எந்த காராக இருந்தாலும் சரி... முன் இருக்கையில் அமர்பவர்கள் காரில் இது இருந்தாலே குஷி ஆகிடுவாங்க!

இந்தியச் சந்தையில், 10 லட்சம் ரூபாய்க்கும் குறைவான விலையில் சில கார்கள் சென்ட்ரல் கன்சோல் ஆர்ம்ரெஸ்ட் (Central Concole Armrest) உடன் கிடைக்கின்றன. அதாவது, முன் இருக்கைகளுக்கு மத்தியில், பயணிகள் ஓய்விற்காக தங்களது கைகளை வைத்துக் கொள்ளும் அம்சமாகும். இந்த வசதியானது டாடா பன்ச், ஹூண்டாய் வென்யூ, மாருதி சுஸுகி ஃபிரான்க்ஸ், ஹோண்டா அமேஸ் கார்களில் கூடுதல் விலை கொடுத்து வாங்கும் ஆக்ஸஸரீயாகவோ அல்லது விலைமிக்க டாப் வேரியண்ட்களில் ஸ்டாண்டர்ட் அம்சமாகவோ வழங்கப்படுகிறது.

டாடா பன்ச் (Tata Punch): தனது உறுதியான கட்டமைப்பு மற்றும் சிறந்த பாதுகாப்பு மதிப்பீட்டிற்காக அறியப்படும் இந்த டாடா மைக்ரோ-எஸ்யூவி (Micro-SUV) காரின் எக்ஸ்-ஷோரூம் விலைகள் ரூ.6 லட்சம் முதல் ரூ.10.10 லட்சம் வரை உள்ளன. 1.2 லிட்டர் பெட்ரோல் என்ஜின் (87 bhp/ 115 Nm டார்க்) பொருத்தப்படும் இந்த கார், 18.8 முதல் 20 கிமீ/லிட்டர் மைலேஜையும், பன்ச் சிஎன்ஜி (CNG) கார் 26.99 கிமீ/கிலோ மைலேஜையும் வழங்குகிறது.

இந்த காரின் டாப் வேரியண்ட்களில் பெரிய கன்சோலுடன் முன் இருக்கைகளுக்கு மத்தியில் ஆர்ம்ரெஸ்ட் கிடைக்கிறது. மேலும், இதில் 10.25 இன்ச் டச்ஸ்கிரீன் இன்ஃபோடெயின்மென்ட் சிஸ்டம், ஆட்டோமேட்டிக் கிளைமேட் கண்ட்ரோல், க்ரூஸ் கண்ட்ரோல் மற்றும் ரிவர்ஸ் பார்க்கிங் கேமரா போன்ற அம்சங்களும் உள்ளன. டாடா பன்ச், பெரியவர்களின் பாதுகாப்பிற்காக 5-நட்சத்திர குளோபல் NCAP பாதுகாப்பு மதிப்பீட்டைப் பெற்றுள்ளது.

ஹூண்டாய் வென்யூ (Hyundai Venue): இந்தியாவின் சப்-காம்பாக்ட் எஸ்யூவி கார்கள் பிரிவில் பிரபலமான மாடலாக உள்ள இதன் எக்ஸ்-ஷோரூம் விலைகள் ரூ.7.90 லட்சம் முதல் ரூ.10.64 லட்சம் வரை உள்ளன. 1.2 லிட்டர் பெட்ரோல் (82 bhp) மற்றும் 1.0 லிட்டர் டர்போ-பெட்ரோல் (118 bhp) என்ஜின் ஆப்ஷன்கள் உடன் விற்பனை செய்யப்படும் வென்யூ காரின் மைலேஜ் 18.5 கிமீ/லிட்டர் முதல் 20.99 கிமீ/லிட்டர் வரை என்ஜின் & கியர்பாக்ஸ் ஆப்ஷனை பொறுத்து கிடைக்கிறது.

வென்யூவின் பல்வேறு வேரியண்ட்களில் ஸ்டோரேஜ் பகுதியுடன் கூடிய முன்பக்க சென்ட்ரல் ஆர்ம்ரெஸ்ட் கிடைக்கிறது. இந்த காரின் டாப் வேரியண்ட்களில் 10.25 இன்ச் டச்ஸ்கிரீன், பின் இருக்கை பயணிகளுக்கும் ஏசி வென்ட்கள் மற்றும் வயர்லெஸ் சார்ஜர் போன்ற அம்சங்கள் வழங்கப்படுகின்றன. பாதுகாப்பு அம்சங்களைப் பொறுத்தவரை, 6 ஏர்பேக்குகள், இபிடி உடன் ஏபிஎஸ் மற்றும் எலெக்ட்ரானிக் ஸ்டெபிலிட்டி கண்ட்ரோல் (ESC) ஆகியவற்றை இந்த கார் கொண்டுள்ளது.

