10 லட்ச ரூபாய்க்கு கொஞ்சம் தான் அதிகம்... இதில் ஒரு காரை வாங்கினால் தைரியமா டிரைவர் சீட்டில் அமரலாம்!

இந்தியாவில் 2025ஆம் ஆண்டின் இறுதி நிலவரப்படி, 10 லட்ச ரூபாய்க்குள் விலை கொண்ட எந்த ஒரு காரிலும் பிளைண்ட் ஸ்பாட் கண்டறிதல் (BSD) வசதி இல்லை. குறைந்தப்பட்சமாக எந்த கார்களில் இதனை பெறலாம் என்றால், மஹிந்திரா எக்ஸ்யூவி 3எக்ஸ்ஓ (Mahindra XUV 3XO) மற்றும் கியா சொனெட் (Kia Sonet) போன்ற கார்களில், இந்த அம்சம் 10- 12 லட்சம் ரூபாய் விலையில் கிடைக்கின்றன.

சில ADAS தொகுப்புகளில் பிளைண்ட் ஸ்பாட் மானிட்டரிங் (Blind Spot Monitoring) இருந்தாலும், இந்தத் தொழில்நுட்பம் ஒரு மேம்பட்ட பாதுகாப்பு அம்சமாகக் கருதப்படுகிறது. இதனால், இது பொதுவாக 10 லட்ச ரூபாய்க்குக் குறைவான பட்ஜெட்டில் வரும் அடிப்படை மற்றும் நடுத்தர ரக கார் வேரியண்ட்களில் கிடைப்பதில்லை.

உங்கள் பட்ஜெட் சற்று அதிகமாக இருந்தால், 10 லட்சம் ரூபாய்க்கு மேல் விலையுள்ள சில கார்களை பிளைண்ட் ஸ்பாட் கண்டறிதல் வசதி உடன் பெறலாம். அவ்வாறான, 10 முதல் 13 லட்சம் ரூபாய் வரையிலான பட்ஜெட்டில் பிளைண்ட் ஸ்பாட் மானிட்டரிங் வசதியுடன் சிறந்த கார்களை இனி காணலாம்.

ஹூண்டாய் வென்யூ (Hyundai Venue): பிளைண்ட் ஸ்பாட் மானிட்டரிங் சிஸ்டத்தை வழங்கும் மிகவும் மலிவு விலையிலான கார்களில் இது ஒன்றாகும். இதன் எஸ்.எக்ஸ் (ஆப்ஷ்னல்) (SX(O)) வேரியண்ட் 12 லட்ச ரூபாய்க்கும் அதிகமாக விலையிடப்பட்டுள்ளது. இந்த காரின் ADAS தொகுப்பில் பிளைண்ட் ஸ்பாட் மானிட்டரிங் வசதி மட்டுமின்றி, முன்பக்க கார் மோதலுக்கு உள்ளாகுவது குறித்த வார்னிங், சாலையில் ஒரே பாதையை தொடர்வதற்கான உதவி மற்றும் டிரைவரின் கவனம் சாலையில் இருந்து குறைந்தால் அதுகுறித்த வார்னிங் போன்ற அம்சங்களும் அடங்குகின்றன.

மஹிந்திரா எக்ஸ்யூவி 3எக்ஸ்ஓ: லெவல் 2 ADAS அம்சங்களை வழங்கும், 4 மீட்டருக்கும் குறைவான நீளம் கொண்ட எஸ்யூவி (SUV) கார் இது ஆகும். இதில், பிளைண்ட் வியூ மானிட்டர் வசதி உள்ளது. இந்த மஹிந்திரா காரின் ஏ.எக்ஸ்5 எல் (AX5 L) மற்றும் ஏ.எக்ஸ்7 எல் (AX7 L) வேரியண்ட்களில் ADAS அம்சங்கள் கிடைக்கின்றன. ADAS தொழில்நுட்பத்துடன் இந்த வேரியண்ட்கள் 11.50 லட்சம் ரூபாய் எக்ஸ்-ஷோரூம் விலையில் கிடைக்கின்றன.

கியா சொனெட்: பிளைண்ட் ஸ்பாட் மானிட்டரிங் உட்பட ஒரு விரிவான ADAS தொகுப்பை இந்த எஸ்யூவி கார் வழங்குகிறது. இந்த ADAS அம்சம் அதன் உயர்மட்ட ஜிடிஎக்ஸ்+ (GTX+) மற்றும் X-லைன் வேரியண்ட்களில் கிடைக்கிறது. BSD வசதியுடன் கூடிய இந்த வேரியண்ட்களை வாங்க 13 லட்ச ரூபாய்க்கும் அதிகமாக செலவழிக்க வேண்டியிருக்கும்.

மாருதி சுஸுகி பலேனோ (Maruti Suzuki Baleno): இந்த மாருதி காரில் பிளைண்ட் ஸ்பாட் மானிட்டரிங் வசதி ADAS தொகுப்பின் ஒரு பகுதியாக இல்லை. மாறாக இது 360-டிகிரி கேமரா அமைப்பைப் பயன்படுத்தி பிளைண்ட் ஸ்பாட்களுக்கு உதவுகிறது. 360-டிகிரி கேமரா ஆனது பலேனோவில் டாப் வேரியண்ட்டான ஆல்பாவில் கிடைக்கிறது.

டாப் வேரியண்ட்டாக இருப்பினும் ஆல்பா வேரியண்ட்டின் விலை 10 லட்ச ரூபாய்க்கும் குறைவாகவே உள்ளது. பலேனோவின் பிளைண்ட் ஸ்பாட் அசிஸ்ட் செயல்பாடு அதன் 360 டிகிரி கேமராவைச் சார்ந்துள்ளது. இது ADAS பொருத்தப்பட்ட வாகனங்களில் காணப்படும் ரேடார் அடிப்படையிலான பிளைண்ட் ஸ்பாட் மானிடரிங் அளவிற்கு அதிநவீனமானது கிடையாது.

டிரைவ்ஸ்பார்க் கருத்து: பிளைண்ட் ஸ்பாட் என்பது காரை சுற்றிலும் டிரைவரால் பார்க்க முடியாத பகுதிகள் ஆகும். இவை சென்சார்கள் மற்றும் ரேடார்கள் மூலமாக செயல்படுவதினாலேயே இவை வழங்கப்படும் கார்களின் விலைகள் ரூ.10 லட்சத்திற்கும் சற்று அதிகமாக உள்ளன. பாதுகாப்பான டிரைவிங்கை எதிர்பார்ப்பவர்களுக்கு இந்த வசதி ஆனது அவசியமானதாக இருக்கும்.