எம்.எஸ் தோனியை அம்பாசிடரா போட்டதுக்கு பலன் கிடைக்க ஆரம்பிச்சிருக்கு! அக்டோபரில் கார் சேல்ஸ் எப்படி இருந்துச்சு

Published: Wednesday, November 19, 2025, 23:51 [IST]

இந்திய ஆட்டோமொபைல் சந்தையில் சிட்ரோன் நிறுவனம் மற்ற முன்னணி கார் நிறுவனங்களை விடக் குறைந்த எண்ணிக்கையில் கார்களை விற்பனை செய்து வந்தாலும், 2025 அக்டோபரில் குறிப்பிடத்தக்க முன்னேற்றத்தைக் கண்டுள்ளது. இதற்கு முக்கியக் காரணம், சிட்ரோன் சி3 (C3) ஹேட்ச்பேக் கார் ஆகும். கடந்த மாதத்தில் அதிக எண்ணிக்கையில் கார்களை விற்பனை செய்த நிறுவனங்களின் விற்பனைப் பட்டியலில் 13வது இடத்தில் இருக்கும் சிட்ரோன், ஒட்டுமொத்த சந்தையில் 0.3% பங்கைக் கொண்டுள்ளது.

அதாவது, கடந்த மாதத்தில் கார் வாங்கியவர்களில் 300 பேரில் ஒருவர் மட்டுமே சிட்ரோன் காரை தேர்வு செய்துள்ளார். இந்த நிறுவனத்தின் தயாரிப்புகளில் சி3 என்கிற ஹேட்ச்பேக் கார், சி3 ஏர்கிராஸ் (C3 Aircross) என்கிற எஸ்யூவி கார், பசால்ட் (Basalt) என்கிற கூபே-ஸ்டைல் எஸ்யூவி கார், சி5 ஏர்கிராஸ் மற்றும் எலெக்ட்ரிக் சி3 ஹேட்ச்பேக் (eC3) ஆகியவை அடங்கும்.

2025 அக்டோபரில் சிட்ரோன் நிறுவனம் 1,426 கார்களை விற்றுள்ளது. இது 2024 அக்டோபரில் விற்கப்பட்ட 717 சிட்ரோன் கார்களைக் காட்டிலும் சுமார் 99% அதிகமாகும். அதேபோல், மாதாந்திர ஒப்பிடுகையிலும் குறிப்பிடத்தக்க 94% வளர்ச்சியை சிட்ரோன் கண்டுள்ளது. ஏனெனில், 2025 செப்டம்பரில் 734 சிட்ரோன் கார்கள் மட்டுமே விற்பனையாகி இருந்தன.

சிட்ரோன் சி3 ஹேட்ச்பேக் அக்டோபர் மாதத்தில் 897 யூனிட்களுடன் சிறந்த விற்பனையைப் பதிவு செய்துள்ளது. கடந்த ஆண்டு அக்டோபர் மாதத்தில் விற்பனை செய்யப்பட்ட 300 சி3 கார்கள் விற்பனையை விட இது சுமார் 199% வளர்ச்சியும், 2025 செப்டம்பரில் விற்பனை செய்யப்பட்ட 448 சி3 கார்கள் விற்பனையை விட 100% வளர்ச்சியும் ஆகும்.

சி3 ஏர்கிராஸ் 227 யூனிட்கள் விற்பனையாகி, 2024 அக்டோபரை காட்டிலும் 120% வளர்ச்சியையும், 2025 செப்டம்பரில் விற்கப்பட்ட 59 யூனிட்களை விட 285% மாதாந்திர வளர்ச்சியையும் பெற்றுள்ளது. கடந்த மாதத்தில் அதிகம் விற்பனையான 4.2- 4.4 மீட்டர் எஸ்யூவி கார்களில் முதல் 15 கார்களில் சி3 ஏர்கிராஸ் மற்றும் பசால்ட் இரண்டும் இடம்பெற்றுள்ளன.

