இரண்டுமே தரமா இருக்கு... 10 லட்ச ரூபாய்க்குள் இரண்டில் எதை வாங்குறது என்பதுதான் குழப்பமே!!

இன்றைய காலத்தில் கார் வாங்குபவர்களின் விருப்பங்கள் கார்களில் பல்வேறு விஷயங்களை நோக்கி உள்ளன. அதாவது, விலை மற்றும் மைலேஜை பார்த்து கார் வாங்கிய காலம் போய், இப்போது எல்லாம் கார்களில் அடாஸ் (ADAS) உள்ளதா, 6 ஏர்பேக்குகள் உள்ளனவா, பாதுகாப்பு மதிப்பீட்டில் கார் எத்தனை மதிப்பெண்களை பெற்றுள்ளது என்பதை அறிந்த பின்னரே காரை தேர்வு செய்கின்றனர்.

அந்த வகையில், காரில் டூயல் கிளட்ச் டிரான்ஸ்மிஷன் (Dual-Clutch Transmission - DCT) உள்ளதா என்பதையும் ஆராய்கின்றனர். 10 லட்சம் ரூபாய் பட்ஜெட்டில், புதிய கார் வாங்குபவர்களுக்கு, டூயல் கிளட்ச் டிரான்ஸ்மிஷன் வசதியுடன் கிடைக்கும் சிறந்த மற்றும் குறைந்த விலையிலான கார்களாக டாடா அல்ட்ரோஸ் டிசிஏ மற்றும் ஹூண்டாய் ஐ20 டிசிடி ஆகியவை உள்ளன.

டாடா அல்ட்ரோஸ் டிசிஏ (Tata Altroz DCA): இந்தியாவில் தற்போது கிடைக்கும் டிசிடி வசதியுடன் கூடிய கார்களில் மிகவும் பட்ஜெட்டுக்கு ஏற்ற விலை குறைவான காராக இது கருதப் படுகிறது. டாடா அல்ட்ராஸ் ஆனது ஒரு ஹேட்ச்பேக் (Hatchback) வகைக் காராகும்.

இந்தக் காரில் 1.2 லிட்டர் பெட்ரோல் என்ஜின் பொருத்தப்படுகிறது. இதன் 6-ஸ்பீடு ஈரமான-கிளட்ச் டிசிடி (DCT) கியர்பாக்ஸ் யூனிட், இந்திய சாலை மற்றும் போக்குவரத்து நிலைமைகளுக்கு ஏற்றது. இது நீண்ட கால உழைப்புக்கும், அதிக வெப்பத்தைத் தாங்கும் திறனுக்கும் பெயர் பெற்றது.

டாடா மோட்டார்ஸ் நிறுவனத்தின் தகவல்படி, அல்ட்ரோஸ் டிசிடி மாடல்களின் எக்ஸ்-ஷோரூம் விலைகள் (Ex-Showroom Prices) ரூ.8.3 லட்சம் முதல் தொடங்குகின்றன. குளோபல் என்சிஏபி (Global NCAP) பாதுகாப்பு சோதனையில் 5 நட்சத்திர மதிப்பீட்டைப் பெற்றுள்ளதால், இது அதன் பிரிவில் பாதுகாப்பான ஹேட்ச்பேக்குகளில் ஒன்றாக விளங்குகிறது.

ஹூண்டாய் ஐ20 டிசிடி (Hyundai i20 DCT): சிறப்பான மற்றும் தொழிற்நுட்ப அம்சங்கள் நிறைந்த ஓட்டுநர் அனுபவத்தை வழங்கும் காராக விளங்கும் இந்த ஹூண்டாய் காரின் டிசிடி கியர்பாக்ஸ், ஆற்றல்மிக்க 1.0 லிட்டர் டர்போ-பெட்ரோல் என்ஜின் உடன் இணைக்கப்படுகிறது. இந்தக் காரில் 7-ஸ்பீடு டிசிடி யூனிட் உள்ளது.

இது அல்ட்ராஸ் டிசிஏ காரில் இருப்பது போல் இல்லாமல், உலர்வான டிசிடி கியர்பாக்ஸ் ஆக இருப்பதால், போக்குவரத்து நெரிசல் மிகுந்த சாலைகளில் செல்லும்போது ஹீட்டிங் (Heating) பிரச்சனை ஏற்படுகிறது. ஹூண்டாய் ஐ20 டிசிடி காரின் எக்ஸ்-ஷோரூம் விலைகள் ரூ.9.8 லட்சம் முதல் துவங்குகின்றன.

ஆன்-ரோடு விலை (On-road Price) 10 லட்ச ரூபாயை தாண்டிவிடும் என்றாலும், 10 லட்சம் ரூபாய் பட்ஜெட்டிற்குள், ஹூண்டாய் ஐ20 ஸ்போர்ட்ஸ் டிசிடி காரையும் பரிசீலிக்கலாம். இருப்பினும், உயர் செயல்திறன் கொண்ட ஐ20 என் லைன் (N Line) காரின் டிசிடி கியர்பாக்ஸ் வேரியண்ட்கள் இந்த விலையை விட அதிகமாக இருக்கும்.

டிரைவ்ஸ்பார்க் கருத்து: தற்போதைக்கு இந்த இரு கார்கள் மட்டுமே ரூ.10 லட்சத்திற்குள் டிசிடி கியர்பாக்ஸ் ஆப்ஷன் உடன் கிடைக்கின்றன. கொஞ்சம் குறைவான பட்ஜெட் தான் உள்ளது என்றால், டாடா அல்ட்ராஸ் டிசிஏ ஏற்றதாக இருக்கும். அதுவே, விரைவான ஆக்ஸலரேஷன் உடன் சிறப்பான டிரைவிங் அனுபவத்தை எதிர்பார்ப்பவர்கள் ஹூண்டாய் ஐ20 டிசிடி காரை வாங்கலாம்.

விலை குறைவானதாக இருப்பினும், அல்ட்ராஸ் டிசிஏ காரின் ஈரமான-க்ளட்ச் டிசிடி கியர்பாக்ஸ் நகர்புற சாலைகளுக்கு ஏற்றதாக இருக்கும். ஆதலால், நகரங்களில் வசிப்பவர்கள் இந்த இரண்டில் அல்ட்ராஸ் டிசிஏ காரை வாங்க முயற்சி செய்து பார்க்கலாம். அல்ட்ராஸ் டிசிஏ காரின் சில வேரியண்ட்கள் ரூ.9 லட்சத்திற்குள் கிடைக்கின்றன. அதுவே, தொழிற்நுட்ப அம்சங்கள் மிகுந்த காரை எதிர்பார்ப்பவர்களுக்கு ஐ20 டிசிடி ஏற்றதாக இருக்கும்.