காரில் அதிக மைலேஜை பெற சிலர் ஃபாலோ பண்ணுவது! 10 லட்ச ரூபாய் கார்களிலும் கிடைக்குதுனு சொன்னா நம்புவீங்களா?

இந்தியாவில் பத்து லட்ச ரூபாய்க்கும் குறைவான விலையில் கிடைக்கும் பல பிரபலமான கார்களில் கியர் ஷிஃப்ட் இன்டிகேட்டர் (Gear Shift Indicator) வசதி உள்ளது. எரிபொருள் சிக்கனத்தை மேம்படுத்தும் நோக்கில், இந்த வசதி மேனுவல் (Manual) கார்களில் மற்றும் ஆட்டோமேட்டிக் (AMT) கார்களிலும் காணப்படுகிறது. பத்து லட்ச ரூபாய்க்குள் இந்த அம்சத்துடன் கிடைக்கும் சில சிறந்த கார்கள்...

மாருதி சுஸுகி ஸ்விஃப்ட் (Maruti Suzuki Swift): டிரைவிங் இயக்கவியலுக்குப் பெயர் பெற்ற ஒரு பிரபலமான மற்றும் எரிபொருள் திறன் கொண்ட ஹேட்ச்பேக் கார் இது ஆகும். இதன் VXi மற்றும் ZXi வேரியண்ட்கள், ஏஎம்டி கியர்பாக்ஸ் ஆப்ஷன்கள் உட்பட, கியர் ஷிஃப்ட் இன்டிகேட்டர் வசதியுடன் வருகின்றன. இவை ரூ.10 லட்சம் பட்ஜெட்டிற்குள் அடங்குகின்றன.

டாடா பன்ச் (Tata Punch): இந்த மைக்ரோ-எஸ்யூவி கார், 5-நட்சத்திர குளோபல் NCAP பாதுகாப்பு மதிப்பீட்டைக் கொண்டுள்ளது. இதன் அனைத்து வேரியண்ட்களிலும் கியர் ஷிஃப்ட் இன்டிகேட்டர் வசதி உள்ளது. அதேபோல், இந்த காரின் அனைத்து வேரியண்ட்களும் பத்து லட்ச ரூபாய்க்கும் குறைவான எக்ஸ்-ஷோரூம் விலையில் கிடைக்கின்றன.

மாருதி சுஸுகி பலேனோ (Maruti Suzuki Baleno): விசாலமான உட்புறம் மற்றும் எரிபொருள் சிக்கனத்திற்கு பெயர் பெற்ற ஒரு பிரீமியம் ஹேட்ச்பேக் கார் இது ஆகும். இதன் டெல்டா மற்றும் ஸெட்டா வேரியண்ட்கள், மேனுவல் மற்றும் ஏஎம்டி கியர்பாக்ஸ் ஆப்ஷன்கள் இரண்டிலும், கியர் ஷிஃப்ட் இன்டிகேட்டருடன் வருகின்றன. இவற்றின் விலைகளும் இந்த பட்ஜெட்டிற்குள் பொருந்தும்.

ஹூண்டாய் எக்ஸ்டர் (Hyundai Exter): டாடா பன்ச் காருக்கு போட்டியாக விற்பனை செய்யப்படும் ஹூண்டாயின் இந்த அளவில் சிறியதான மைக்ரோ-எஸ்யூவி கார், பல்வேறு அம்சங்களுடன் வருகிறது. பத்து லட்ச ரூபாய்க்கும் குறைவான விலையில் இதன் பல வேரியண்ட்களில் கியர் ஷிஃப்ட் இன்டிகேட்டர் வசதி கிடைக்கிறது.

டாடா டியாகோ/ டிகோர் (Tata Tiago/ Tigor): டாடா மோட்டார்ஸின் டியாகோ ஹேட்ச்பேக் கார் மற்றும் டிகோர் காம்பாக்ட் செடான் கார், வலுவான கட்டமைப்பு மற்றும் ஹார்மன் ஆடியோ சிஸ்டம் போன்ற அம்சங்களுக்கு பெயர் பெற்றவை. இவற்றின் ஏஎம்டி மற்றும் மேனுவல் வேரியண்ட்களில் கியர் ஷிஃப்ட் இன்டிகேட்டர் வசதி உள்ளது.

ரெனால்ட் க்விட் (Renault Kwid): மிகவும் மலிவான விலையில் கிடைக்கும் இந்த ரெனால்ட் ஹேட்ச்பேக் காரின் டாப்-எண்ட் வேரியண்ட்களில் டிஜிட்டல் இன்ஸ்ட்ருமென்ட் கிளஸ்டரின் ஒரு பகுதியாக கியர் ஷிஃப்ட் இன்டிகேட்டர் வழங்கப்படுகிறது. இந்தியாவின் மிகவும் விலை குறைவான ஹேட்ச்பேக் காரான க்விட்டின் எக்ஸ்-ஷோரூம் விலைகள் தற்சமயம் ரூ.4.30 லட்சம்- ரூ.5.99 லட்சமாக உள்ளன.

ஹோண்டா அமேஸ் (Honda Amaze): இந்த காம்பாக்ட் செடான் காரின் மேனுவல் கியர்பாக்ஸ் வேரியண்ட்களில் கியர் ஷிஃப்ட் இன்டிகேட்டர் கிடைக்கிறது. இது மென்மையாக செயல்படும் சிவிடி ஆட்டோமேட்டிக் கியர்பாக்ஸ் ஆப்ஷனிலும் வழங்கப்படுகிறது. இதன் பல வேரியண்ட்கள் பட்ஜெட்டிற்குள் அடங்குகின்றன. அமேஸ் காரின் எக்ஸ்-ஷோரூம் விலைகள் ரூ.7.41 லட்சத்தில் இருந்து ரூ.10 லட்சம் வரையில் உள்ளன.

டிரைவ்ஸ்பார்க் கருத்து: பெயருக்கு ஏற்ப கியர் ஷிஃப்ட் இண்டிகேட்டர் ஆனது காரில் எந்த கியர் பயன்பாட்டில் உள்ளது என்பதை டிரைவருக்கு முன்னால் இருக்கும் டிஸ்பிளேவில் காட்டும் வசதி ஆகும். மேலும், உங்களது அடுத்த கியர் எதுவாக இருந்தால் காரில் அதிக மைலேஜை பெற முடியும் என்பதையும் பரிந்துரைப்பது ஆகும். இத்தகைய வசதி உடன் ரூ.10 லட்சத்திற்குள் கிடைக்கும் கார்களுள் ஒன்றை வாங்குவது சிறந்த முடிவாக இருக்கும்.