபடுத்தப்பட இருக்கின்றது.

ஜூக்ஸ் ஓர் ஆரம்பநிலை வாகன தயாரிப்பு நிறுவனம் ஆகும். 2014ம் ஆண்டே இந்த நிறுவனம் சிலிக்கான் வாலியில் தொடங்கப்பட்டது. இதனை நடப்பாண்டின் ஜூன் மாதத்திலேயே ஆன்லைன் வர்த்தக தளமான அமேசான் கையகப்படுத்தியது.

இதைத்தொடர்ந்து, தற்போது அமேசானின் ஆதரவுடன் அந்நிறுவனம் இயங்கத் தொடங்கியிருக்கின்றது. அமேசான் நிறுவனத்தின் துணை நிறுவனமாக இது இருந்தாலும், தற்போது அது சுந்திரமாக இயங்கி வருவது குறிப்பிடத்தகுந்தது. இதனடிப்படையிலேயே புதிய ஜூக்ஸ் ரோபோ டாக்சி வெளியீடு உள்ளது.

இந்த வாகனத்தின் உட்புற பகுதி பிரம்மிப்பை ஏற்படுத்தும் வகையில் வடிவமைக்கப்பட்டுள்ளது. அதாவது, ரோல்ஸ் ராய்ஸ் போன்ற விலையுயர்ந்த சொகுசு கார்களில் இருப்பதைப் போன்று நட்சத்திர மின் விளக்கு அமைப்பு டாக்சியின் மேற்பரப்பில் கொடுக்கப்பட்டுள்ளது. இத்துடன், பயணிகளுக்கு பொழுதுபோக்குகின்ற தனி மியூசிக் சிஸ்டம் மற்றும் சொகுசான இருக்கை வசதி உள்ளிட்டவை வழங்கப்பட்டிருக்கின்றன.

உலகம் முழுவதிலும் தன்னாட்சி திறன் கொண்ட வாகனங்கள் பயன்பாட்டிற்கு வர தொடங்கியுள்ளன. இந்த தொழில்நுட்ப வசதிக் கொண்ட வாகனங்கள் மனித மூளையைக் காட்டிலும் அதி வேகத்தில் செயல்படக்கூடியவை என்பதால் அதிக பாதுகாப்புக் கொண்டவையாகக் கருதப்படுகின்றது. இதன்காரணத்தினலாயே உயர்ரக கார்களில் தன்னாட்சி தொழில்நுட்ப வசதியை வாகன உற்பத்தி நிறுவனங்கள் அறிமுகம் செய்யத் தொடங்கியுள்ளன. தொடர்ந்து, டாக்சி மற்றும் டெலிவரி போன்ற சேவையில் ஈடுபடுத்தப்படும் வாகனங்களிலும் இந்த தொழில்நுட்பம் அறிமுகம் செய்யப்பட்டு வருகின்றது.