பெங்களூரில் முதல் லே மைசன் ஷோரூமை திறந்தது சிட்ரோன்!! சி5 எஸ்யூவி காருக்கான முன்பதிவு துவங்கும் தேதி அறிவிப்பு

பெங்களூரில் கன்னிகம் சாலையில் திறக்கப்பட்டுள்ள இந்த புதிய ஷோரூம் மூலம் வாடிக்கையாளர்கள் இயற்பியல் முறையிலும், டிஜிட்டல் முறையிலும் கார் வாங்கும் அனுபவத்தை பெறலாம்.

இந்த அனுபவத்தை வாடிக்கையாளர்களுக்கு வழங்க ATAWADAC (எந்த நேரத்திலும் எந்த சாதனத்திலும் எந்த உள்ளடக்கமும்) தொழிற்நுட்ப வசதியை தயாரிப்பு நிறுவனம் கொண்டுவந்துள்ளது.

இதன்படி ஷோரூமுக்கு வருகை தரும் வாடிக்கையாளர்கள் தங்களது முதன்மை சலுகையான சி5 ஏர்கிராஸ் எஸ்யூவியை நேரடியாகப் பார்ப்பார்கள், அதே நேரத்தில் டிஜிட்டல் தளத்தைப் பயன்படுத்தி எஸ்யூவியைத் தனிப்பயனாக்கவும், அவர்களின் தேவைக்கேற்ப மாற்றியமைத்தும் பார்க்க முடியும்.

விற்பனை மட்டுமின்றி, பெங்களூரில் அமைத்துள்ள லா மைசன் சிட்ரோன் ஷோரூம் மூலம் தனது வாடிக்கையாளர்களுக்கு முழு அளவிலான விற்பனைக்குப் பிந்தைய சேவைகள் மற்றும் டெஸ்ட் டிரைவ் அனுபவங்களையும் வழங்கும். சிட்ரோன் நிறுவனம் நிதி, காப்பீடு மற்றும் பிற சலுகைகளையும், 30 நிமிட உத்தரவாத வர்த்தக வசதியையும் இந்த ஷோரூமில் வழங்கவுள்ளது.

பெங்களூரில் தற்போது திறக்கபட்டிருப்பது சிட்ரோன் பிராண்டின் மூன்றாவது இந்திய ஷோரூம் ஆகும். முதல் டீலர்ஷிப் மையம் அகமதாபாத்திலும், இரண்டாவது ஷோரூம் நமது சென்னையில், ஆயிரம் விளக்கு பகுதியிலும் திறக்கப்பட்டது.

புதிய டீலர்ஷிப் மையத்தை திறந்தது குறித்து சிட்ரோன் இந்தியா நிறுவனத்தின் விற்பனை பிரிவின் துணை தலைவர் ஜோயல் வெரானி கூறுகையில், "இந்த லா மைசன் சிட்ரோன் இயற்பியல்-டிஜிட்டல் ஷோரூம்கள் மூலம், இந்திய கார் நுகர்வோர் தனது கார் வாங்கும் அனுபவத்தை மேம்படுத்த முடியும் என்று நாங்கள் நம்புகிறோம். சி5 ஏர்கிராஸ் எஸ்யூவி அறிமுகப்படுத்தப்படும் நேரத்தில், சிட்ரோன் இந்தியாவின் 10 முக்கிய நகரங்களில் லா மைசன் ஷோரூம்களை கொண்டிருக்கும்"

புதிய லா மைசன் சிட்ரோன் ஷோரூம் அறிமுகப்படுத்தப்படுவதோடு, தங்களின் வரவிருக்கும் சி5 ஏர்கிராஸ் எஸ்யூவிக்கான முன்பதிவு வருகிற மார்ச் 1 ஆம் தேதி தொடங்கும் என்றும் நிறுவனம் அறிவித்துள்ளது. டீலர்ஷிப்பிலும் ஆன்லைனிலும் ஏற்றுக்கொள்ளப்படவுள்ள இந்த முன்பதிவிற்கான முன் தொகை ரூ.50,000 ஆக நிர்ணயிக்கப்பட்டுள்ளது.

டெலிவிரி பணிகள் கார் அறிமுகப்படுத்தப்பட்டு சில நாட்களிலேயே துவங்கப்பட்டுவிடும். சிட்ரோன் சி5 ஏர்க்ராஸ் காரை வாங்கும் வாடிக்கையாளர்களுக்கு ஆர்எஸ்ஏ உதவி, நிலையான 5-வருட உத்தரவாதம் உள்ளிட்ட சலுகைகள் வழங்கப்படவுள்ளன.