நாளை அறிமுகமாகும் புது டாடா காரை எந்த கலரில் வாங்கலாம்? ஹூண்டாய் கார் போட்டிக்கு ரெடியா இருக்கு!

புதிய டாடா சியரா (Tata Sierra) எஸ்யூவி கார் நாளை (நவம்பர் 25) சந்தையில் விற்பனைக்கு அறிமுகம் செய்யப்பட உள்ளது. ஹூண்டாய் கிரெட்டா, மாருதி சுஸுகி கிராண்ட் விட்டாரா மற்றும் டாடா கர்வ் போன்ற ஏற்கனவே விற்பனையில் இருக்கும் சவாலான கார்களுடன் இது போட்டியிடும் என எதிர்பார்க்கப்படுகிறது. இந்த நிலையில், புதிய சியரா காருக்கு வழங்கப்பட உள்ள கலர் ஆப்ஷன்கள் குறித்த விபரங்கள் கிடைக்க பெற்றுள்ளன.

டாடா சியரா எஸ்யூவி காரை வாங்க விரும்புபவர்கள் ஆறு வகையான மோனோடோன் கலர் ஆப்ஷன்களுள் தேர்வு செய்யலாம் என்று டாடா நிறுவனம் உறுதிப்படுத்தியுள்ளது. அந்த 6 வண்ணங்களாவன, அந்தமான் அட்வென்ச்சர், பெங்கால் ரூஜ், கூர்க் க்ளவுட்ஸ், மிண்டல் க்ரே, மூணார் மிஸ்ட் மற்றும் பிரிஸ்டின் ஒயிட் ஆகும்.

இந்த வண்ணங்களில், அந்தமான் அட்வென்ச்சர் மற்றும் பெங்கால் ரூஜ் ஆகியன ஏற்கனவே வெளியான சியரா முன்னோட்டங்களில் காட்சிப்படுத்தப்பட்டன. இவை மற்ற வண்ணங்களை விட மிகவும் துடிப்பானதாக உள்ளன. மூணார் மிஸ்ட், ஒரு தனித்துவமான நிறம்; ஒளியைப் பொறுத்து பச்சை மற்றும் சாம்பல் நிறங்களுக்கு இடையே மாறும் தன்மை கொண்டது.

வழக்கமான மற்றும் எளிமையான வண்ணங்களை விரும்புபவர்கள் கூர்க் க்ளவுட்ஸ் (சில்வர்/ லேசான சாம்பல்), ப்யூர் க்ரே அல்லது பிரிஸ்டின் ஒயிட் ஆகியவற்றைத் தேர்வு செய்யலாம். தற்போதுவரை, சியராவுக்கான கருப்பு கலர் ஆப்ஷனை டாடா நிறுவனம் வெளியிடவில்லை. இருப்பினும், எஸ்யூவி அறிமுகத்தின்போது இது உறுதிப்படுத்தப்படலாம்.

புதிய டாடா சியரா கார் ஆனது ஸ்மார்ட், ப்யூர், அட்வென்ச்சர் மற்றும் ஃபியர்லெஸ் என்கிற நான்கு வேரியண்ட்களில் விற்பனை செய்யப்பட உள்ளது. பெட்ரோல் மற்றும் டீசல் என்ஜின்கள், மேனுவல் மற்றும் ஆட்டோமேட்டிக் கியர்பாக்ஸ் ஆப்ஷன்களுடன் இவை கிடைக்கும். சியரா காரின் எக்ஸ்-ஷோரூம் விலைகள் ரூ.12 லட்சத்தில் இருந்து ரூ.20 லட்சம் வரையில் நிர்ணயிக்கப்படலாம்.

