புதிய வென்யூவில் இந்த வேரியண்ட்டை வாங்குறதுதான் சரியான முடிவு! விலையும் கம்மி... போதிய டெக்னாலஜி வசதிகள்!

மிக சமீபத்தில் அறிமுகம் செய்யப்பட்ட புத்தம் புதிய ஹூண்டாய் வென்யூ (Hyundai Venue) கார்கள் தற்போது ஷோரூம்களுக்கு வரத் தொடங்கிவிட்டன. அந்த வகையில், ஷோரூமுக்கு வந்த வென்யூ காரின் எண்ட்ரீ-லெவல் எச்.எக்ஸ்2 (HX2) வேரியண்ட்டை பற்றி படங்களுடன் ஏற்கனவே நாம் பார்த்திருந்த நிலையில், இந்த தொகுப்பில் அதனை காட்டிலும் சற்றே விலைமிக்க எச்.எக்ஸ்5 (HX5) வேரியண்ட்டை பற்றி பார்க்க போகிறோம்.

இதுதொடர்பான படங்கள் 'தி கார் ஷோ' (The Car Show) என்கிற யூடியூப் சேனல் மூலமாக நமக்கு கிடைத்துள்ளது. வென்யூ காரின் நடுத்தர-தர வேரியண்ட்டான எச்எக்ஸ்5, புதிய வடிவமைப்பு கூறுகளின் சமச்சீரான கலவையைக் கொண்டுள்ளது. இதன் வெளிப்புறத்தில் ஹாலோஜன் ஹெட்லேம்ப்கள், சில்வர் இன்செர்ட்கள் மற்றும் LED பகல்நேர விளக்குகள் (DRL) உள்ளன.

மேலும், காருக்கு பின்பக்கத்தில் உயரத்தில் பொருத்தப்பட்ட LED ஸ்டாப் விளக்கு மற்றும் LED டெயில் லேம்ப்களும் இடம்பெற்றுள்ளன. இருப்பினும், டாப் வேரியண்ட்களில் உள்ள LED டர்ன் இண்டிகேட்டர்கள் மற்றும் ORVM-களில் உள்ள டர்ன் இண்டிகேட்டர்கள் எச்.எக்ஸ்5 வேரியண்ட்டில் இல்லை. 15 அங்குல சியட் டயர்கள் மற்றும் சக்கர கவர்கள் கொண்ட இரும்பு சக்கரங்களுடன் இந்த கார் வருகிறது. பக்கவாட்டில், குரோம் பூச்சுடன் "வென்யூ" பேட்ஜிங் கொடுக்கப்பட்டுள்ளது.

எச்.எக்ஸ்5 வேரியண்ட்டில் பின்பக்க வைப்பர், வாஷர் மற்றும் கனெக்டட் டெயில்லைட்கள் இல்லை என்றாலும், நான்கு பார்க்கிங் சென்சார்கள், சுறா துடுப்பு வடிவிலான ஆண்டெனா மற்றும் சன்ரூஃப் போன்ற அம்சங்கள் உள்ளன. உட்புறத்தில் சாம்பல் நிற தீம், உயரத்தை சரிசெய்யக்கூடிய ஓட்டுநர் இருக்கை, ஸ்டீயரிங் சக்கரத்தில் கண்ட்ரோல்கள், மேனுவல் கிளைமேட் கண்ட்ரோல் சிஸ்டம் மற்றும் புஷ் பட்டன் ஸ்டார்ட் கொண்ட ஸ்மார்ட் சாவி ஆகியவை அமைந்துள்ளன.

மேலும், 26.03 செ.மீ (10.25") ccNC இன்ஃபோடெயின்மென்ட் சிஸ்டம், ஆண்ட்ராய்டு ஆட்டோ மற்றும் ஆப்பிள் கார்ப்ளே இணைப்பு, 10.66 செ.மீ வண்ண TFT டிஸ்ப்ளே கொண்ட டிஜிட்டல் கிளஸ்டர் ஆகியவையும் இதில் அடங்கும். ப்ளூடூத் இணைப்பு மற்றும் ஆடியோ/ ப்ளூடூத் கண்ட்ரோல்கள் கொண்ட ஸ்டீயரிங் சக்கரமும் எச்.எக்ஸ்5 வேரியண்ட்டின் உட்புற அம்சங்களில் ஒரு பகுதியாகும்.

