ஸ்மார்ட்போன் இணைப்புக்காக கண்மூடித்தனமா எல்லா கார்களையும் வாங்காதீங்க! 10 லட்ச ரூபாய்க்குள் இத்தனை கிடைக்குது!

இந்தியாவில் பத்து லட்ச ரூபாய்க்கும் குறைவான விலையில் கிடைக்கும் பல கார்கள், தங்கள் நடுத்தர மற்றும் உயர் ரக வேரியண்ட்களில் ஆண்ட்ராய்டு ஆட்டோ (Android Auto) மற்றும் ஆப்பிள் கார்ப்ளே (Apple CarPlay) வழியாக ஸ்மார்ட்போன் இணைப்பு வசதியை வழங்குகின்றன. இவற்றில் சில கார்கள் வயர்லெஸ் இணைப்பையும் கொண்டிருக்கின்றன. ஆகையால், தொழில்நுட்ப ஆர்வலர்களுக்கு கீழே காணும் கார்களுள் ஒன்றை ரூ.10 லட்சத்திற்குள் வாங்குவது சிறந்த தேர்வாக இருக்கும்.

டாடா டியாகோ (Tata Tiago): குறைந்த விலையில் கிடைக்கும் ஹேட்ச்பேக் ரக காரான இதன் உயர் ரக வேரியண்ட்களில், 10.25 அங்குல இன்ஃபோடெயின்மென்ட் சிஸ்டம் மற்றும் வயர்லெஸ் ஆண்ட்ராய்டு ஆட்டோ, ஆப்பிள் கார்ப்ளே வசதிகள் வழங்கப்படுகின்றன. டியாகோவின் எக்ஸ்.இசட் பிளஸ் வேரியண்ட்டில் இருந்து இந்த வயர்லெஸ் இணைப்பு அம்சங்கள் கிடைக்கின்றன.

டாடா பன்ச் (Tata Punch): டாடா மோட்டார்ஸின் மைக்ரோ-எஸ்யூவி ரக காரான இது, சாலையில் ஒரு தனித்துவமான தோற்றத்தையும், பல்வேறு வசதிகளையும் வழங்குகிறது. அதன்படி, இதன் பெரிய 10.25 அங்குல தொடுதிரை இன்ஃபோடெயின்மென்ட் சிஸ்டம், அகம்ப்ளிஷ்ட் பிளஸ் (Accomplished Plus) வேரியண்ட்டிலும், அதற்கு மேற்பட்ட வேரியண்ட்களிலும் வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளேயை ஆதரிக்கிறது.

ஹூண்டாய் எக்ஸ்டர் (Hyundai Exter): மேலே கண்ட டாடா பன்ச் காருக்கு போட்டியாக ஹூண்டாய் விற்பனை செய்யும் இந்த மைக்ரோ-எஸ்யூவி காரின் உயர் ரக எஸ்.எக்ஸ் (ஆப்ஷ்னல்) மற்றும் எஸ்.எக்ஸ் (ஆப்ஷ்னல்) கனெக்ட் வேரியண்ட்கள் வயர்லெஸ் ஃபோன் சார்ஜிங் வசதியை வழங்குகின்றன. மேலும், ஹூண்டாயின் ப்ளூலிங்க் கனெக்டட் கார் தொழில்நுட்பம் மூலம் 50-க்கும் மேற்பட்ட இணைப்பு வசதிகளையும் வழங்குகின்றன.

மாருதி சுஸுகி பலேனோ (Maruti Suzuki Baleno): மாருதி சுஸுகியின் பிரபலமான பிரீமியம் ஹேட்ச்பேக் காரான இதன் ஸீட்டா (Zeta) வேரியண்ட்டில் இருந்து வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளே உள்ளிட்ட மேம்பட்ட இணைப்பு வசதிகள் வழங்கப்படுகின்றன. ஸ்மார்ட்போன் இணைப்புடன் 9-அங்குல ஸ்மார்ட் ப்ளே புரோ+ இன்ஃபோடெயின்மென்ட் சிஸ்டம் இதில் உள்ளது.

புதிய மாருதி சுஸுகி ஸ்விஃப்ட் (Maruti Suzuki Swift): கடந்த 2024ஆம் ஆண்டில் அப்கிரேட் செய்யப்பட்ட ஸ்விஃப்ட் காரின் நடுத்தர விஎக்ஸ்ஐ வேரியண்ட்டிலும் அதற்கு மேற்பட்ட வேரியண்ட்களிலும் வயர்லெஸ் இணைப்பு வசதியைப் பெறலாம். இதன்படி, இந்த வேரியண்ட்களில் வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளே வசதிகள் வழங்கப்படுகின்றன. இதனால் ஸ்மார்ட்போன் இணைப்பை விரும்புபவர்களுக்கு இது ஒரு சிறந்த தேர்வாக அமைகிறது.

டாடா அல்ட்ராஸ் (Tata Altroz): அல்ட்ராஸ் அதன் பிரீமியம் இன்டீரியர் மற்றும் 5-நட்சத்திர பாதுகாப்பு மதிப்பீட்டிற்காக அறியப்படுகிறது. இது சமீபத்தில் ஒரு பெரிய இன்ஃபோடெயின்மென்ட் சிஸ்டம் அப்டேட்டைப் பெற்றது. இந்த காரின் எக்ஸ்.இசட் லக்சரி மற்றும் அதற்கு மேற்பட்ட வேரியண்ட்களில், வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளேயுடன் கூடிய 10.25 அங்குல இன்ஃபோடெயின்மென்ட் ஸ்கிரீன் கொடுக்கப்படுகிறது.

சிட்ரோயன் சி3 (Citroen C3): இந்த பிரெஞ்சு-ஸ்டைல் ஹேட்ச்பேக் காரின் நடுத்தர வேரியண்ட்களில் இருந்து துடிப்பான மற்றும் பெரிய அளவிலான தொடுதிரை சிஸ்டம் வழங்கப்படுகிறது. இதன் ஃபீல் (Feel) வேரியண்ட்டில் இருந்து 10.2-அங்குல தொடுதிரை வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளேயை கார் ஆதரிக்கிறது. மேலும், சி3 காரில் உயரத்தை சரிசெய்யக்கூடிய ஓட்டுநர் இருக்கை மற்றும் செமி-டிஜிட்டல் இன்ஸ்ட்ரூமென்ட் கிளஸ்டர் போன்ற வசதிகளும் உள்ளன.

டிரைவ்ஸ்பார்க் கருத்து: ஸ்மார்ட்போன் கனெக்டிவிட்டி வசதியை இன்றைய காலத்தில் பைக் & ஸ்கூட்டர்களில் கூட மக்கள் எதிர்பார்க்க ஆரம்பித்துவிட்டனர். அப்படியிருக்க, பல லட்ச ரூபாய் கொடுத்து வாங்கும் கார்களில் எதிர்பார்க்காமலா இருப்பார்கள்? ஏனெனில், அந்த அளவிற்கு ஸ்மார்ட்போன் வைத்து இல்லாதவர்களே கிடையாது. இருப்பினும், இத்தகைய கார்களை ரூ.10 லட்சத்திற்குள் வாங்கலாம் என்பது உண்மையில் அசத்தலான விஷயம் ஆகும்.