எண்ட்ரீ-லெவல் ஸ்மார்ட் வேரியண்ட் ஆனது பெட்ரோல்-மேனுவல் ஆப்ஷன்களுடன் ரூ.12 லட்சத்திலும், டீசல்-மேனுவல் ஆப்ஷன்களுடன் ரூ.12.3 லட்சத்திலும் விற்பனை செய்யப்படலாம். ஹூண்டாய் கிரெட்டா மற்றும் டாடா கர்வ் போன்ற கார்களுடன் போட்டிபோட, டாடா நிறுவனம் சியராவை மிகவும் போட்டித்தன்மை வாய்ந்த விலையில் வெளியிடும் என எதிர்பார்க்கப்படுகிறது.

கிரெட்டாவின் எண்ட்ரீ-லெவல் வேரியண்ட் பெட்ரோல்-மேனுவல் ஆப்ஷன்களுடன் ரூ.10.73 லட்சத்திற்கு விற்பனை செய்யப்பட்டு வருகிறது. இந்த விலை வித்தியாசத்திற்கு முக்கிய காரணம் பவர்ட்ரெய்ன் தேர்வுதான். கிரெட்டா குறைந்த-ஸ்பெக் வேரியண்ட்களில் நேச்சுரலி அஸ்பிரேட்டட் பெட்ரோல் என்ஜினை வழங்குகிறது. ஆனால் சியராவின் பெட்ரோல் வேரியண்ட்கள் அனைத்தும் டர்போசார்ஜ் செய்யப்பட்ட என்ஜின் உடன் வருவதால் விலை அதிகமாக இருக்கும்.

முழுமையாக லோட் செய்யப்பட்ட விலைமிக்க டீசல்-ஆட்டோமேட்டிக் வேரியண்ட்களை ஒப்பிடுகையில், கிரெட்டா மற்றும் சியரா கிட்டத்தட்ட ஒரே விலையில் இருக்கும். இந்திய சந்தையில் கிரெட்டாவை தவிர, மேலும் எட்டு கார் மாடல்கள் புதிய டாடா சியராவுக்கு போட்டியாக ஏற்கனவே விற்பனையில் உள்ளன. அதற்கேற்ப புதிய டாடா சியரா நவீன அம்சங்களுடன் வருகிறது.

இதில் மூன்று திரைகள் கொண்ட இன்ஃபோடெயின்மென்ட் அமைப்பு, 12-ஸ்பீக்கர் JBL சவுண்ட் சிஸ்டம், காற்றோட்டமான முன் இருக்கைகள், டூயல்-ஸோன் கிளைமேட் கண்ட்ரோல் மற்றும் பனோரமிக் சன்ரூஃப் ஆகியவை அடங்கும். குறைந்த-ஸ்பெக் வேரியண்ட்கள் இரட்டை டிஜிட்டல் டிஸ்பிளேக்களுடன் வருகின்றன. பாதுகாப்பு அம்சங்களைப் பொறுத்தவரை, 6 ஏர்பேக்குகள், 360 டிகிரி கேமரா, பார்க் செய்வதற்கு உதவியாக சென்சார்கள், ISOFIX குழந்தை இருக்கை கொக்கிகள் மற்றும் லெவல்-2 ADAS ஆகியவை அடங்கும்.

டிரைவ்ஸ்பார்க் கருத்து: இந்திய வாடிக்கையாளர்களை கவர்வதற்காக இந்தியாவின் முக்கிய சுற்றுலா தளங்களின் நிறங்களில் கலர் ஆப்ஷன்களை புதிய சியரா காருக்கு வழங்க டாடா மோட்டார்ஸ் முடிவு செய்துள்ளது. டாடா ஹாரியர் இவி, ஹாரியர், சஃபாரி, கர்வ், நெக்ஸான் போன்ற கார்களில் டார்க் எடிசன் மற்றும் ஸ்டெல்த் எடிசன்கள் மூலம் கருப்பு கலர் ஆப்ஷனை டாடா வழங்கி வருவதைப் போல, சியராவிலும் முற்றிலும் கருப்பு கலர் ஆப்ஷன் கிடைக்குமா என்பதை பொறுத்திருந்துதான் பார்க்க வேண்டும்.