கடந்த மாதத்தில் டாடா யார் முகத்தில் முழிச்சுதோ... இந்த ரெண்டு கார்களை தான் மக்கள் மாத்தி மாத்தி வாங்குறாங்க!

2025 நவம்பர் மாத விற்பனையில், 10 லட்சம் ரூபாய்க்கும் குறைவான ஆரம்ப விலையுள்ள பல எஸ்யூவி (SUV) கார்கள் இந்திய கார் சந்தையில் ஆதிக்கம் செலுத்தியுள்ளன. குறிப்பாக, டாடா மோட்டார்ஸ் (Tata Motors) மற்றும் மாருதி சுஸுகி (Maruti Suzuki) நிறுவனங்களின் கார் மாடல்கள் வலுவான விற்பனை வளர்ச்சியைக் கண்டுள்ளன.

ஒட்டுமொத்தத்தில், அதிகம் விற்பனையான எஸ்யூவி கார், டாடா நெக்ஸான் (Nexon) ஆகும். இருப்பினும் அதன் பல வேரியண்ட்கள் 10 லட்சம் ரூபாய் பட்ஜெட்டைத் தாண்டுகின்றன. இதனால் அது அல்லாத, கடந்த மாதத்தில் சிறப்பான விற்பனையை பதிவு செய்த ரூ.10 லட்சத்திற்குள் கிடைக்கும் மற்ற கார்களை பற்றி தான் இந்த தொகுப்பில் பார்க்க போகிறோம்.

டாடா பன்ச் (Punch): கடந்த 2025 நவம்பர் மாதத்தில் இந்தியாவிலேயே அதிகம் விற்பனையான டாப்-5 கார்களில் 4வது இடத்தை இடம்பிடித்துள்ள இந்த மைக்ரோ-எஸ்யூவி கார், அதன் துணிச்சலான ஸ்டைலிங், அதிக கிரவுண்ட் கிளியரன்ஸ் மற்றும் ஈர்க்கக்கூடிய 5-நட்சத்திர குளோபல் NCAP பாதுகாப்பு மதிப்பீடு ஆகியவற்றால் பிரபலமானது.

2025 நவம்பரில் 18,753 பன்ச் கார்கள் விற்பனையை டாடா மோட்டார்ஸ் பதிவு செய்துள்ளது. பன்ச் காரின் எக்ஸ்-ஷோரூம் விலைகள் தற்சமயம் ரூ.5.50 லட்சத்தில் தொடங்கி, 10 லட்சம் ரூபாய்க்குள் பல வேரியண்ட்கள் கிடைக்கின்றன. பன்ச், அதன் பிரீமியம் அம்சங்களுடன் பட்ஜெட் விலையில் கிடைப்பதன் மூலம் வாடிக்கையாளர்களின் பெரும் ஆதரவைப் பெற்றுள்ளது.

மாருதி சுஸுகி ஃபிரான்க்ஸ் (Fronx): மார்க்கெட்டில் பிரபலமான மாருதி சுஸுகி பலேனோ காரை அடிப்படையாகக் கொண்ட ஃபிரான்க்ஸ், மாருதியின் பரந்த சர்வீஸ் நெட்வொர்க் (Service Network) மற்றும் வாகனத்தின் சிறந்த எரிபொருள் திறன் காரணமாக சிறப்பாக விற்பனையாகி வருகிறது. இது கடந்த நவம்பர் மாதத்தில் 15,058 யூனிட்கள் விற்கப்பட்டுள்ளது.

ஃபிரான்க்ஸ் ரூ.6.85 லட்சம் என்ற கவர்ச்சிகரமான ஆரம்ப எக்ஸ்-ஷோரூம் விலையைக் கொண்டுள்ளது. சிஎன்ஜி ஆப்ஷன்கள் உட்பட இதன் பல வேரியண்ட்கள் 10 லட்சம் ரூபாய்க்கும் குறைவான விலையில் கிடைக்கின்றன. இது நவீன அம்சங்களுடன் கூடிய ஒரு சிறந்த கிராஸ்ஓவர் எஸ்யூவி (Crossover SUV) காராக விளங்குகிறது.

மஹிந்திரா எக்ஸ்யூவி 3எக்ஸ்ஓ (Mahindra XUV 3XO): முன்னர் எக்ஸ்யூவி300 என அறியப்பட்ட இந்த மஹிந்திரா கார், 2025 நவம்பரில் 10,601 யூனிட்கள் விற்பனை செய்யப்பட்டுள்ளது. இது விசாலமான உட்புறம் மற்றும் உறுதியான கட்டுமானத் தரத்திற்காக அறியப்படுகிறது. மேலும் 5-நட்சத்திர பாதுகாப்பு மதிப்பீட்டையும் கொண்டுள்ளது.

எக்ஸ்யூவி 3எக்ஸ்ஓ காரின் எக்ஸ்-ஷோரூம் விலைகள் ரூ.7.28 லட்சம் முதல் தொடங்குகின்றன. மேலும் பல வேரியண்ட்கள் 10 லட்சம் ரூபாய் பட்ஜெட்டிற்குள் கிடைக்கின்றன. வலிமையான வடிவமைப்பாலும், பாதுகாப்பாலும் வாடிக்கையாளர்கள் மத்தியில் இந்த மஹிந்திரா எஸ்யூவி கார் வரவேற்பைப் பெற்று வருகிறது.

மாருதி சுஸுகி பிரெஸ்ஸா (Brezza): இந்தியாவின் காம்பாக்ட் எஸ்யூவி கார்கள் பிரிவில் இந்த மாருதி சுஸுகி கார் ஒரு முக்கிய இடத்தை வகிக்கிறது. சிறந்த நம்பகத்தன்மை மற்றும் அதிக மறுவிற்பனை மதிப்புக்காக அறியப்படும் பிரெஸ்ஸா, கடந்த 2025 நவம்பரில் 13,947 யூனிட்கள் விற்பனையை பதிவு செய்துள்ளது. இதன் எக்ஸ்-ஷோரூம் விலைகள் ரூ.8.26 லட்சம் முதல் தொடங்கி, சில ஆரம்ப வேரியண்ட்கள் 10 லட்சம் ரூபாய் பட்ஜெட்டிற்குள் வருகின்றன. பிரெஸ்ஸா, நீண்ட கால பயன்பாட்டிற்கும், குடும்பத் தேவைகளுக்கும் பொருத்தமானதாகக் கருதப்படுகிறது.

டிரைவ்ஸ்பார்க் கருத்து: இவை மட்டுமின்றி, இந்த லிஸ்ட்டில் ஹூண்டாய் வென்யூ (Hyundai Venue) மற்றும் கியா சொனெட் (Kia Sonet) கார்களையும் சேர்க்கலாம். ஆனால், இவற்றின் விற்பனை எண்ணிக்கைகள் மேற்கூறப்பட்ட கார்களை காட்டிலும் சற்று குறைவாக கடந்த மாதத்தில் பதிவாகி உள்ளன. இந்தியாவில் அதிகம் விற்பனையாகும் கார்கள் லிஸ்ட்டில் டாடா நெக்ஸான் தொடர்ந்து இரண்டாவது மாதமாக முதலிடத்தை பிடித்திருப்பது குறிப்பிடத்தக்கது.