ரூ.11.49 லட்சம் விலையை பார்த்து ஏமாறாதீங்க... எல்லாம் கிடைக்கும் வேரியண்ட்டின் விலை அறிவிப்பு!

டாடா மோட்டார்ஸ் (Tata Motors) நிறுவனம், தனது புதிய சியரா (Sierra) எஸ்யூவி காரை ரூ.11.49 லட்சம் (எக்ஸ்-ஷோரூம்) என்கிற விலையில் சமீபத்தில் அறிமுகம் செய்ததை கேள்விப்பட்டு இருப்பீர்கள் என நினைக்கிறேன். அறிமுகத்தின்போது, காரின் ஆரம்ப விலையாக ரூ.11.49 லட்சம் மட்டுமே அறிவிக்கப்பட்டது. அதன் பின்னர், பிற வேரியண்ட்களின் விலைகள் வெளியிடப்பட்டன. இருப்பினும், அப்போதும் காரின் டாப் வேரியண்ட்களின் விலைகள் அறிவிக்கப்படவில்லை.

இந்த நிலையில் தற்போது, உயர் ரக 'அக்கம்பிளிஷ்ட்+' (Accomplished+) வேரியண்ட்டிற்கான விலைகளையும் டாடா மோட்டார்ஸ் அறிவித்துள்ளது. ஏற்கனவே கூறியதுபோல், டாடா சியரா அறிமுகத்தின்போது, அடிப்படை 'ஸ்மார்ட் ப்ளஸ்' (Smart Plus) வேரியண்ட் மட்டுமே ரூ.11.49 லட்சம் ஆரம்ப விலையில் (எக்ஸ்-ஷோரூம்) அறிவிக்கப்பட்டது.

அதைத் தொடர்ந்து, 'ப்யூர்', 'ப்யூர்+', 'அட்வென்ச்சர்', 'அட்வென்ச்சர்+' மற்றும் 'அக்கம்பிளிஷ்ட்' ஆகிய வேரியண்ட்களின் விலைகள் வெளியிடப்பட்டன. இருப்பினும், உயர் ரக 'அக்கம்பிளிஷ்ட்+' வேரியண்ட்டின் விலை ரகசியம் காக்கப்பட்டு வந்தது. தற்போது, இந்த டாப் வேரியண்ட்டான 'அக்கம்பிளிஷ்ட்+'-இன் ஆரம்ப விலை ரூபாய் 20.99 லட்சம் (எக்ஸ்-ஷோரூம்) என நிர்ணயிக்கப்பட்டுள்ளது.

இந்த வேரியண்ட் மூன்று துணை வேரியண்ட்களில் கிடைக்கிறது. அவற்றில், 'அக்கம்பிளிஷ்ட்+ ஹைபீரியன் ஆட்டோமேட்டிக்' (Hyperion AT) ரூபாய் 20.99 லட்சத்திற்கும், 'அக்கம்பிளிஷ்ட்+ க்ரையோஜெட் மேனுவல்' (Kryojet MT) ரூபாய் 20.29 லட்சத்திற்கும், 'அக்கம்பிளிஷ்ட்+ க்ரையோஜெட் ஆட்டோமேட்டிக்' (Kryojet AT) ரூபாய் 21.29 லட்சத்திற்கும் (அனைத்தும் எக்ஸ்-ஷோரூம் விலைகள்) விற்பனைக்கு வந்துள்ளன.

என்ஜின் & மற்ற சிறப்பம்சங்கள்: 'அக்கம்பிளிஷ்ட்+' வேரியண்ட், அதற்கு முந்தைய 'அக்கம்பிளிஷ்ட்' வேரியண்ட் உடன் ஒப்பிடுகையில், ரெவோட்ரான் என்ஜின் ஆப்ஷனை பெறவில்லை. மாறாக, இது ஹைபீரியன் 1.5 லிட்டர் டர்போ பெட்ரோல் மற்றும் க்ரையோஜெட் 1.5 லிட்டர் டர்போ டீசல் என்ஜின் ஆப்ஷன்களுடன் மட்டுமே கிடைக்கிறது.