பசால்ட் கார் கடந்த மாதத்தில் 217 யூனிட்கள் விற்பனையாகி, கடந்த ஆண்டின் 221 யூனிட்களுடன் ஒப்பிடுகையில் 2% சரிவை சந்தித்தாலும், 2025 செப்டம்பரின் 210 யூனிட்களை விட 3% மாதாந்திர வளர்ச்சியைப் பதிவு செய்துள்ளது. இசி3 எலெக்ட்ரிக் ஹேட்ச்பேக் கார் 83 யூனிட்கள் விற்பனையாகி, 2024 அக்டோபரை விட 7% சரிவை சந்தித்துள்ளது.

இருப்பினும், செப்டம்பரில் விற்கப்பட்ட வெறும் 18 இசி3 எலெக்ட்ரிக் கார்களுடன் ஒப்பிடுகையில் மாதாந்திர விற்பனை 388% உயர்ந்துள்ளது. இந்தியாவில் சிட்ரோன் அறிமுகப்படுத்திய முதல் காரான சி5 ஏர்கிராஸ் கடந்த மாதத்தில் மிகக் குறைவாக வெறும் 2 யூனிட்கள் மட்டுமே விற்பனையாகியுள்ளது. 2024 அக்டோபரிலும் 4 சி5 ஏர்கிராஸ் கார்கள் மட்டுமே விற்பனையாகி இருந்த நிலையில், 2025 செப்டம்பரில் இந்த கார் ஒரு யூனிட் கூட விற்பனையாகவில்லை.

No	Citroen India Sales	Oct-25	Oct-24	Diff	Growth %
No	Citroen India Sales	Oct-25	Oct-24	Diff	YoY	Share % Oct 25
1	C3	897	300	597	199.00	62.90
2	C3 Aircross	227	103	124	120.39	15.92
3	Basalt	217	221	-4	-1.81	15.22
4	eC3	83	89	-6	-6.74	5.82
5	C5 Aircross	2	4	-2	-50.00	0.14
-	Total	1,426	717	709	98.88	100.00

No	Citroen India Sales	Oct-25	Sep-25	Diff	Growth %
No	Citroen India Sales	Oct-25	Sep-25	Diff	YoY	Share % Sep 25
1	C3	897	448	449	100.22	61.04
2	C3 Aircross	227	59	168	284.75	8.04
3	Basalt	217	210	7	3.33	28.61
4	eC3	83	17	66	388.24	2.32
5	C5 Aircross	2	0	2	0.00
-	Total	1,426	734	692	94.28	100.00

டிரைவ்ஸ்பார்க் கருத்து: இவ்வாறு சில சிட்ரோன் கார்கள் வழக்கம்போல் குறைவாகவே விறபனையாகி இருந்தாலும், ஒட்டுமொத்தமாக சிட்ரோனின் கார்கள் விற்பனை அதிகரித்து இருப்பது, சந்தையில் சிட்ரோனின் புதிய உத்திகள் பலனளிக்கத் தொடங்கியிருப்பதைக் காட்டுகிறது. 'Shift Into the New' திட்டத்தின் கீழ் சமீபத்திய தயாரிப்பு மேம்பாடுகள் மற்றும் கிரிக்கெட் வீரர் எம்.எஸ் தோனி உடனான கூட்டணி மூலம் கிடைத்த விளம்பரம் ஆகியவை இந்திய வாடிக்கையாளர்களை ஈர்க்க உதவியுள்ளன.

மேலும், பண்டிகைக் கால தேவை மற்றும் ஜிஎஸ்டி குறைப்பிற்குப் பிறகு சிட்ரோன் தனது வாகனங்களின் விலையை மறுசீரமைத்தது, இந்த வளர்ச்சிக்கு முக்கியக் காரணங்களாகப் பார்க்கப்படுகிறது. சமீப மாதங்களில், சிட்ரோன் தனது "Shift Into the New" உத்தியின் கீழ், ஏர்கிராஸ் எக்ஸ், புதிய பஸால்ட் எக்ஸ் மற்றும் சி3எக்ஸ் போன்ற புதிய கார்களை அறிமுகப்படுத்தி தனது தயாரிப்பு வரிசையை புதுப்பித்துள்ளது.