எங்கே பார்த்தாலும் சென்சார்கள்... டயர்களிலும் வந்தாச்சு! அடிக்கடி கழற்றி மாட்ட வேண்டிய அவசியமே இல்ல!

ஜே.கே டயர் & இண்டஸ்ட்ரீஸ் (JK Tyre & Industries) நிறுவனம், இந்தியாவின் முதல் டிஜிட்டல் சென்சார் உட்பொதிக்கப்பட்ட கார் டயர்களை அறிமுகப்படுத்தியுள்ளது. இந்த புதிய தயாரிப்பு, கனெக்டட் மொபிலிட்டி தீர்வுகளின் ஒரு பகுதியாக, வாகன பாகங்களில் டேட்டா கண்காணிப்பை ஒருங்கிணைக்கிறது. மத்தியப் பிரதேச மாநிலம் பன்மோரில் உள்ள ஜே.கே டயர் நிறுவனத்தின் தொழிற்சாலையில் இந்த டயர்கள் உருவாக்கப்பட்டுள்ளன.

இந்த டயர்களின் உள் கட்டமைப்பில் சென்சார்கள் பொருத்தப்பட்டுள்ளன. அவை காற்று அழுத்தம், வெப்பநிலை மற்றும் காற்று கசிவின் ஆரம்ப அறிகுறிகளை கண்காணிக்கும். இந்த டயர்கள் மூலம் சேகரிக்கப்படும் தகவல்கள் வாகனத்திற்கு வழங்கப்படும் ஒரு இணைக்கப்பட்ட திரைக்கு அனுப்பப்பட்டு, பயனர்களுக்கு நிகழ்நேர அறிவிப்புகளை வழங்கும்.

இது முன்கூட்டிய பராமரிப்புக்கு எச்சரிப்பதோடு, டயர் தொடர்பான வாகன பழுதுகளைக் குறைக்கும் என்று ஜே.கே டயர் நிறுவனம் தெரிவித்துள்ளது. உள்நாட்டு உற்பத்தி மற்றும் தொழில்நுட்ப நோக்கங்களுடன் இந்த தயாரிப்பு இணைந்துள்ளதாக குறிப்பிடும் ஜே.கே டயர் நிறுவனம், இந்த டயர்களை நீண்ட கால உழைப்பு மற்றும் எரிபொருள் சிக்கனத்தை வழங்கும் வகையில் வடிவமைத்துள்ளது.

இதுகுறித்து ஜே.கே டயர் நிறுவனத்தின் தலைவர் மற்றும் நிர்வாக இயக்குநர் ரகுபதி சிங்ஹானியா, இது கனெக்டட் மொபிலிட்டி தொழில்நுட்பங்களில் ஜே.கே. டயரின் தொடர்ச்சியான பணியில் ஒரு முக்கிய படி என கூறினார். மேலும் பேசிய அவர், "எங்கள் உட்பொதிக்கப்பட்ட ஸ்மார்ட் டயர்களின் வெளியீடு, ஜே.கே. டயரின் புதுமைப் பயணத்தில் ஒரு மைல்கல்" என்று அவர் தெரிவித்தார்.

மேலும், "இந்த தயாரிப்பானது தொழில்நுட்ப சிறப்பில் ஜே.கே. டயரின் அசைக்க முடியாத கவனத்தையும், இணைக்கப்பட்ட மொபிலிட்டியின் எதிர்காலத்தை வழிநடத்தும் எங்கள் பார்வையையும் எடுத்துக்காட்டுகிறது" என்றும் சிங்ஹானியா குறிப்பிட்டார். வாகனங்களின் சிஸ்டங்கள் டிஜிட்டல் ஒருங்கிணைப்பின் உயர் மட்டங்களை நோக்கி நகரும் நிலையில், ஸ்மார்ட் டயர் தீர்வுகள் ஆட்டோமோட்டிவ் சப்ளையர்களுக்கு முக்கிய கவனம் செலுத்தும் ஒரு பகுதியாக மாறி வருகின்றன.

இந்த ஸ்மார்ட் டயர்கள் ஜே.கே. டயர் டீலர்ஷிப்கள் மூலம் விநியோகிக்கப்படும். இவை, ஆரம்பத்தில் 14 முதல் 17 அங்குல அளவுகளில் கிடைக்கும். அசல் உபகரண உற்பத்தியாளர்களுக்கான (OEMs) கிடைக்கும் தன்மை பின்னர் ஆராயப்படும் என்று நிறுவனம் தெரிவித்துள்ளது. ஜே.கே டயர் ஏற்கனவே, கிளவுட் அடிப்படையிலான பகுப்பாய்வுகளுடன் இணைக்கப்பட்ட டயர் காற்றழுத்த கண்காணிப்பு அமைப்புகளில் பணியாற்றி வருகிறது. இது 2019இல் அதன் TREEL சென்சார்கள் மூலம் அறிமுகப்படுத்தப்பட்டது.

இந்த புதிய உட்பொதிக்கப்பட்ட சென்சார் டயர்கள், வெளியிலிருந்து பொருத்தப்படும் அல்லது வால்வில் பொருத்தப்படும் சென்சார் அமைப்புகளில் இருந்து வேறுபடுகின்றன. ஏனெனில், கண்காணிப்பு சென்சார்கள் டயரின் அமைப்புக்குள்ளேயே உள்ளன. பயணிகள் மற்றும் வர்த்தக வாகனங்களுக்கான பயன்பாட்டு சூழல்களை விரிவுபடுத்துவதை நோக்கமாகக் கொண்டு, கனெக்டட் டயர் தொழில்நுட்பத்தில் தொடர்ச்சியான ஆராய்ச்சி மற்றும் மேம்பாட்டை ஜே.கே டயர் நிறுவனம் திட்டமிட்டுள்ளது.

டிரைவ்ஸ்பார்க் கருத்து: ஜே.கே டயர் இந்தியாவின் முன்னணி டயர் உற்பத்தி நிறுவனம் ஆகும். எவ்வாறு அந்த இடத்தை ஜே.கே டயர் தொடர்ந்து தக்க வைத்துக் கொண்டு வருகிறது என்பதற்கு இவ்வாறான கண்டுப்பிடிப்புகளும், தயாரிப்புகளும் தான் சாட்சியாகும். இருப்பினும் மறுப்பக்கம், இவ்வாறான அட்வான்ஸ்டு தொழிற்நுட்பங்கள் கொண்ட டயர்களினால், வாகனங்களுக்கான டயர்களின் விலை அதிகரிக்கும். எந்தவொரு வாகனத்திலும் நாம் அடிக்கடி மாற்றுவது டயர்களையே ஆகும். இருப்பினும், ஜே.கே டயரின் இவ்வாறான சென்சார்கள் பொருத்தப்பட்ட டயர்கள் ஆரம்பத்தில் விலையுயர்ந்த கார்களில் தான் பொருத்தப்படும் என்பதால், இந்த டயர்கள் மாஸ் மார்க்கெட்டிற்கு வர இன்னும் கொஞ்சம் காலம் ஆகும்.