மாருதி 800 காரை இத்தனை வருஷம் வைத்திருந்ததே பெரிய விஷயம்! வெளி தோற்றத்தை பார்த்து எடை போடாதீங்க!

மஹாராஷ்டிராவில் மாருதி 800 கார் ஒன்று, மஹிந்திரா தார் போல மாற்றியமைக்கப்பட்டு அனைவரையும் ஆச்சரியத்தில் ஆழ்த்தியுள்ளது. இந்தியாவின் மிகவும் பிரபலமான ஆஃப்-ரோடர் வாகனமான தார் போல, மாருதியின் குட்டி ஹேட்ச்பேக் காரான 800 மாற்றப்பட்டுள்ளது. இது பார்ப்பதற்கு விசித்திரமாக இருந்தாலும், பலரையும் கவர்ந்துள்ளது.

இந்திய சந்தையில் நீண்ட கால வரலாறு கொண்ட மாருதி 800 கார்களை புதுமையான தோற்றத்திற்கு மாற்றும் வகையிலான பல முயற்சிகளை இதற்கு முன் நாம் பார்த்திருக்கிறோம். ஆனால், இது மிகவும் வேடிக்கையான ஒன்றாகும். அடிப்படையாக மாருதி 800 காராக இது இருந்தாலும், அதன் அசல் உடல் பாகங்கள் எதுவும் நம் கண்ணுக்கு தெரியவில்லை.

முன்பக்க கிரில் மற்றும் பம்பர் ஆகியவை நிமிர்ந்த, பெட்டி போன்ற வடிவமைப்பைக் கொண்டுள்ளன. இது முன்பு விற்பனையில் இருந்த முதல் தலைமுறை மஹிந்திரா தார் வாகனத்தின் முரட்டுத்தனமான தோற்றத்தை நினைவூட்டுகிறது. பொனட் மற்றும் ஃபெண்டர்கள் பருமனாகவும், தட்டையானதாகவும் மாற்றப்பட்டுள்ளன.

சக்கர வளைவுகள் விரிவுபடுத்தப்பட்டு, சதுர வடிவில் செதுக்கப்பட்டு உள்ளன. இதனால் மாருதி 800 என்கிற ஹேட்ச்பேக் ரக கார், எஸ்யூவி வாகனத்தின் தோற்றத்தை அளிக்கிறது. பக்கவாட்டில் இருந்து பார்க்கும்போது, காரின் மென்மையான மற்றும் வட்டமான நிழல், எந்த அளவிற்கு நிமிர்ந்த பெட்டகம் தோற்றமாக மாறியுள்ளது என்பதை காண முடிகிறது.

தார் வாகனம் ஒன்றை நேரில் பார்த்துக் கூட இல்லாமல், போஸ்டர் ஒன்றில் பார்த்து இந்த வாகனத்தை வடிவமைத்துள்ளனர். அதைச் சிறப்பாகவே செய்திருக்கிறார்கள் என்றுதான் சொல்ல வேண்டும். குறிப்பாக, இந்த காரின் பின்பகுதிதான் அதிக படைப்பாற்றலைக் காட்டுகிறது. உண்மையான எஸ்யூவி உணர்விற்காக, ஒரு ஸ்பேர் சக்கரம் பின்பக்கத்தில் பொருத்தப்பட்டுள்ளது.

ஆன்லைன் பார்வையாளர்கள் இதை ஒரு பொம்மை எஸ்யூவி எனவும், ஜிடிஏ வைஸ் சிட்டி விளையாட்டில் வரும் கார் போல உள்ளதாகவும் ஒப்பிட்டுள்ளனர். இந்த காரின் எந்திரவியல் குறித்த விபரங்கள் நம்மிடம் இல்லை. இயக்கத்தின் போது, இந்த வாகனத்தின் பின் சக்கரங்களின் அசைவு சற்று வித்தியாசமாக இருப்பதாகப் பலரும் சுட்டிக் காட்டியுள்ளனர்.

மேலோட்டமாகப் பார்த்தால் இது ஒரு மாருதி 800 கார்தான். முன்பக்க வீல் டிரைவ், சிறிய என்ஜின் மற்றும் எடை குறைவான சேசிஸ் ஆகியவற்றைக் கொண்டுள்ளது. இந்த மாடிஃபிகேஷன்கள் பெரும்பாலும் வெளிப்புற அலங்காரங்கள் உடன் முடிந்துவிடுகின்றன. கூடுதல் கிரவுண்ட் கிளியரன்ஸ் (தரையில் இருந்து வாகனத்தின் அடிப்பகுதியின் உயரம்) என்பது பார்வைக்கு மட்டுமே, எந்திர ரீதியாக இல்லை.

இருப்பினும், இந்த வாகனத்தை வடிவமைத்தவர்களின் முயற்சி பாராட்டுக்குரியது. அவர்கள் வெறும் பேட்ஜ்கள் மற்றும் ஸ்டிக்கர்களை ஒட்டுவதோடு நிறுத்திக் கொள்ளவில்லை. அவர்கள் தார் வாகனத்தின் தோற்றத்தை மாருதி 800 காரில் கொண்டுவர முயற்சித்துள்ளனர். இந்த வடிவமைப்பின் சதுர வடிவம் மஹிந்திரா தாருக்கு நிகரானது என்றே சொல்லலாம்! பேட்ஜ்கள், சகதி தெறிப்பதை தடுக்கும் மட் ஃப்ளாப்கள் மற்றும் ஸ்பேர் சக்கரம் ஆகியவை இந்த தோற்றத்தை ஆஃப்-ரோடு எஸ்யூவி வாகனமாக முழுமையாக்க உதவுகின்றன.

டிரைவ்ஸ்பார்க் கருத்து: என்ன தான் இது மஹிந்திரா தார் போன்று எந்தவொரு பாதையிலும் இயங்கக்கூடிய தோற்றத்தை கொண்டிருந்தாலும், உள்ளே இருக்கும் மெக்கானிக்கல் பாகங்கள் அனைத்தும் மாருதி 800 காருடையது ஆகும். ஆதலால், இந்த வாகனத்தை அதிக நம்பிக்கையில் கரடு முரடான பாதைக்கு கொண்டு சென்றால் கதை முடிந்தது.