ஓப்பனாக தான் இருக்கும்... ஆனாலும் காரில் இந்த விளக்குகளை நிறைய பேர் பார்த்திருக்க மாட்டீங்க!!

இரவு நேரங்களில் கார் கதவுகளுக்கு அருகில் உள்ள தரையை ஒளிரச் செய்து, முன் இருக்கை பயணிகள் எளிதாக வெளியேற உதவும் 'பெடில் விளக்குகள்' (Puddle Lamps) காரில் ஒரு சிறந்த பாதுகாப்பு மற்றும் சவுகரிய அம்சமாகும். முன்னதாக ஆடம்பர கார்களில் மட்டுமே காணப்பட்ட இந்த அம்சம், தற்போது ரூ.10 லட்சத்திற்கும் குறைவான விலையுள்ள கார்களிலும் கிடைக்கிறது. 2025 டிசம்பர் மாத நிலவரப்படி, இந்த அம்சத்தை வழங்கும் சிறந்த கார்கள் இங்கே கொடுக்கப்பட்டுள்ளன.

நிசான் மேக்னைட் (Nissan Magnite - எக்ஸ்வி மற்றும் அதற்கு மேற்பட்ட வேரியண்ட்கள்): பெடில் விளக்குகளைப் பெற மிகவும் மலிவு விலையில் கிடைக்கும் கார்களில் இதுவும் ஒன்றாகும். இந்த காரின் 'எக்ஸ்.வி' (XV) வேரியண்டில் இருந்து கிடைக்கும் விருப்பமான டெக் (Tech) பேக்கின் ஒரு பகுதியாக பெடில் விளக்குகள் வழங்கப்படுகின்றன.

பெடில் விளக்குகள் உடன், இந்த டெக் பேக்கில் காருக்குள் கேபினை சுற்றிலும் வண்ண விளக்குகள், வயர்லெஸ் சார்ஜர், காற்று சுத்திகரிப்பான் மற்றும் பிரீமியம் தரத்திலான JBL ஸ்பீக்கர்கள் ஆகியவை அடங்கும். டெக் பேக்குடன் கூடிய எக்ஸ்வி வேரியண்டின் எக்ஸ்-ஷோரூம் விலை ரூ.7.44 லட்சம் முதல் தொடங்குகிறது.

ரெனால்ட் கைகர் (Renault Kiger - ஆர்.எக்ஸ்.இசட் வேரியண்ட்): மேலே கண்ட மேக்னைட்டின் அதே பிளாட்ஃபார்மில் உருவாக்கப்பட்ட சகோதர காரான ரெனால்ட் கைகரும், கூடுதல் ஆக்சஸரி (Accessory) தொகுப்பு மூலம் இந்த அம்சத்தை வழங்குகிறது. இந்த காரின் டாப் ஆர்.எக்ஸ்.இசட் (RXZ) வேரியண்டில் 'ஸ்மார்ட் பிளஸ்' ஆக்சஸரி தொகுப்பில் இந்த வசதி கிடைக்கிறது.

இந்த பேக்கேஜில் பெடில் விளக்குகள், காருக்குள் வண்ண கேபின் விளக்கு செட்-அப், வயர்லெஸ் சார்ஜர் மற்றும் காரை முன்பக்கமாக பார்க் செய்வதற்கு உதவியாக சென்சார்கள் ஆகியவை அடங்கும். கைகர் ஆர்.எக்ஸ்.இசட் வேரியண்டின் எக்ஸ்-ஷோரூம் விலைகள் (Ex-Showroom Prices) ரூ.7.91 லட்சம் முதல் தொடங்குகிறது. இது இல்லாமல், பேக்கேஜ் தொகுப்புக்காக கூடுதலாக செலவு செய்ய வேண்டியிருக்கும்.

டொயோட்டா கிளான்ஸா (Toyota Glanza - சிறப்பு/லிமிடெட் எடிஷன்கள்): பிரபலமான மாருதி சுஸுகி பலேனோவின் ரீ-பேட்ஜ்டு வெர்சனான கிளான்ஸாவின் சில லிமிடெட் எடிஷன்களில் பெடில் விளக்குகள் ஸ்டாண்டர்டு அம்சமாக வழங்கப்படுகின்றன. சமீபத்திய பண்டிகைக் கால எடிஷன் போன்ற சிறப்பு எடிஷன்களில், அனைத்து வேரியண்ட்களிலும் பெடில் விளக்குகள் நிலையான ஆக்சஸரிகளாக கிடைக்கின்றன.

அதாவது, பெடில் விளக்குகளுக்கு என தனியாக செலவழிக்க வேண்டியது இல்லை. டொயோட்டா கிளான்ஸா காரின் எக்ஸ்-ஷோரூம் விலைகள் ரூ.6.86 லட்சம் முதல் ரூ.10 லட்சம் வரை தற்சமயம் உள்ளன. இந்த சிறப்பு எடிஷன்களை வாடிக்கையாளர்கள் சில டொயோட்டா கார் ஷோரூம்களில் நேரில் பார்க்க முடியும்.

ஹூண்டாய் வென்யூ (Hyundai Venue - எஸ் (ஆப்ஷ்னல்) மற்றும் அதற்கு மேற்பட்ட வேரியண்ட்கள்): சன்ரூஃப் மற்றும் மேம்பட்ட தொழில்நுட்ப அம்சங்களுக்காக அறியப்படும் ஹூண்டாய் வென்யூவின் சில டாப் வேரியண்ட்கள், காரின் பின்புறத்தை காட்டும் வெளிப்புற மிரர்களில் ஒருங்கிணைக்கப்பட்ட பெடில் விளக்குகளைக் கொண்டுள்ளன.

இவை வழக்கமாக எஸ் (ஆப்ஷ்னல்) (S(O))-இல் இருந்து அதற்கு மேற்பட்ட வேரியண்ட்களில் காணப்படுகின்றன. இது பெரும்பாலும் சைடு மிரர்களில் "LED பெடில் விளக்குகள்" என்று விளம்பரப்படுத்தப்படுகிறது. வென்யூவின் ஆரம்ப விலை ரூ.7.90 லட்சம், மேலும் தொழிற்நுட்ப அம்சங்கள் நிறைந்த 'எச்.எக்ஸ்5' (HX 5) டர்போ வேரியண்ட்கள் ரூ.9.74 லட்சம் வரை விலை நிர்ணயம் செய்யப்பட்டுள்ளன.

டிரைவ்ஸ்பார்க் கருத்து: ரூ.10 லட்சத்திற்குள் கிடைக்கும் இந்த கார்களில் பெடில் விளக்குகள் தொழிற்சாலையிலேயே பொருத்தப்பட்ட அம்சமாகவோ அல்லது அதிகாரப்பூர்வ ஆக்ஸஸரீ பேக்கேஜ்கள் மூலமாகவோ வழங்கப்படுகின்றன. ஆக்ஸஸரீ பேக்கேஜ் மூலமாக வாங்கினால், காரின் விலையுடன் கூடுதல் விலையை செலுத்த வேண்டியிருக்கும். அதாவது, அத்தகைய கார்களில் மற்றவர்கள் வாங்கும் வசதிகளுடன் நீங்கள் கூடுதல் வசதிகளை பெறுகிறீர்கள் என்று அர்த்தம் ஆகும்.