10 லட்ச ரூபாயில் 7-சீட்டர் காரை வாங்குவது குதிரை கொம்பு... ரெனால்ட் கம்பெனியை இதுக்காகவே பாராட்டி ஆகணும்!

இந்த 2025ஆம் ஆண்டில் 10 லட்சம் ரூபாய்க்குள் 7 இருக்கைகள் கொண்ட காரை வாங்க விரும்புவோருக்கு, ரெனால்ட் டிரைபர் (Renault Triber) மற்றும் மாருதி சுஸுகி ஈக்கோ (Maruti Suzuki Eeco) ஆகியவை சிறந்த மற்றும் பிரபலமான தேர்வுகளாகும். மாருதி எர்டிகா, மஹிந்திரா பொலிரோ மற்றும் பொலிரோ நியோ போன்ற கார்களின் அடிப்படை மாடல்கள் 10 லட்சம் ரூபாய் எக்ஸ்-ஷோரூம் விலைக்குக் கீழ் இருந்தாலும், அவற்றின் ஆன்-ரோடு விலை இந்த பட்ஜெட்டைத் தாண்டிவிடும்.

ரெனால்ட் டிரைபர் (Renault Triber): இந்தியாவின் விலை குறைவான எம்பிவி (MPV) ரக காராக டிரைபர் விளங்குகிறது. பட்ஜெட்டுக்கு ஏற்ற MPV-யான டிரைபர் பணத்திற்கான சிறந்த மதிப்பை (value-for-money) வழங்கும் காராக அறியப்படுகிறது. குடும்பமாக பயணிப்பதற்கு இது ஒரு சிறந்த தேர்வாகும். டிரைபர் காரில் 1.0 லிட்டர் பெட்ரோல் என்ஜின் பொருத்தப்படுகிறது.

இது 71 பிஎச்பி இயக்க ஆற்றலையும், 96 என்.எம் டார்க்கையும் வெளிப்படுத்துகிறது. ARAI சான்றிதழின்படி டிரைபர் எம்பிவி காரின் மைலேஜ் 20 kmpl ஆகும். மூன்று இருக்கை வரிசைகள் உடன் வரும் டிரைபர் காரினுள் மூன்றாவது வரிசை இருக்கையைத் தேவைக்கேற்ப அகற்றலாம். இந்த காரின் மூன்றாவது வரிசை இருக்கைகள் பெரியவர்களுக்கு சற்றே இட நெருக்கடியாக இருந்தாலும், குழந்தைகளுக்கும், குறுகிய பயணங்களுக்கும் உகந்ததாக உள்ளது.

2025ஆம் ஆண்டுக்கான அப்டேட்டாக டிரைபரின் பாதுகாப்பு மற்றும் தொழிற்நுட்ப அம்சங்கள் மெருகேற்றப்பட்டுள்ளன. இதன்படி, டூயல் ஏர்பேக்குகள், EBD உடன் ABS, மற்றும் உயர் வகைகளில் 8 இன்ச் தொடுதிரை இன்ஃபோடெயின்மென்ட் சிஸ்டம் ஆகியவை புதியதாக வழங்கப்பட்டன. ரெனால்ட் டிரைபரின் எக்ஸ்-ஷோரூம் விலை (Ex-Showroom Price) தற்சமயம் ரூ.6.30 லட்சம் முதல் ரூ.9.40 லட்சம் வரை உள்ளது.

மாருதி சுஸுகி ஈக்கோ (Maruti Suzuki Eeco): இது ஒரு பட்ஜெட் விலையிலான வேன் ஆகும். இது மக்களை ஏற்றிச் செல்லவும், பொருட்களைக் கொண்டு செல்லவும் மிகவும் நம்பகமான மற்றும் பயனுள்ள வாகனமாகும். 7 இருக்கைகள் கொண்ட மாடலான இது 1.2 லிட்டர் பெட்ரோல் என்ஜின் உடன் வருகிறது.