பாதுகாப்பு அம்சங்களைப் பொறுத்தவரை, ஹூண்டாய் வென்யூ எச்.எக்ஸ்5 வேரியண்ட்டில் லெவல்-2 ADAS வசதி இல்லை. ஆனால், ஆறு ஏர்பேக்குகள், பின்புற பார்க்கிங் கேமரா, பின்புற பார்க்கிங் சென்சார்கள், எலக்ட்ரானிக் ஸ்டெபிலிட்டி கண்ட்ரோல் மற்றும் மெமரி உடன் கூடிய 3-பாயிண்ட் சீட் பெல்ட்கள் உள்ளன. ரோல் ஓவர் சென்சார், ABS, ஹில் ஸ்டார்ட் அசிஸ்ட், டயர் பிரஷர் மானிடரிங் சிஸ்டம், நான்கு டிஸ்க் பிரேக்குகள் மற்றும் வேகத்தை உணர்ந்து செயல்படும் ஆட்டோ டோர் லாக் போன்ற அம்சங்களும் பாதுகாப்பை மேலும் பலப்படுத்துகின்றன.

ஹூண்டாய் வென்யூ எச்.எக்ஸ்5 வேரியண்ட் ஆனது நேச்சுரலி-அஸ்பிரேட்டட் பெட்ரோல், டர்போ-பெட்ரோல் மற்றும் டீசல் என்ஜின் 3 விதமான என்ஜின் ஆப்ஷன்களில் கிடைக்கிறது. 1.2 லிட்டர் நேச்சுரலி-அஸ்பிரேட்டட் பெட்ரோல் என்ஜின் அதிகப்பட்சமாக 82 குதிரைத்திறன் மற்றும் 114 Nm டார்க் திறனை உற்பத்தி செய்யக்கூடியதாக உள்ளது. இது 5-ஸ்பீடு மேனுவல் கியர்பாக்ஸ் உடன் இணைக்கப்பட்டுள்ளதுடன், ARAI சான்றளித்தபடி 18.5 கிமீ/லி மைலேஜ் தருகிறது.

அதேநேரம், 1.0 லிட்டர் டர்போ பெட்ரோல் என்ஜின் 118 குதிரைத்திறன் மற்றும் 172 Nm டார்க்கை அளிக்கிறது. இதனை 6-ஸ்பீடு மேனுவல் அல்லது 7-ஸ்பீடு டிசிடி கியர்பாக்ஸ் உடன் தேர்வு செய்யலாம். இதன் மைலேஜ் 18.75/ 20 கிமீ/லி ஆகும். 1.5 லிட்டர் டீசல் என்ஜின் 114 குதிரைத்திறன் மற்றும் 250 Nm டார்க்கை உற்பத்தி செய்கிறது. இது 6-ஸ்பீடு மேனுவல் அல்லது 6-ஸ்பீடு ஆட்டோமேட்டிக் கியர்பாக்ஸ் ஆப்ஷன்களுடன் கிடைக்கிறது. இதன் எரிபொருள் திறன் 20.99 / 17.9 கிமீ/லி ஆகும்.

டிரைவ்ஸ்பார்க் கருத்து: புதிய தலைமுறை ஹூண்டாய் வென்யூ கார்களுக்கான முன்பதிவுகள், ₹25,000 முன் தொகையுடன் நடைபெற்று வருகின்றன. அந்த வகையில், வென்யூ எச்.எக்ஸ்5 வேரியண்ட்டை முன்பதிவு செய்யலாம். அதிரடியான வடிவமைப்பு மற்றும் பிரீமியம் தொழிற்நுட்ப அம்சங்களுடன் அதேநேரம் குறைந்த விலையில் புதிய வென்யூ காரை வாங்க விரும்புபவர்களுக்கு எச்.எக்ஸ்5 ஏற்றதாக இருக்கும்.