உயர் ரக வேரியண்ட்டாக, 'அக்கம்பிளிஷ்ட்+' பல அதிநவீன அம்சங்களுடன் வருகிறது. இதில் மூன்று திரை டேஷ்போர்டு அமைப்பு (இரண்டு 12.3-இன்ச் டச்ஸ்கிரீன்கள், ஒரு 10.25-இன்ச் திரை), வயர்லெஸ் ஆண்ட்ராய்டு ஆட்டோ & ஆப்பிள் கார்பிளே இணைப்பு, ஸ்டீயரிங்கில் பொருத்தப்பட்ட ஆடியோ கண்ட்ரோல் மற்றும் க்ரூஸ் கன்ட்ரோல் ஆகியவை அடங்கும்.

மேலும், இதன் பாதுகாப்பு அம்சங்களில் 360-டிகிரி கேமராக்கள் மற்றும் பிளைண்ட் ஸ்பாட் கண்காணிப்பு ஆகியவை முக்கியம். வாடிக்கையாளர்களின் வசதிக்காக பெரிதாக்கக்கூடிய சன் வைசர்கள், டூயல்-ஸோன் கிளைமேட் கண்ட்ரோல், HypAR ஹெட்-அப் டிஸ்ப்ளே (HUD), லெதரெட்டால் ஆன இருக்கைகள், மெமரி செயல்பாடுடன் கூடிய பவர் முன்பக்க இருக்கைகள், பயணிகளின் கால் தொடைக்கான அட்ஜஸ்டபிள் சப்போர்ட் மற்றும் வென்டிலேட்டட் முன் இருக்கைகள் போன்ற அம்சங்களும் உள்ளன.

பிற தொழில்நுட்ப மற்றும் சொகுசு வசதிகள்: 'அக்கம்பிளிஷ்ட்+' வேரியண்ட்டில் டால்பி அட்மாஸ் சோனிக் ஷாஃப்ட் சவுண்ட்பார்ட் கொண்ட 12-ஸ்பீக்கர் JBL பிரீமியம் ஆடியோ சிஸ்டம், 5G இணைப்பு, திறந்தவெளி அனுபவத்திற்கான மிகப்பெரிய பனோரமிக் சன்ரூஃப் மற்றும் பின் இருக்கைகளுக்கும் ஏசி வென்ட்கள் ஆகியவை வழங்கப்பட்டுள்ளன.

மேலும், இந்த டாப் வேரியண்ட்டில் கேபினை சுற்றிலும் விளக்குகள், முன் & பின் இருக்கை வரிசைகளில் மத்தியில் பயணிகள் தங்களது கைகளை வைத்துக்கொள்ள ஆர்ம்ரெஸ்ட், பின் விண்டோ சன் ஷேட்கள், தன்னிச்சையாக டிம் ஆகக்கூடிய காருக்கு உள்ளே வழங்கப்படும் ரியர்-வியூ மிரர், பாஸ் மோட், 65 வாட்ஸ் USB டைப்-சி போர்ட்கள், காற்று சுத்திகரிப்பான், கூல்டு க்ளோவ் பாக்ஸ், பவர் டெயில்கேட், புஷ்-பட்டன் ஸ்டார்ட், பாதை மோட்கள், பேடில் ஷிஃப்டர்கள் மற்றும் ஆட்டோ ஹோல்டுடன் எலக்ட்ரிக் பார்க்கிங் பிரேக் போன்ற மேம்பட்ட வசதிகளும் உள்ளன.

டிரைவ்ஸ்பார்க் கருத்து: தற்போது 'அக்கம்பிளிஷ்ட்+' வேரியண்ட்டின் விலைகள் அறிவிக்கப்பட்டு இருப்பதன் மூலம், டாடா சியராவின் முழு விலைப்பட்டியல் ரூபாய் 11.49 லட்சம் முதல் ரூபாய் 21.29 லட்சம் வரை (எக்ஸ்-ஷோரூம்) என தற்போது நமக்கு தெரிய வந்துள்ளது. இந்த கார், மாற்று நிறுவனங்களின் 4.2 முதல் 4.4 மீட்டர் நீளமுள்ள எஸ்யூவி கார்களின் பிரிவில் போட்டி போடும் என எதிர்பார்க்கப்படுகிறது.