மாருதி சுஸுகி ஃபிரான்க்ஸ் (Maruti Suzuki Fronx): ஸ்போர்ட்டியான கூபே போன்ற வடிவமைப்புடன் கூடிய க்ராஸ்ஓவர் (Crossover) எஸ்யூவி காரான இதன் எக்ஸ்-ஷோரூம் விலைகள் ரூ.6.85 லட்சம் முதல் ரூ.11.84 லட்சம் வரை இருப்பினும், பல வேரியண்ட்கள் 10 லட்சத்திற்கும் குறைவான விலையில் கிடைக்கின்றன. 1.2 லிட்டர் (89 bhp) மற்றும் 1.0 லிட்டர் டர்போ பூஸ்டர்ஜெட் (99 bhp) என இரண்டு பெட்ரோல் என்ஜின் ஆப்ஷன்கள் இந்த காரில் வழங்கப்படுகின்றன.

இந்த கார் 20 கிமீ/லிட்டர் முதல் 22.89 கிமீ/லிட்டர் வரை மைலேஜ் தருகிறது. ஃபிரான்க்ஸ் காரின் சிஎன்ஜி வேரியண்ட் இன்னும் ஒருபடி மேலே சென்று 28.51 கிமீ/கிலோ மைலேஜை வழங்குகிறது. ஃபிரான்க்ஸ் காரின் ஸெட்டா (Zeta) மற்றும் ஆல்பா (Alpha) வேரியண்ட்களில் முன் சென்ட்ரல் ஆர்ம்ரெஸ்ட் கிடைக்கிறது. 9 இன்ச் ஸ்மார்ட்பிளே புரோ+ இன்ஃபோடெயின்மென்ட் சிஸ்டம், 360-டிகிரி கேமரா மற்றும் ஹெட்ஸ்-அப் டிஸ்ப்ளே (HUD) போன்ற அம்சங்களும் இந்த வேரியண்ட்களில் இடம்பெறுகின்றன.

ஹோண்டா அமேஸ் (Honda Amaze): விசாலமான கேபின் மற்றும் நம்பகமான ஓட்டுநர் அனுபவத்திற்காக அறியப்படும் இந்த காம்பாக்ட் செடான் காரின் எக்ஸ்-ஷோரூம் விலைகள் ரூ.7.41 லட்சத்தில் இருந்து தொடங்குகின்றன. 1.2 லிட்டர் i-VTEC பெட்ரோல் என்ஜின் (89 bhp/110 Nm டார்க்) இதில் பொருத்தப்படுகிறது. மேலும் டாப் வேரியண்ட்களில் டீசல் என்ஜின் ஆப்ஷனும் கிடைக்கிறது.

அமேஸ் பெட்ரோல் மேனுவல் வேரியண்ட் 18.6 கிமீ/லிட்டர் மைலேஜையும், சிவிடி (CVT) ஆட்டோமேட்டிக் வேரியண்ட் 19.46 கிமீ/லிட்டர் மைலேஜையும் வழங்குகிறது. வி.எக்ஸ் (VX) போன்ற டாப் வேரியண்ட்களில் கப் ஹோல்டர்களுடன் கூடிய பின்பக்க சென்ட்ரல் ஆர்ம்ரெஸ்ட் ஒரு முக்கிய அம்சமாகும். இரட்டை ஏர்பேக்குகள், இபிடி உடன் ஏபிஎஸ் மற்றும் பின்பக்க பார்க்கிங் சென்சார்கள் போன்ற பாதுகாப்பு அம்சங்களும் இந்த வேரியண்ட்களில் உள்ளன.

டிரைவ்ஸ்பார்க் கருத்து: கார்களில் முன் இருக்கைகளுக்கு மத்தியில் ஆர்ம்ரெஸ்ட் ஆனது பயணிகளின் சவுகரியத்தை கூட்டுவது மட்டுமின்றி, கேபின் அழகையும் மேம்படுத்துகிறது. இதனாலேயே இன்றைய காலத்தில் கார் வாங்குபவர்களில் பெரும்பாலானவர்கள் இந்த அம்சத்துடன் கார் வாங்க விரும்புகின்றனர். அந்த வகையில் ரூ.10 லட்சத்திற்குள் கிடைக்கும் இந்த கார்களுள் ஒன்றை வாங்குவது சிறந்த முடிவாக இருக்கும்.