இது 80 bhp சக்தியையும், 104.4 Nm டார்க்கையும் உற்பத்தி செய்கிறது. மேலும், மேம்பட்ட எரிபொருள் சிக்கனத்திற்காக சிஎன்ஜி ஆப்ஷனிலும் இந்த கார் கிடைக்கிறது. ஈக்கோவில் ஸ்லைடிங் கதவுகள் வழங்கப்படுகின்றன. இதன் எளிமையான வடிவமைப்பு வியக்கத்தக்க வகையில் விசாலமான உட்புற இடவசதியை வழங்குகிறது.

மூன்றாவது வரிசை இருக்கைகள் சற்று இறுக்கமாக இருந்தாலும், குறுகிய பயணங்களுக்குப் போதுமானது ஆகும். பாதுகாப்பைப் பொறுத்தவரை, ஈக்கோவில் டூயல் ஏர்பேக்குகள், EBD உடன் ABS மற்றும் பின்புற பார்க்கிங் சென்சார்கள் வழங்கப்படுகின்றன. 7 இருக்கைகளை கொண்ட மாருதி சுஸுகி ஈக்கோவின் எக்ஸ்-ஷோரூம் விலை ரூ.5.73 லட்சத்தில் இருந்து துவங்குகிறது.

மாருதி சுஸுகி எர்டிகா (Maruti Suzuki Ertiga): எர்டிகா காரின் அடிப்படை எல்.எக்ஸ்.ஐ (LXi) வேரியண்ட்டின் எக்ஸ்-ஷோரூம் விலை 10 லட்சம் ரூபாய்க்குள் வருகிறது. ஆனால் இதன் ஆன்-ரோடு விலை ரூ.10 லட்சத்திற்கும் அதிகமாக இருக்கும். இது டிரைபரை விட மிகவும் மேம்பட்ட மற்றும் அம்சங்கள் நிறைந்த எம்பிவி கார் ஆகும்.

மஹிந்திரா பொலிரோ நியோ (Mahindra Bolero Neo): பொலிரோ நியோ காரின் விலை குறைவான எண்ட்ரீ-லெவல் என்4 வேரியண்ட்டின் எக்ஸ்-ஷோரூம் விலை 10 லட்சம் ரூபாய்க்கும் சற்று குறைவாக உள்ளது. டீசல் என்ஜின் உடன் இந்த மஹிந்திரா கார் வலிமையான மற்றும் கடினமான டிரைவிங் அனுபவத்தை வழங்குகிறது. ஆனால் இதன் ஆன்-ரோடு விலை 10 லட்ச ரூபாய்க்கும் அதிகமாக இருக்கும்.

மஹிந்திரா பொலிரோ (Mahindra Bolero): தோற்றத்தில் கொஞ்சம் வித்தியாசமாக இருப்பினும் பொலேரோ மற்றும் பொலிரோ நியோ இரண்டும் ஒன்றே ஆகும். பொலிரோ நியோவை போன்று, பொலிரோவின் எண்ட்ரீ-லெவல் வேரியண்ட்டான பி4-இன் விலையும் 10 லட்சம் ரூபாய் எக்ஸ்-ஷோரூம் விலைக்கு அருகில் உள்ளது. இதன் ஆன்-ரோடு விலை அதிகமாக இருக்கும். இது ஒரு நீடித்த மற்றும் வலுவான பயன்பாட்டு வாகனமாகும்.

டிரைவ்ஸ்பார்க் கருத்து: இன்றைய காலத்தில், கார் வாங்குபவர்கள் அதிக இருக்கை வசதிகள் உடன் கார் வாங்கவே விரும்புகின்றனர். இதனால், கார் நிறுவனங்களும் முடிந்தவரையில் அதிக இருக்கை வசதிகள் உடன் கார்களை அறிமுகம் செய்ய விரும்பினாலும், ரூ.10 லட்சத்திற்குள் 7-சீட்டர் ஆப்ஷனில் சற்று குறைவான எண்ணிக்கையிலான கார்களே இந்திய மார்க்கெட்டில் விற்பனை செய்யப்படுகின்றன.