10 லட்ச ரூபாய்க்குள் கார் வாங்கினாலும், இந்த வசதி இருக்கானு முக்கியமா பாருங்க! இல்லைனா ரொம்ப சிரமம் ஆயிடும்!

ரூ.10 லட்சத்திற்கும் குறைவான விலையில் யுஎஸ்பி டைப்-சி சார்ஜிங் வசதி கொண்ட காரை தேடுகிறீர்களா? அப்படியென்றால் டாடா, ஹூண்டாய், மஹிந்திரா போன்ற பிராண்ட்களின் புதிய கார்களின் சில வேரியண்ட்களை நீங்கள் கருத்தில் கொள்ளலாம். யுஎஸ்பி டைப்-சி போர்ட்கள் தற்போது பொதுவானதாகிவிட்டாலும், இவை பெரும்பாலும் நடுத்தர மற்றும் உயர் ரக கார்களிலோ அல்லது கூடுதலான ஆக்ஸஸரீஸ் தொகுப்புகளிலோ தான் கிடைக்கின்றன.

அனைத்து கார் வேரியண்ட்களிலும் இது ஒரு நிலையான அம்சமாக இருப்பது இல்லை. ரூ.10 லட்சத்திற்கும் குறைவான விலையில் யுஎஸ்பி டைப்-சி போர்ட் உடன் கிடைக்கும் சிறந்த கார்களை பற்றி தான் இனி இந்த தொகுப்பில் பார்க்க போகிறோம். வாருங்கள் செய்திக்குள் போகலாம்.

டாடா அல்ட்ராஸ்: புதுப்பிக்கப்பட்ட 2025 டாடா அல்ட்ராஸ் காரில் யுஎஸ்பி டைப்-சி போர்ட்கள் வழங்கப்படுகின்றன. இதன் சில வேரியண்ட்கள் ரூ.10 லட்சம் பட்ஜெட்டிற்குள் வருகின்றன. யுஎஸ்பி டைப்-சி போர்ட்கள் தவிர, அல்ட்ராஸ் காரின் நடுத்தர மற்றும் உயர் ரக வேரியண்ட்களில் 10.25 இன்ச் HD இன்ஃபோடெயின்மென்ட் தொடுதிரையும் வழங்கப்படும் நிலையில், இந்த டாடா கார் 5-நட்சத்திர பாரத் என்சிஏபி பாதுகாப்பு மதிப்பீட்டைப் பெற்றுள்ளது.

எம்ஜி கோமட் இவி: குறைந்த எரிபொருள் செலவு மற்றும் யுஎஸ்பி டைப்-சி போர்ட்டுகளைத் தேடும் வாடிக்கையாளர்களுக்கு இந்த எலக்ட்ரிக் கார் ஒரு சிறந்த தேர்வாகும். இதன் அனைத்து வேரியண்ட்களும் ரூ.10 லட்சத்திற்கும் குறைவான விலையில் கிடைக்கின்றன. யுஎஸ்பி-சி சார்ஜிங் வசதி மட்டுமின்றி, யுஎஸ்பி-ஏ சார்ஜிங் போர்ட் வசதியும் இந்த காரில் வழங்கப்படுகிறது.

இவற்றுடன், நவீன வடிவமைப்பு, நகரப் பயணங்களுக்கு ஏற்ற கச்சிதமான அளவு மற்றும் டிஜிட்டல் இன்ஸ்ட்ரூமெண்ட் கிளஸ்டர் ஆகியவையும் கோமட் இவி எலெக்ட்ரிக் காரில் வழங்கப்படுகின்றன. எம்ஜி கோமட் இவி விலைகள் (எக்ஸ்-ஷோரூம்) ரூ.7.50 லட்சம் முதல் தொடங்குகின்றன. இந்தியாவிலேயே விலை குறைவான எலெக்ட்ரிக் கார்களுள் கோமட் இவி ஒன்றாகும்.

டாடா பன்ச்: இந்தியாவின் பிரபலமான மைக்ரோ-எஸ்யூவி கார் இது ஆகும். இதன் வேரியண்ட்கள் ரூ.10 லட்சத்திற்கும் குறைவான விலையில் கிடைப்பதுடன், அதிக பாதுகாப்பு மதிப்பீடுகளுக்கும் பெயர் பெற்றது. இது 5-நட்சத்திர குளோபல் என்சிஏபி பாதுகாப்பு மதிப்பீட்டைப் பெற்றுள்ளது. பன்ச் காரின் சில வேரியண்ட்களில் மட்டுமே யுஎஸ்பி-சி சார்ஜிங் வசதி வழங்கப்படுவதால், நீங்கள் வாங்கும் குறிப்பிட்ட வேரியண்ட்டில் இந்த வசதி உள்ளதா என்பதை உறுதிப்படுத்திக் கொள்ளவும்.

ஹூண்டாய் எக்ஸ்டர்: டாடா பன்ச் காருக்கு போட்டியாக விற்பனை செய்யப்படும் இந்த மைக்ரோ-எஸ்யூவி காரின் உயர் ரக வேரியண்ட்களில் யுஎஸ்பி டைப்-சி போர்ட்கள் உள்ளிட்ட பல அம்சங்கள் வழங்கப்படுகின்றன. இதனுடன், எக்ஸ்டரின் டாப் வேரியண்ட்களில் வயர்லெஸ் ஃபோன் சார்ஜிங் மற்றும் சன்ரூஃப் போன்ற அம்சங்களும் இடம்பெறுகின்றன.

மஹிந்திரா பொலேரோ மற்றும் பொலேரோ நியோ (2025 அப்டேட்): புதுப்பிக்கப்பட்ட 2025 பொலேரோ மற்றும் பொலேரோ நியோ கார்களில் சில வேரியண்ட்களில் யுஎஸ்பி டைப்-சி சார்ஜிங் போர்ட்கள் உட்பட புதிய அம்சங்கள் வழங்கப்படுகின்றன. இந்த வலிமையான மஹிந்திரா எஸ்யூவி கார்கள் இப்போது புதிய லெதரெட் இருக்கைகள் மற்றும் உயர் வேரியண்ட்களில் புதுப்பிக்கப்பட்ட தொடுதிரை அமைப்புகளுடன் வருகின்றன.

டிரைவ்ஸ்பார்க் கருத்து: யுஎஸ்பி டைப்-சி போர்ட் என்பது டைப்-சி முனையை ஏற்கக்கூடிய அனைத்து விதமான மின் சாதனங்களையும் சார்ஜ் செய்ய பயன்படுவது ஆகும். அந்த மின் சாதனம், மொபைல் போன் ஆகவும் இருக்கலாம். இத்தகைய வசதி உடன் ரூ.10 லட்சத்திற்குள் கார் வாங்க விரும்புபவர்கள், மேலே குறிப்பிடப்பட்ட கார்களுள் ஒன்றை வாங்கலாம்.